Go na content

Go na a tra menu

Go na table of contents

Yehovah Kotoigi

Sranantongo

Piki tapu 10 aksi di yongusma abi

 AKSI 2

Fu san ede mi no lobi fa mi skin de?

Fu san ede mi no lobi fa mi skin de?

FU SAN EDE A BUN FU TAKI FU DISI?

San yu e si na ini wan spikri, a no a moro prenspari sani.

SAN YU BEN O DU?

Luku a tori disi: Te Julia e luku na ini a spikri, a e si wán fatu sma. Den bigisma fu en nanga den mati fu en e taigi en taki a mangri. Toku a feni taki a musu go tapu dieet.

Wan pisi ten kaba, Julia e denki sortu sani a kan du fu lasi 2 kilo moro snel. Kande a no musu nyan wan tu dei.

Efu yu ben de Julia, san yu ben o du?

DENKI A TORI!

San yu e si te yu e luku na ini a spikri? Yu e si wan moro fatu sma leki yusrefi?

A no fout taki yu wani abi wan moi skin. Na ini Bijbel srefi yu kan leisi tori fu wan tu moi sma soleki Sara, Rakel, Abigayil, Yosef nanga David. Bijbel e taki fu Abisak, wan uma di „ben moi srefisrefi”.1 Kownu 1:4.

Ma furu yongusma e broko den ede tumusi nanga a fasi fa den skin tan. Disi kan tyari furu problema kon. Luku san e pasa:

  • Na ini Amerkankondre, sma kon si taki pikinmoro 60 procent fu den meisje drape ben denki taki den fatu tumusi. Ma 17 procent nomo ben fatu trutru.

  • Wan tra sani di sma kon si na taki pikinmoro 50 procent fu den umasma di ben mangri srefisrefi, ben feni taki den fatu tumusi.

  • Son yongusma ben e du ala sortu sani fu kon mangri. Dati meki den kisi anorexia, wan siki pe sma no e nyan èn te fu kaba den kan dede srefi.

 Efu yu denki taki yu abi anorexia noso wan tra siki pe yu no e wani nyan, dan go suku yepi. Kande yu kan taigi yu papa noso mama, noso wan tra bigisma di yu e frutrow. Bijbel e taki: „Wan trutru mati e sori lobi ala ten. En na wan brada di gebore fu te nowtu de.”Odo 17:17.

NANGA SAN YU MUSU BROKO YU EDE MORO?

A sani di e meki wan sma moi, na den bun fasi di a abi. Luku a tori fu Absalom, a manpikin fu Kownu David. Bijbel e taki:

’Nowan man ben moi so. Noti no ben e mankeri en.’2 Samuel 14:25.

Ma a yongu man disi ben abi heimemre, a ben wani kisi biginen èn a ben e bedrigi trawan. Fu dati ede Bijbel no e taki bun fu Absalom. Bijbel e sori taki a ben e du ala sortu sani di no bun èn en ati ben bron so te taki a ben kiri sma.

Dati meki Bijbel e gi wi a rai disi:

„Kon tron nyun sma di kisi nyun fasi.”Kolosesma 3:10.

„A moi fu unu no musu de den sani di sma ai man si . . . . Ma a moi fu unu musu de a sma di unu de dipi na ini un ati.”1 Petrus 3:3, 4.

A no fout te wan sma wani abi wan moi skin, toku a moro prenspari sani na fu abi moi fasi. A no wan moi skin o meki sma kon lobi yu te fu kaba, ma na den moi fasi fu yu. Wan meisje di nen Felisia e taki: „A kan taki te yu moi, sma o luku yu, ma san sma noiti o frigiti, na den moi fasi di yu abi.”

FA YU E DENKI FU YUSREFI?

Yu e firi fruferi fu di yu no lobi a fasi fa yu skin de?

Oiti yu denki fu hori ala sortu dieet soso fu meki yu skin kon moro moi?

San yu ben o kenki na yu skin efu yu ben man? (Marki sortu sani yu ben o wani kenki.)

  • A FASI FA YU SKIN BOW

  • YU AI

  • YU WIWIRI

  • YU SKIN KLORU

  • YU NOSO

  • TRA SANI

Kande yu piki den fosi tu aksi nanga „iya” èn kande yu marki dri noso moro fu den sani di yu wani kenki. Efu dati de so, dan denki a sani disi: A kan taki trawan no e si yu leki fa yu e si yusrefi. Kande yu e broko yu ede tumusi nanga a fasi fa yu e si yusrefi èn yu wani du ala sortu sani fu kenki a fasi fa yu skin de.1 Samuel 16:7.