Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Yosua 9:1-27

9  Now ala den kownu+ di ben e libi na den bergikontren na west-sei fu Yordan-liba, den wan di ben e libi na ini a kontren fu Syefela, den wan di ben e libi na a sesyoro fu a Bigi Se+ èn den wan di ben e libi krosibei fu Libanon-bergi,+ kon yere san pasa. Den Hètsma,+ den Amorietsma, den Kanansma,+ den Feresietsma,+ den Hefietsma, nanga den Yeibus-sma,+ kon yere tu san pasa.  Ne den alamala span anu makandra+ fu go feti nanga Yosua èn nanga den Israelsma.  Den sma fu Gibeon+ kon yere tu san Yosua du nanga a foto Yerikow+ èn nanga a foto Ai.+  Sobun, den meki mofo taki den ben o kori den Israelsma.+ Den teki nyanyan èn den poti owru saka na tapu den buriki fu den. Den teki owru winsaka* tu di ben priti kaba èn di den ben lapulapu.+ Ne den teki pasi gowe.  Den ben weri owru lapulapu susu nanga owru pritipriti krosi. Ala a brede di den ben abi na den, ben drei leki buskutu èn a ben tron sakasaka.  Na so den go na Yosua di ben de na ini a srudatikampu na Gilgal.+ Di den doro drape den taigi en nanga den tra man fu Israel: „Wi komoto na wan farawe kondre. Sobun, wi e begi yu, meki wan kruderi+ nanga wi.”  Ne den man fu Israel taigi den Hefiet+ man: „Kande unu e libi leti dya na ini a birti fu wi, dan fa wi kan meki wan kruderi nanga unu?”+  Dati meki den Hefiet man piki Yosua: „Wi na yu futuboi.”+ Ne Yosua aksi den: „Suma na unu èn fu pe unu komoto?”  Den piki Yosua: „Wi na futuboi fu yu èn wi komoto na wan farawe kondre.+ Wi yere fa sma e taki fu a nen+ fu Yehovah yu Gado èn wi yere ala sani di a du na ini Egepte.+ Dati meki wi kon dyaso. 10  Wi yere tu san a du nanga Kownu Sihon+ fu Hesbon èn nanga Kownu Ok+ fu Basan, di ben e libi na Astarot.+ Iya, wi yere san a du nanga den tu kownu disi fu den Amorietsma di ben e libi na abrasei fu Yordan-liba. 11  Dati meki den owru man fu wi nanga ala den kondreman fu wi taigi wi:+ ’Teki nyanyan èn go na den Israelsma, dan un musu taigi den: „Wi na un futuboi.+ Sobun, wi e begi yu, meki wan kruderi nanga wi.”’+ 12  Luku, a brede di wi abi dyaso ben waran ete na a dei di wi komoto na oso fu kon na unu. Ma now a kon drei èn a tron sakasaka.+ 13  Luku den winsaka disi. Di wi furu den nanga win, den ben de nyunyun ete, ma now den priti.+ Èn luku den krosi fu wi! Den kon priti èn den susu fu wi kon broko, fu di wi ben abi fu waka so fara.” 14  Ne den man fu Israel teki pikinso fu a nyanyan fu den Gibeonsma fu ondrosuku dati, ma den no go suku rai na Yehovah.+ 15  Baka dati Yosua pramisi den Gibeonsma taki a no ben o du den ogri+ èn a meki wan kruderi nanga den taki a no ben o kiri den. Ne den fesiman+ fu den Israelsma sweri taki den ben o du san Yosua pramisi den Gibeonsma.+ 16  Ma dri dei baka di den Israelsma meki a kruderi nanga den Gibeonsma, den kon yere taki den Gibeonsma no ben e libi fara fu den, ma taki den ben e libi na ini a birti fu den. 17  Now den Israelsma froisi komoto na a presi pe den ben de. Baka dri dei den doro na den foto fu den Gibeonsma. Den foto dati ben nen Gibeon,+ Kefira,+ Berot,+ nanga Kiriat-Yarim.+ 18  Ma den Israelsma no kiri den Gibeonsma, fu di den fesiman fu a pipel ben sweri+ na fesi Yehovah, a Gado fu Israel,+ taki den no ben o du den Gibeonsma ogri. Ne a pipel bigin krutu nanga den fesiman.+ 19  Dati meki den fesiman taigi a pipel: „Wi sweri na fesi Yehovah, a Gado fu Israel, taki wi no ben o du den sma disi ogri. Sobun, now wi no kan du noti nanga den.+ 20  Luku san wi o du. Wi no o kiri den, fu Gado no ati bron nanga wi, bika wi sweri gi den Gibeonsma+ taki wi no o du den ogri.” 21  Den fesiman taigi a pipel: „Meki den tan na libi. Dan wi o meki den tron sma di e koti udu èn di e syow watra gi a heri pipel,+ bika na dati den fesiman fu wi ben pramisi den.”+ 22  Ne Yosua kari den Gibeonsma kon, dan a aksi den: „Fu san ede unu kori wi? Unu e libi so krosibei.+ Dan fu san ede unu taigi wi: ’Wi e libi na ini wan kondre di de farawe fu unu?’+ 23  Now wan fluku kon de na unu tapu.+ Fu ala ten a pipel fu unu o de srafu+ di musu koti udu èn di musu tyari watra go na a oso fu mi Gado.”+ 24  Ne den piki Yosua: „Wi na yu futuboi. Wi kori unu, fu di sma ben taigi wi krin taki Yehovah yu Gado ben taigi en futuboi Moses fu gi unu a heri kondre disi. A ben taigi Moses tu taki un musu kiri ala den sma na ini a kondre.+ Sobun, wi kon frede srefisrefi taki unu ben o kiri wi.+ Na fu dati ede wi du a sani disi.+ 25  Sobun, dya wi de. Wi de klariklari fu du san yu taigi wi. Du nanga wi san yu wani.”+ 26  Na dati Yosua du tu. A hori den Gibeonsma na libi èn a no meki den Israelsma kiri den.+ 27  Na so Yosua poti+ den Gibeonsma leki srafu di ben musu koti udu. Den ben musu syow watra gi a pipel+ tu èn den ben musu tyari watra go na a altari fu Yehovah. Te na a dei fu tide den e du a wroko disi. Awinsi pe Gado ben wani taki na altari ben musu de, na drape den ben musu go fu wroko.+

Futuwortu

Disi na wan saka fu metibuba pe sma ben e gwenti poti win na ini.