Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Yosua 1:1-18

1  Baka di Yehovah en futuboi Moses dede, Yehovah taigi Yosua,+ a manpikin fu Nun, a dinari+ fu Moses:  „Mi futuboi Moses dede.+ Sobun, sreka yusrefi. Abra a Yordan-liba disi makandra nanga a heri pipel èn go na ini a kondre di mi o gi den Israelsma.+  Mi o gi unu ala den presi pe unu o poti un futu, soleki fa mi ben pramisi Moses.+  Unu o kisi a heri kontren fu den Hètsma.+ Dati na a kontren na mindri a sabana, a Libanon-bergi di yu e si drape, nanga a Gran Liba, sobun Eufraat-liba. A kontren fu unu o doro te na a Bigi Se di de na a sei pe son e dongo.+  Solanga yu de na libi, yu o wini iniwan sma di e kon feti nanga yu.+ Neleki fa mi ben de nanga Moses, na so mi o de nanga yu.+ Mi no o libi yu kwetikweti èn noiti mi o gowe fu yu.+  Abi deki-ati, no frede,+ bika yu na a sma di o tyari a pipel go na ini a kondre di mi ben sweri fu gi den afo fu den.+  Yu musu abi deki-ati nomo èn yu no musu frede kwetikweti, so taki yu kan du ala den sani di skrifi na ini a wèt di mi futuboi Moses ben taigi yu fu hori.+ Sorgu taki yu hori ala den wèt disi,+ so taki yu kan waka nanga koni, awinsi pe yu go.+  Yu musu tan taki fu a wèt di skrifi na ini a buku disi.+ Dei nanga neti yu musu leisi en nanga wan safri sten, so taki yu kan du ala den sani di skrifi na ini.+ Te yu du dati, dan sani o waka bun nanga yu èn yu o handri nanga koni.+  Mi no ben taigi yu+ kaba: ’Abi deki-ati èn no frede’? No meki sma tapu skreki gi yu èn no beifi,+ bika Yehovah yu Gado de nanga yu, awinsi pe yu e go.”+ 10  Ne Yosua taigi den fesiman fu a pipel, taki: 11  „Waka pasa na ini a kampu èn taigi a pipel: ’Sreka nyanyan gi unsrefi, bika ete dri dei, dan unu o koti a Yordan-liba disi abra fu go na ini a kondre di Yehovah un Gado pramisi fu gi unu, so taki unu kan teki en abra.’”+ 12  Baka dati Yosua taigi a lo fu Ruben, a lo fu Gad, nanga na afu lo fu Manase: 13  „Memre den komando di Moses, a futuboi fu Yehovah, ben gi unu,+ di a taki: ’Yehovah un Gado o meki taki sani waka bun nanga unu èn nanga a kondre disi. 14  Den wefi fu unu, den pikin fu unu, nanga den meti fu unu o tan na ini a kondre di Moses gi unu na a sei disi fu Yordan-liba.+ Ma un alamala di de tranga, deki-ati man+ musu seti unsrefi leki wan legre+ te unu e koti a liba abra. Dan un musu waka na fesi den brada fu unu èn un musu yepi den. 15  Te Yehovah meki sani waka bun nanga den brada fu unu, neleki fa a meki sani waka bun nanga unu èn te den teki a kondre abra di Yehovah un Gado gi den,+ dan fosi unu kan drai go baka fu teki a kondre abra di Gado gi unu.+ Dati na a kondre di Moses, a futuboi fu Yehovah, gi unu na a sei fu Yordan-liba pe son e opo.’”+ 16  Dati meki den piki Yosua: „Wi o du ala san yu taigi wi. Awinsi pe yu seni wi go, na drape wi o go.+ 17  Neleki fa wi ben du ala sani di Moses ben taigi wi, na so wi o du san yu e taki. Meki a de so nomo taki Yehovah yu Gado de nanga yu,+ neleki fa a ben de nanga Moses.+ 18  Iniwan sma di e trangayesi a komando fu yu+ èn di no e du den sani di yu taigi en fu du, musu dede.+ Yu musu abi deki-ati nomo èn yu no musu frede.”+

Futuwortu