Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Yohanes 13:1-38

13  Fosi a Paskafesa Yesus ben sabi taki a yuru doro+ fu gowe libi a grontapu disi fu go na a Tata.+ A ben lobi den sma fu en di ben de na grontapu.+ Iya, a ben lobi den te na a kaba.  Di den ben e nyan a neti-nyanyan, Didibri ben poti a prakseri kaba na ini na ati fu Yudas Iskariot,+ a manpikin fu Simon, taki a musu tori Yesus.+  Yesus ben sabi taki a Tata ben poti ala sani na ini en anu.+ A ben sabi tu taki a ben kon fu Gado èn taki a ben o go na Gado.+  Ne Yesus opo komoto na a tafra pe den ben e nyan èn a puru en dyakti. Dan a teki wan duku èn a tai disi na en bere.+  Baka dati, a poti watra na ini wan beki, dan a bigin wasi den futu+ fu den disipel, èn a drei den futu nanga a duku di a ben tai na en bere.  Di a kon na Simon Petrus, dan Petrus taigi en: „Masra, yu e wasi mi futu?”+  Yesus piki en: „Now yu no e frustan san mi e du, ma bakaten yu o frustan.”+  Petrus taigi en: „Noiti yu sa wasi mi futu.” Yesus piki en: „Efu mi no wasi yu+ futu, yu no kan de nanga mi.”  Simon Petrus taigi en: „Masra, no wasi mi futu wawan, ma wasi mi anu nanga mi ede tu.” 10  Yesus taigi en: „Efu wan sma wasi en skin kaba,+ dan na soso en futu a abi fu wasi, fu di en heri skin krin kaba. Unu krin, ma a no un alamala.” 11  Iya, a ben sabi suma na a sma di ben o tori en.+ Dati meki a taki: „A no un alamala krin.” 12  We, di a kaba wasi den futu fu den èn a weri en dyakti, a go sidon baka na tafra èn a taigi den: „Unu frustan san mi du gi unu? 13  Unu e kari mi: ’Leriman’+ nanga ’Masra’,+ èn unu abi leti, bika na dati mi de tu.+ 14  Fu dati ede, efu mi wasi un futu aladi mi na Masra nanga Leriman,+ dan un musu wasi den futu fu makandra tu,+ 15  bika mi gi unu na eksempre, so taki unu kan du tu san mi du gi unu.+ 16  Fu tru, mi e taigi unu: Wan srafu no bigi moro en masra, èn wan boskopuman no bigi moro a sma di seni en.+ 17  Efu unu sabi den sani disi, dan koloku fu unu te unu e du den.+ 18  Mi no e taki fu un alamala. Mi sabi den sma di mi kari.+ Ma disi e pasa, so taki den sani di skrifi na ini Gado Buku kan kon tru.+ Drape skrifi: ’A sma di ben gwenti nyan mi nyanyan e suku fu du mi ogri.’+ 19  Mi e taigi unu den sani disi nownowde bifo a pasa,+ so taki te a e pasa unu kan bribi taki mi na a sma dati. 20  Fu tru, mi e taigi unu: Efu wan sma e teki a wan di mi seni kon, dan a e teki mi tu.+ Sosrefi, a sma di teki mi, e teki en di seni mi kon.”+ 21  Baka di Yesus taki disi, a bigin sari trutru èn a taigi den krin: „Fu tru, mi e taigi unu: Wan fu unu o tori mi.”+ 22  Den disipel luku makandra, fu di den no ben sabi fu suma a ben taki disi.+ 23  Wan fu Yesus disipel ben sidon krosibei fu Yesus èn Yesus ben lobi en.+ 24  Fu dati ede Simon Petrus meki wan sani nanga en ede gi a sma dati èn a taigi en: „Taigi wi fu suma a e taki.” 25  Dati meki a disipel disi skoifi go moro krosibei na Yesus èn a aksi en: „Masra, suma na en?”+ 26  Fu dati ede Yesus piki en: „Na a sma di mi o gi a pisi brede di mi dopu na ini a komki.”+ Ne a dopu a pisi brede na ini a komki, dan a gi Yudas, a manpikin fu Simon Iskariot. 27  Di Yudas teki a pisi brede, dan Satan go na ini en.+ Fu dati ede Yesus taigi en: „A sani di yu wani du, go du en moro esi.” 28  Ma nowan fu den trawan di ben sidon na tafra ben sabi fu san ede Yesus taigi en a sani disi. 29  Sonwan fu den ben denki taki na fu di Yudas ben e hori a monikisi,+ meki Yesus taigi en: „Go bai den sani di wi abi fanowdu gi a fesa.” Kande den ben denki tu taki a ben musu gi den pôti sma wan sani.+ 30  Fu dati ede di Yudas teki a pisi brede, a go na dorosei wantewante. A ben de neti kaba.+ 31  Baka di Yudas go na dorosei, Yesus taki: „Now a Manpikin fu libisma e kisi glori+ èn nanga yepi fu en Gado e kisi glori tu. 32  Gado srefi o gi en glori+ èn a o gi en glori wantewante. 33  Mi pikin,+ mi o de nanga unu wan syatu pisi ten ete. Unu o suku mi èn san mi taigi den Dyu, na dati mi e taigi unu now tu: ’Pe mi o go, unu no man kon.’+ 34  Mi e gi unu wan nyun komando, taki un musu lobi makandra. Neleki fa mi lobi unu,+ na so un musu lobi makandra tu.+ 35  Na a fasi disi ala sma o sabi taki unu na mi disipel, te unu lobi makandra.”+ 36  Simon Petrus taigi en: „Masra, pe yu o go?” Yesus piki: „Pe mi o go, yu no man kon nanga mi now, ma bakaten yu o kon na mi.”+ 37  Petrus taigi en: „Masra, fu san ede mi no man kon now nanga yu? Mi de klariklari fu gi mi libi gi yu.”+ 38  Yesus piki en: „Yu de klariklari fu gi yu libi gi mi? Fu tru, mi e taigi yu: Wan kakafowru no o bari, fosi yu taki dri leisi taki yu no sabi mi.”+

Futuwortu