Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Yob 42:1-17

42  Dan Yob piki Yehovah:   „Mi kon si taki yu man du ala sani,+ Èn nowan sma man tapu yu fu du san yu abi na prakseri.+   Yu ben aksi: ’Suma na a sma drape di e drai den wortu fu mi, fu di a e taki sani sondro fu sabi?’+ Dati meki mi ben piki yu, ma mi no ben sabi Den sani di dangra tumusi fu mi frustan.+   Yu ben taki: ’Grantangi, arki mi te mi e taki. Mi o poti aksi gi yu, dan yu musu piki mi.’+   Mi ben yere fu yu, Ma now mi eigi ai e si yu.   Dati meki mi e aksi yu fu frigiti san mi taki. Luku fa mi e sidon na doti èn na ini asisi fu sori taki mi e sari.”+  Baka di Yehovah taki nanga Yob, a taki nanga a Teimansma Elifas tu. Yehovah taigi en: „Mi ati e bron srefisrefi nanga yu èn nanga den tu mati+ fu yu, bika unu no taki sani fu mi di tru,+ soleki fa mi futuboi Yob du.  Fu dati ede, un musu teki seibi mankaw nanga seibi manskapu,+ dan un go na mi futuboi Yob.+ Dan un musu tyari den meti disi leki wan bron-ofrandi, so taki mi feni unu bun baka, èn mi futuboi Yob o begi gi unu.+ Na soso en man begi mi fu mi no gi unu syen èn strafu unu fu a don sani di unu du, bika unu no taki sani fu mi di tru, soleki fa mi futuboi Yob du.”+  Na so a Teimansma Elifas, a Suwasma Bildad, nanga a Namasma Sofar du ala san Yehovah taigi den fu du, dan Yehovah arki Yob. 10  Baka di Yob begi gi den mati fu en,+ Yehovah puru Yob+ na ini a pina di a ben e pina. Dan Yehovah bigin gi Yob ala san a ben abi fosi. Iya, a gi en tu tron so furu leki dati.+ 11  Ne ala brada fu Yob, ala sisa fu en, nanga ala sma di ben sabi en fosi kon baka na en.+ Den ben e nyan nanga en+ baka na ini en oso, èn den ben e libi bun nanga en. Den ben trowstu en tu, bika Yehovah ben gi pasi taki someni problema miti en. Ibriwan fu den ben gi en wan moni èn ibriwan fu den ben gi en wan gowtu linga. 12  Bakaten Yehovah blesi+ Yob moro leki fosi.+ Te fu kaba Yob ben abi tinafo dusun skapu, siksi dusun kameili, tu dusun kaw, nanga wán dusun umaburiki. 13  A kisi seibi manpikin nanga dri umapikin tu.+ 14  A kari a fosi umapikin Yemima, a di fu tu umapikin Kesia, èn a di fu dri umapikin Keren-Hapuk. 15  Na ini a heri kondre nowan uma ben moi so leki den umapikin fu Yob. A papa fu den ben gi ibriwan fu den wan pisi fu a famirigudu neleki den brada fu den.+ 16  Baka ala den sani disi Yob libi ete wán hondro nanga fotenti yari.+ A ben si fa en pikin nanga en granpikin+ ben gro kon bigi, èn a ben kon sabi srefi den granpikin fu en granpikin. 17  Na so Yob ben e libi wan switi libi teleki a kon dede di a ben owru srefisrefi.+

Futuwortu