Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Yob 41:1-34

41  Yu man hari a bigi kaiman*+ nanga wan fisi-aka? Yu man tai en mofo nanga wan titei?   Yu man hari wan titei na ini en noso-olo?+ Yu man boro en kakumbe nanga wan maka?   A o begi yu furu tron fu abi sari-ati nanga en? A o taki na wan switi fasi nanga yu?   A o meki wan frubontu nanga yu, Taki a o de yu srafu fu ala ten?   Yu o man prei nanga en neleki fa yu kan prei nanga wan fowru? Yu o man tai en gi den yongu umapikin fu yu, so taki den kan prei nanga en?   Sma o aksi yu fu seri en gi den? Den o man prati en fu seri en gi bisnisman?   Yu o man dyukudyuku en skin nanga lansri,+ Noso yu o man sutu en na en ede nanga peiri fu fisiman?   Poti yu anu na en tapu, Dan yu o si san o pasa. Noiti yu o frigiti taki yu feti nanga en èn noiti yu o du so wan sani baka.   A sma di e denki fu fanga en, e kori ensrefi. Na si wan sma abi fu si en nomo, dan a e frede èn fadon na gron. 10  We, efu nowan sma abi a deki-ati fu meri en, Dan suma sa man tanapu kánkan na mi fesi?+ 11  Suma ben gi mi wan sani, so taki mi ben sa musu pai en fu dati?+ Ala sani na ondro heri hemel na fu mi.+ 12  Mi musu fu taki fu den pisi fu en skin, Fu a krakti fu en, èn fu a moi di a moi. 13  Suma man puru den krosi fu en? Suma man kon krosibei fu en tranga mofo? 14  Suma man opo en bigi mofo di de leki wan doro? Den tifi na ini en mofo e meki sma frede. 15  A e firi ensrefi hei, fu di a abi tranga sani leki fisibuba Di e tapu en heri skin leki wan skelt. 16  Ibriwan fu den sani disi e tapu a trawan so bun, Taki winti srefi no man pasa na mindri. 17  A wan e miti a trawan Èn ibriwan fu den fasi so steifi na makandra, taki den no man lusu. 18  Te a e meki atsyei a gersi leki faya e koti komoto na en mofo, Èn den ai fu en e skèin neleki te dei e broko. 19  En mofo e puru faya, Iya, faya e koti komoto na en mofo. 20  Smoko e komoto na en noso-olo, Neleki te grasi e bron na ini wan onfu. 21  A man leti krofaya nanga en bro, Èn wan faya e komoto na ini en mofo. 22  Krakti e tan na ini en neki, Èn bruya e waka na en fesi. 23  A buba fu en ondrobere tranga Leki wan isri plaat di sma no man hari puru. 24  En ati tranga leki ston, Iya, a tranga leki wan miriston. 25  Te a e opo, den tranga man e frede+ Èn den e bruya. 26  Te sma kon feti nanga en, dan nowan feti-owru, Nowan lansri, nowan peiri, noso wan tra srapu fetisani+ man du en wan sani. 27  Isri+ de leki drei grasi gi en, Èn kopro de leki pori udu gi en. 28  A no e lon gi nowan peiri. Den ston di sma e trowe nanga slenger,+ de leki drei grasi gi en. 29  A e si wan kodya leki wan pikin tiki nomo,+ Èn a e lafu te a e yere fa wan lansri e seki. 30  Ondrosei fu en srapu leki pisipisi broko prapi. A e libi wan marki na tapu a gron neleki te sma hari wan planga+ fu masi aleisi, na ini tokotoko. 31  A e meki den dipi watra kuku neleki watra di e bori na ini wan patu. A e meki a se kon de leki wan patu pe sma e meki salfu na ini. 32  Te a e swen, a watra de leki wan brenki pasi na en baka Èn a skuma na tapu a watra gersi weti wiwiri na tapu wan sma ede. 33  Nowan meti di e waka na tapu a gron de leki en. En na a meti di no sabi san na frede. 34  A e luku ala den bigi meti leti na ini den fesi. En na a kownu fu ala kefalek busimeti.”

Futuwortu

Hebrewtongo: Lefiatan.