Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Yob 33:1-33

33  We Yob, grantangi, arki san mi o taigi yu. Arki ala san mi abi fu taki.   Arki mi, grantangi, bika mi musu opo mi mofo. Mi tongo musu fu taki.+   Nanga wan krin ati mi o taki.+ Meki mi taki krin fu mi ati san mi sabi.+   Na a yeye fu Gado meki mi,+ Èn na a blo fu na Almaktiwan gi mi libi.+   Efu yu man, dan yu musu piki mi. Prakseri san yu o taigi mi, dan yu opo piki mi.   A tru Gado e si mi neleki fa a e si yu.+ Misrefi meki fu doti tu.+   Yu no abi fu frede mi. Mi no o taigi yu nowan hati sani fu broko yu.+   Ma mi yere yu taki wan sani, Èn a sani di mi yere yu taki, tan na ini mi prakseri. Yu taki:   ’Mi soifri èn mi no du nowan sani di no bun.+ Mi krin èn mi no abi nowan fowtu.+ 10  Luku, Gado e suku okasi fu gens mi, Èn a e si mi leki wan feanti fu en.+ 11  A poti mi futu na ini wan strafu-udu,+ Èn a e luku ala san mi e du.’+ 12  Ma meki mi taigi yu taki mi no kan gi yu leti na ini a tori disi,+ Bika Gado bigi omeni tron moro libisma.+ 13  Fu san ede yu wani haritaki nanga en?+ Na fu di a no e gi piki na tapu ala san yu taki?+ 14  Ma Gado e taki wan sani wan leisi, Dan a e taki en ete wan leisi.+ Toku sma no e poti prakseri na dati. 15  A e taki na ini dren+ èn na ini fisyun+ na neti, Te sma e sribi dipi, Èn te den e fadon na sribi na tapu den bedi.+ 16  Na den okasi dati a e opo den yesi fu libisma,+ Èn leki wan stampu a e poti den rai fu en na den tapu. 17  Na so a e meki libisma drai baka gi den ogri di den ben wani du,+ Èn na so a e kibri den gi heimemre.+ 18  A e sorgu taki libisma no go na ini grebi-olo,+ Èn taki wan peiri+ no kiri den. 19  Wan sma kan leri wan sani te a e didon nanga pen na tapu en bedi Èn te en bonyo e hati en ala ten. 20  A pinalibi fu en e meki taki a e si brede leki wan tegu sani,+ Èn srefi a moro switi nyanyan a no e lostu. 21  Ala sma kan si fa a e kon mangri dei fu dei. En bonyo di sma no ben e si fosi, kon de fu si now. 22  A e kon krosibei fu grebi-olo,+ Èn fu den wan di e tyari dede kon. 23  Efu wan boskopuman kon na en, Iya, efu wan sma komoto na mindri dusun sma fu kon taki nanga en Èn fu fruteri en san na retidu, 24  Dan Gado o feni en bun èn a o taki: ’Frulusu en fu grebi-olo!+ Mi feni wan lusu-paiman!+ 25  Meki en skin kon moro moi leki di a ben yongu.+ Meki a kon abi krakti baka neleki di a ben yongu.’+ 26  A o begi Gado fu a feni en bun.+ A o bari fu prisiri te a o si Gado en fesi. Dan Gado o feni en bun baka. 27  A o singi gi sma: ’Mi ben sondu+ èn mi ben meki reti sani kon tron kruktu sani. Ma disi no ben de wan bun sani fu du. 28  A frulusu mi fu grebi-olo,+ Mi o libi èn mi o si a leti.’ 29  Luku, ala den sani disi Gado e du Tu tron gi wan libisma, dan a e du den ete wan leisi gi en. 30  A e sorgu taki a no e go na grebi-olo,+ Èn taki a leti fu den libiwan skèin na en tapu. 31  Yob, grantangi, poti prakseri! Arki mi! No taki noti. Meki mi taki go doro. 32  Ma efu toku yu wani taigi mi wan sani, dan yu kan taki. Yu kan taki, fu di mi lobi a bun fasi fa yu e tyari yusrefi. 33  Ma efu yu no abi noti fu taki, dan yu musu arki mi.+ No taki noti, dan mi o sori yu san na koni.”

Futuwortu