Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Yob 24:1-25

24  Fu san ede na Almaktiwan no e poti wan spesrutu ten fu krutu sma?+ Fu san ede den wan di sabi en, no si a dei dati?+   Son sma e skoifi den marki di e sori pe wan tra sma en gron de.+ Den e fufuru den skapu fu trawan fu kweki den leki den eigi skapu.   Srefi a buriki fu den pikin di no abi papa, den e teki. Leki panti den e teki a mankaw fu wan uma di en masra dede kaba.+   Den e pusu den pôti sma go na wan sei.+ Na a srefi ten den mofina sma fu grontapu e kibri.   Leki sabanaburiki+ na ini a sabana Den du ala sortu sani fu feni nyanyan. Ibriwan fu den e feni nyanyan gi en manpikin na ini a sabana.   Den e koti nyanyan na tra sma gron, Èn esi-esi den e go fufuru droifi na ini a droifidyari fu den ogri sma.   Sososkin den e sribi na neti, fu di den no abi krosi.+ Den no abi nowan krosi fu tapu den skin te a kowru.+   Te alen e kon na den bergi, dan den e nati petepete. Den abi fu kibri na wan bigi ston, fu di den no abi nowan tra presi fu kibri.+   Srefi den pikin di no abi papa èn di de na bobi ete, den ogri sma e grabu tyari gowe.+ Den e teki den krosi fu den mofinawan leki panti.+ 10  Na so den mofinawan musu waka lontu sondro krosi, Èn nanga angribere den musu syow na aleisi di koti.+ 11  Na brekten den e tan na den skotu fu den droifidyari. Den musu wroko na a presi pe sma e masi droifi, ma toku den no abi noti fu dringi.+ 12  Na a foto, sma kan yere a babari fu den wan di de fu dede. Den wan di kisi hebi mankeri e bari fu kisi yepi.+ Ma Gado no e poti prakseri na dati.+ 13  Den ogriwan de na mindri den wan di no lobi a leti+ kwetikweti. Den no sabi den pasi fu a leti, Èn den no e waka na den pasi dati. 14  Na deiten a kiriman e opo, Dan a e go kiri den mofinawan nanga den pôtiwan.+ Na neti a de wan fufuruman.+ 15  A huruman+ e wakti teleki neti fadon.+ A e taki: ’Nowan sma o si mi!’+ Dan a e tapu en fesi fu sma no sabi suma na en. 16  Na ini a dungru den fufuruman e broko go na ini sma oso. Na deiten den e sroto densrefi na ini den oso. Den no sabi san na a leti fu deiten.+ 17  Mamanten de leki bigi dungru+ gi den, Bika den sabi sortu ogri e pasa na neti wantronso. 18  Den e gowe esi-esi, leki wan sani di e drifi gowe esi-esi na tapu watra. Sma o fluku a gron fu den.+ Den no o man drai go baka na den droifidyari fu den. 19  Neleki fa a faya fu dreiten e hari ala a watra fu snew gowe, Na so Grebi* e hari sondu sma gowe tu!+ 20  Den mama o frigiti den, èn den woron o nyan den leki wan switi sani.+ Nowan sma o memre den.+ Den ogri sma o broko fadon leki wan bon.+ 21  Den e du ogri nanga wan uma di no man meki pikin, Èn nanga wan uma di en masra dede kaba.+ 22  Nanga tranga Gado o tyari den tranga sma gowe. Den ogri sma o tron heihei sma, ma den no sabi san o pasa nanga den libi. 23  Gado o libi den ogri sma meki den abi wan bun libi sondro broko-ede.+ Ma a o luku san den e du.+ 24  Fu wan syatu pisi ten den e kon hei, dan den no o de moro.+ Sma o meki den kon lagi+ èn neleki ala tra sma den o hari den puru. Sma o koti den puru leki aleisi na den gron. 25  We, dan suma kan taki dati mi na wan leiman? Suma kan taki dati den wortu fu mi no tru?”

Futuwortu

Hebrew wortu: syeol. Luku „Moro sani”, nr. 10.