Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Yesaya 66:1-24

66  Disi na san Yehovah taki: „Hemel na mi kownusturu+ èn grontapu na mi futubangi.+ Sobun, pe unu kan bow wan oso gi mi?+ Pe unu kan meki wan tanpe gi mi?”+  Yehovah taki: „Ala den sani disi de, fu di mi meki den nanga mi eigi anu.+ Mi o poti prakseri na den sma di e pina, di brokosaka+ èn di e lespeki mi komando.+  A sma di e srakti wan mankaw de leki wan sma di e kiri wan trawan.+ A sma di e gi wan skapu leki ofrandi de leki wan sma di e broko a neki fu wan dagu.+ A sma di e tyari wan sani leki kado gi mi de leki wan sma di e tyari a brudu fu wan agu gi mi!+ A sma di e tyari switismeri leki ofrandi+ de leki wan sma di e blesi wan falsi gado.+ Den e du soso san den wani èn den lobi fu du tegu sani.+  Ma misrefi o du ala sortu ogri sani nanga den tu.+ Mi o du sani nanga den di o frede den.+ Ala den sani disi o pasa nanga den, bika mi ben kari den, ma nowan sma piki mi. Mi ben taki, ma nowan sma arki.+ Den tan du sani di mi no feni bun. Na den sani di mi no lobi, na dati den du.”+  Un man di e lespeki den komando fu Yehovah, arki san a taki:+ „Den brada fu unu no lobi unu kwetikweti.+ Fu mi nen ede den no wani bumui nanga unu.+ Na wan hoigri fasi den taki: ’Meki Yehovah kisi glori!’+ Ma te Gado o kon, dan na unu o prisiri,+ ma den o kisi syen.”+  Wan babari de fu yere na ini a foto, iya, wan babari e komoto na a tempel!+ Na Yehovah e strafu den feanti fu en gi den sani di den du.+  Bifo na uma Sion kisi pen, a ben meki a pikin kaba.+ Iya, bifo a kisi pen, a ben meki wan manpikin kaba.+  Suma yere fu so wan sani?+ Suma si den sortu sani disi?+ Wan kondre+ kan kon de na ini wán dei?+ Noso wan pipel+ kan gebore wantronso?+ Ma disi pasa nanga Sion. A kisi hebi pen èn a kisi den manpikin fu en.  „Mi no o opo a mofo fu a muru fu wan uma, dan mi no meki a pikin kon na doro”,+ na so Yehovah taki. „Mi no o meki wan pikin kon te na a mofo fu a muru, dan mi tapu a muru”, na so yu Gado taki. 10  Ala un sma di lobi+ Yerusalem, prisiri èn breiti nanga en.+ Un alamala di ben sari fu en ede, meki prisiri nanga en pasa marki.+ 11  Bika neleki fa wan mama e gi en pikin bobi teleki a abi nofo, na so Yerusalem o sorgu unu. Iya, unu o nyan bun èn prisiri trutru fu di a kisi glori.+ 12  Bika disi na san Yehovah taki: „Mi o gi en freide di furu leki a watra fu wan liba.+ Mi o meki tra pipel gi en glori di furu leki fruduwatra.+ Dan unu o soigi a bobi fu en,+ a o tyari unu na en seibere èn a o boboi unu na tapu en bowtu.+ 13  Mi o trowstu unu ibri tron baka neleki fa wan mama e trowstu en manpikin ibri tron baka.+ Na fu Yerusalem ede unu o kisi trowstu.+ 14  Te unu o si disi, dan un ati o prisiri.+ Den bonyo fu unu+ o kon nyun neleki te grasi e sproiti.+ Den futuboi fu Yehovah o si san a o du gi den+ èn a o strafu den feanti fu en.”+ 15  „Bika Yehovah o kon leki wan bigi faya+ èn den asiwagi fu en o kon leki wan bigi winti.+ Dan a o puru atibron na den tapu èn a o strafu den nanga faya.+ 16  Yehovah o kon leki wan faya èn nanga en feti-owru+ a o strafu ala sma. Yehovah o kiri furu sma.+ 17  Son sma e meki densrefi kon santa èn den e krin densrefi fu go anbegi tra gado na ini den spesrutu dyari.+ Den e nyan agu+ nanga tra sani di no krin èn den e nyan alata srefi.+ Ala den sma disi o dede”, na so Yehovah taki. 18  „Mi sabi san den e du+ èn san den e prakseri.+ Dati meki mi o tyari ala den pipel nanga ala grupu sma di e taki difrenti tongo kon makandra.+ Den alamala o kon fu si mi glori.”+ 19  „Mi o poti wan marki na den mindri meki den si dati.+ Wan tu fu den sma di kisi frulusu, mi o seni go na+ Tarsis,+ Pul, nanga Lud.+ Mi o seni den go na den sma fu Tubal nanga Yafan+ di sabi sutu bo. Mi o seni den go na den farawe tabiki+ pe sma no yere fu mi èn pe sma no si mi glori.+ Dan den o fruteri ala den pipel fu a glori fu mi.+ 20  Den o puru ala un brada na mindri ala den pipel+ èn den o tyari den kon fu gi den na Yehovah.+ Den o tyari den kon na tapu asi, na ini asiwagi, na ini wagi di abi daki, na tapu buriki* èn na tapu umakameili di e waka esi.+ Den o tyari den kon na Yerusalem na tapu mi santa bergi”,+ na so Yehovah taki. „A o de neleki te den Israelsma tyari wan sani na ini wan krin komki gi Yehovah na a oso fu en.”+ 21  „Mi o teki wan tu fu den èn mi o meki den tron priester nanga Leifisma”, na so Yehovah taki. 22  „A nyun hemel+ nanga a nyun grontapu+ di mi o meki o tan fu ala ten.+ Na so den bakapikin fu unu+ o tan fu ala ten èn sma o tan memre a nen fu unu”,+ na so Yehovah taki. 23  „Ibri nyun mun èn ibri Sabat ala sma o kon boigi na mi fesi”,+ na so Yehovah taki. 24  „Te den o go na dorosei, den o si den dedeskin fu den sma di ben sondu teige mi.+ Den woron di de na den tapu no o dede èn a faya di e bron den no o dede.+ Ala sma o tegu gi den.”+

Futuwortu

Luku a marki na 2Sa 13:29.