Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Yesaya 65:1-25

65  „Mi meki den sma di no ben e aksi fu mi,+ suku mi.+ Mi meki den sma di no ben e suku mi, feni mi.+ Mi taigi wan pipel di no ben e kari mi nen:+ ’Luku mi dya! Luku mi dya!’+  Heri dei mi langa mi anu gi wan tranga-ede+ pipel. Den na sma di no e waka wan bun pasi+ èn den e du san den wani.+  Doronomo den sma fu a pipel disi e wisiwasi+ mi leti na mi fesi. Den e tyari srakti-ofrandi na ini den dyari+ èn den e tyari smoko-ofrandi+ na tapu ston di den meki.  Den e sidon na den beripe+ èn heri neti den e tan na den waktiman-oso. Den e nyan agumeti,+ èn a sowsu fu meti di no krin+ de na ini den patu.  Den e taki: ’Tan pe yu de. No kon krosibei fu mi, noso yu o kon santa tu.’+ Den sma disi na smoko na ini mi noso-olo+ èn wan faya di e bron heri dei.+  Luku! A skrifi leti na mi fesi.+ Mi no o tan tiri.+ Mi o pai den gi san den e du.+ Iya, den borsusaka o furu nanga a pai di mi o gi den.+  Na a srefi ten den o kisi pai fu den sondu di den du èn den sondu di den afo fu den du.+ Den ben tyari smoko-ofrandi na tapu den bergi èn den gi mi syen+ na tapu den pikin bergi.+ Fu dati ede, a fosi sani di mi o du, na fu pai den san den frudini. Iya, den borsusaka o furu nanga a pai di mi o gi den”,+ na so Yehovah taki.  Disi na san Yehovah taki: „Sma no e pori wan bosu droifi te den kan meki nyun win fu dati.+ Den e taki: ’No pori a bosu,+ bika a e tyari bun kon.’+ Na so mi o du tu. Na fu mi futuboi ede, mi no o kiri unu alamala.+  Ma mi o meki Yakob kisi pikin+ èn den bergi fu mi o de fu den pikin fu Yuda.+ Na mi o taki suma o kisi den presi dati+ èn na mi futuboi o tan drape.+ 10  Te mi pipel suku mi baka,+ dan Saron+ o tron wan weigron gi skapu+ èn Akor-lagipresi+ o de wan tanpe gi kaw. 11  Ma na unu gowe libi Yehovah.+ Na unu frigiti mi santa bergi.+ Na unu e seti wan tafra gi a gado fu Koloku*+ èn na unu e kanti win gi a gado di e taki na fesi fa sani o waka.+ 12  Mi o meki sma kiri unu nanga feti-owru+ èn un alamala o saka kindi gi den meki den kiri unu.+ Ala den sani disi o pasa nanga unu, fu di mi ben kari unu,+ ma unu no ben piki. Mi ben taki, ma unu no ben arki.+ Na presi fu dati unu tan du sani di mi no feni bun.+ Na den sani di mi no lobi, na dati unu du.”+ 13  Fu dati ede a Moro Hei Masra Yehovah taki: „Luku! Mi futuboi o nyan,+ ma unu o de nanga angri.+ Mi futuboi o dringi,+ ma watra o kiri unu.+ Mi futuboi o prisiri,+ ma unu o kisi syen.+ 14  Mi futuboi o bari fu prisiri fu di den abi wan bun ati.+ Ma unu o bari fu di un ati e hati, iya, unu o bari krei fu di unu lasi-ati krinkrin.+ 15  Den sma fu mi o gebroiki a nen fu unu fu meki sweri èn a Moro Hei Masra Yehovah o kiri ibriwan fu unu.+ Ma a o kari den futuboi fu en na wan tra nen.+ 16  Dan iniwan sma na grontapu di e suku blesi o suku blesi na a tru Gado.+ Iniwan sma na grontapu di e meki wan sweri, o sweri na a tru Gado.+ Den no o prakseri moro fa den ben de na ini banawtu fositen èn mi no o si moro fa den e pina.+ 17  Bika luku, mi o meki nyun hemel+ nanga wan nyun grontapu.+ Sma no o memre den fositen sani moro+ èn den sani dati no o abi krakti na den tapu moro.+ 18  Ma un musu breiti srefisrefi+ èn un musu prisiri fu têgo nanga den sani di mi e meki.+ Bika mi o meki Yerusalem tron wan sani di o gi unu prisiri èn den sma drape o meki unu breiti srefisrefi.+ 19  Mi o prisiri fu Yerusalem ede èn mi o breiti srefisrefi nanga mi pipel.+ Noiti moro sma o yere trawan e krei drape èn noiti moro den o yere sma e bari krei fu di den e sari.”+ 20  „Noiti moro a o de so, taki wan nyunyun pikin drape libi wan tu dei nomo.+ Sma o libi bun langa.+ Te wan sma abi wán hondro yari èn a dede, dan sma o taki dati a dede yonguyongu. Wan sondari o dede fu di fluku kon na en tapu aladi a abi wán hondro yari nomo.+ 21  Den o bow oso èn den srefi o tan na ini.+ Den o prani droifidyari èn den srefi o nyan fu en.+ 22  Den no o bow oso, dan wan tra sma go tan na ini. Den no o prani sani, dan wan tra sma nyan fu dati. Bika mi pipel o libi langa neleki wan bon+ èn den wan di mi teki o nyan bun fu a wroko di den du.+ 23  Den no o wroko tranga fu soso+ èn den no o kisi pikin di o pina.+ Bika den na pikin di Yehovah blesi+ èn a o blesi den bakapikin fu den tu.+ 24  Fosi den kari mi, mi o piki den+ èn mi o yere den fosi den kaba taki srefi.+ 25  Den busidagu+ nanga den pikin skapu o nyan nanga makandra.+ Den lew o nyan drei grasi neleki den mankaw.+ Den sneki o nyan doti.+ Den no o du ogri+ èn den no o pori nowan sani na tapu heri mi santa bergi”,+ na so Yehovah taki.

Futuwortu

Noso: „a gado di e meki taki sani waka bun.”