Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Yesaya 63:1-19

63  Suma na a sma di e kon fu Bosra+ na ini Edom?+ A weri brenki krosi leki wan heihei man. A e waka kon leki wan tranga man. „Mi na a sma dati. Mi e taki san reti+ èn mi abi furu makti fu frulusu sma.”+  Fu san ede den krosi fu yu redi neleki den krosi fu wan sma di e masi droifi?+  „Na mi srefi trapu den droifi+ fu masi den èn nowan sma ben de nanga mi. Nanga atibron mi masi den,+ iya, nanga bigi atibron mi trapu den.+ A brudu fu den spoiti na tapu mi krosi,+ èn now ala mi krosi flaka.  Mi abi wan dei na prakseri fu puru atibron na tapu sma.+ A yari te mi o bai mi pipel baka, doro kaba.  Mi ben e luku lontu, ma nowan yepiman ben de. Mi fruwondru di mi si taki nowan sma ben de nanga mi.+ Fu dati ede mi langa mi anu fu frulusu sma.+ Na fu di mi ati bron+ meki mi du wan sani.  Nanga atibron mi trapu na tapu den pipel èn mi meki den dringi mi bigi atibron teleki den kon drungu.+ Mi meki a brudu fu den spoiti na gron.”+  Mi o taki fu den bun sani di Yehovah du.+ Mi o prèise Yehovah gi ala den bun sani di a du gi wi.+ Iya, mi o taki fu den furu bun sani di Yehovah du gi den Israelsma,+ fu di a sari den+ èn fu di a abi bun-ati pasa marki.  A taki: „Fu tru, den na mi pipel.+ Den na manpikin di no o drai baka gi mi.”+ Dati meki a tron den Frulusuman.+  Te den ben de na ini banawtu, ensrefi ben de na ini banawtu tu.+ En eigi boskopuman frulusu den.+ Fu di a lobi den èn fu di a sari den meki a bai den baka.+ A opo den èn a tyari den sensi owruten.+ 10  Ma den opo densrefi teige en+ èn den meki en santa yeye firi sari.+ Dati meki a tron den feanti+ èn a bigin feti nanga den.+ 11  Dan den bigin prakseri fa a ben de fositen na ini a ten fu en futuboi Moses. Den prakseri: „Pe a sma de di tyari a pipel pasa a se+ makandra nanga den wan di ben de leki skapuman gi en pipel?+ Pe a sma de di poti en santa yeye na en tapu?+ 12  Pe a sma de di langa en tranga anu+ fu hori Moses na en reti-anu èn di prati a watra gi den,+ so taki a ben o kisi biginen fu ala ten?+ 13  Pe a sma de di meki den waka pasa na ini a krasi se èn di meki den lon leki asi na ini a sabana sondro fu stotu den futu?+ 14  Neleki fa wan meti e saka go rostu na ini wan lagipresi, na so a yeye fu Yehovah meki den rostu.”+ Na so yu tyari a pipel fu yu, so taki yu ben kan gi yu nen glori.+ 15  Yu de na yu moi èn santa tanpresi di de hei na ini hemel.+ Ma grantangi, luku kon na ondro. Pe a faya nanga ala a krakti fu yu de?+ Fu san ede yu no e firi gi wi+ èn yu no abi sari-ati gi wi?+ Yu no e luku wi moro.+ 16  Ma yu na wi Tata.+ Iya, yu na wi Tata Yehovah, aladi Abraham nanga Israel no ben sabi wi. Yu na a sma di bai wi baka langa ten pasa.+ 17  Ke Yehovah, fu san ede yu e meki wi drai komoto na yu pasi? Fu san ede yu meki wi kon tranga-ede, so taki wi no e frede yu?+ Grantangi, drai kon baka fu den futuboi fu yu ede, den lo fu yu.+ 18  Fu wan syatu pisi ten yu santa pipel ben abi a kondre.+ Ma den feanti fu wi pori yu santa presi.+ 19  Wan heri pisi ten wi ben de leki wan pipel di yu no ben e tiri èn leki wan pipel di no ben e tyari yu nen.+

Futuwortu