Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Yesaya 60:1-22

60  „Uma, opo+ èn skèin yu leti,+ bika yu leti kon+ èn a glori fu Yehovah e skèin na yu tapu.+  Bika dungru+ o tapu grontapu èn bigi dungru o tapu den pipel. Ma Yehovah o skèin en leti na yu tapu èn sma o si a glori fu en na yu.+  Dan den pipel o go na a leti fu yu+ èn den kownu+ o go na a brenki leti di yu e skèin.+  Opo yu ede èn luku lontu na ala sei! Den alamala kon makandra.+ Den kon na yu.+ Fu farawe yu manpikin nanga umapikin e kon. Sma e sorgu den umapikin fu yu èn den e tyari den na den seibere.+  Na a ten dati yu o si èn yu o brenki.+ Yu ati o dyompo fu prisiri èn yu o breiti srefisrefi, fu di den gudu fu se o kon na yu. Iya, den gudu fu den pipel o kon na yu.+  Wan bigi grupu kameili fu Midian nanga Efa+ o furu a heri kondre fu yu. Ala den sma fu Skeiba+ o kon tu. Den o tyari gowtu nanga switismeri kon èn den o prèise Yehovah na ala sei.+  Ala den skapu fu Keidar+ o kon na yu. Sosrefi den manskapu fu Nebayot+ o kon yepi yu.+ Mi o teki den leki ofrandi na tapu mi altari+ èn mi o meki mi moi oso kon moro moi.+  Suma na den sma di e kon leki wan wolku+ èn leki doifi di e frei kon na den doifi-oso?  Na mi den tabiki o wakti.+ Den sipi fu Tarsis+ o kon tu neleki fositen. Den o tyari den manpikin fu yu kon fu farawe+ nanga a solfru èn nanga a gowtu fu den.+ Den manpikin fu yu o gi a nen+ fu yu Gado Yehovah glori. Iya, den o gi glori na a Santawan fu Israel,+ fu di a meki yu kon moi.+ 10  Trakondre sma o bow den skotu fu yu+ èn den kownu fu den o yepi yu.+ Bika di mi ati bron nanga yu mi naki yu,+ ma na bun-ati fu mi meki mi e sari yu now.+ 11  Den portu fu yu o tan opo ala ten.+ Den no o tapu srefi na deiten noso na neti. Dan den pipel o tyari den gudu fu den kon na yu+ èn den kownu fu den o de den fosiwan fu du disi.+ 12  Iniwan pipel noso kownukondre di no wani yepi yu, o kisi pori. Iya, den pipel o dede.+ 13  Ala den moi sani fu Libanon o kon na yu. Iya, den yaneifer-bon, den es-bon, nanga den sipres-bon o kon na yu+ fu meki mi santa presi kon moi.+ Iya, mi o moi a presi pe mi e poti mi futu.+ 14  Den manpikin fu den wan di ben e pina yu, o kon boigi gi yu.+ Ala sma di no ben abi lespeki gi yu o saka kindi boigi na yu futu.+ Den o kari yu Sion, a foto fu Yehovah+ di de a Santawan fu Israel. 15  Yu ben de a wan di den libi en wawan. Sma no ben wani si yu na ai èn nowan sma ben pasa na ini yu.+ Ma now mi o meki sma prodo nanga yu. Iya, fu ala ten sma o bari fu prisiri fu yu ede.+ 16  Yu o soigi a merki fu den pipel+ èn yu o soigi a bobi fu den kownu.+ Yu o sabi taki mi Yehovah,+ na yu Frulusuman,+ èn taki a Tranga Gado+ fu Yakob na a sma di bai yu baka.+ 17  Na presi fu kopro mi o tyari gowtu kon+ èn na presi fu isri mi o tyari solfru kon. Na presi fu udu mi o tyari kopro kon èn na presi fu ston mi o tyari isri kon. Mi o poti freide leki yu edeman+ èn retidu leki yu basi.+ 18  Sma no o yere moro taki trawan e du ogri na ini yu kondre, taki den e fufuru, noso taki den e pori a kondre.+ Den skotu fu yu, yu o kari Frulusu.+ Den portu fu yu, yu o kari Prèise. 19  A no son o gi yu leti na deiten èn a no mun o gi yu leti na neti. Na Yehovah o tron wan leti gi yu di o skèin fu ala ten+ èn a Gado fu yu o meki yu kon moi.+ 20  Yu no o si son dongo moro èn a mun no o kenki moro. Bika Yehovah o tron wan leti gi yu di o skèin fu ala ten+ èn a ten di yu ben row o kon na wan kaba.+ 21  Ala den sma fu yu o de reti-ati sma.+ Fu ala ten a kondre o de fu den.+ Den o de a pransun di mi prani+ èn den sani di mi meki.+ Na so mi o kisi glori.+ 22  A pikin grupu o tron wan grupu fu dusun èn a pikin pipel o tron wan makti pipel.+ Mi, Yehovah, o meki disi pasa esi-esi te a ten doro.”+

Futuwortu