Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Yesaya 52:1-15

52  Wiki! Wiki èn kon tranga, Sion!+ Weri yu moi krosi,+ yu santa foto Yerusalem!+ Bika noiti moro wan sma di no besnèi noso di no krin, o kon na yu.+  Seki a finifini doti puru na yu skin,+ dan yu opo go sidon, Yerusalem. Lusu den banti di tai na yu neki, yu umapikin fu Sion di ben de na ini katibo.+  Bika Yehovah taki: „Mi no ben kisi moni di mi seri unu+ èn mi o bai unu baka sondro fu pai wan moni.”+  A Moro Hei Masra Yehovah taki: „Biginbigin mi pipel ben go na Egepte fu tan drape leki sma fu wan tra kondre.+ Asiria ben kwinsi den fu soso.”  „We dan san mi kon du dya?”, na so Yehovah taki. „Na fu soso sma teki mi pipel tyari gowe.+ Den sma di ben e basi den ben e meki bigi fu dati”,+ na so Yehovah taki, „èn heri dei den ben e meki spotu nanga mi nen doronomo.+  Dati meki mi pipel o sabi mi nen.+ Iya, na fu dati ede mi o meki den sabi mi nen na a ten dati, bika mi na a sma di taki disi.+ Iya, na mi srefi taki so.”  Luku den moi futu+ fu den sma di e waka na tapu den bergi fu tyari bun nyunsu,+ fu den sma di e fruteri fu wan bun ten,+ fu den sma di e tyari bun nyunsu fu wan moro bun sani,+ fu den sma di fruteri taki frulusu o kon,+ èn fu den sma di e taigi Sion: „Yu Gado tron kownu!”+  Arki! Den waktiman fu yu+ opo den sten.+ Leki wán man den e bari fu prisiri, bika nanga den eigi ai+ den o si fa Yehovah e tyari den sma fu Sion kon baka.+  Ala un brokopresi fu Yerusalem, un musu breiti èn bari fu prisiri nanga wán sten,+ bika Yehovah trowstu en pipel+ èn a bai Yerusalem baka.+ 10  Yehovah meki ala den pipel si en santa krakti+ èn te na den moro farawe presi fu grontapu, sma o si fa wi Gado e tyari frulusu kon.+ 11  Un drai gowe! Drai gowe èn komoto drape.+ No fasi nowan sani di no krin+ èn komoto drape.+ Un hori unsrefi krin, un sma di e tyari den wrokosani fu na oso fu Yehovah.+ 12  Te unu o gowe, unu no o bruya. Unu no o abi fu lon gowe.+ Bika Yehovah o waka na un fesi+ èn a Gado fu Israel o de na un baka fu kibri unu.+ 13  Luku! Mi futuboi+ o du sani nanga koni.+ A o de wan heihei sma, a o abi biginen èn sma o sori en bigi lespeki.+ 14  Furu sma ben luku en nanga opo mofo,+ fu di en fesi ben pori+ èn a no ben gersi nowan tra man.+ Iya, a no ben gersi nowan manpikin fu libisma. 15  Na so a o meki furu pipel skreki tu.+ Na fu en ede, kownu o tapu den mofo,+ bika den o si san nowan sma ben fruteri den èn den o poti prakseri na san den no ben yere ete.+

Futuwortu