Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Yesaya 5:1-30

5  Meki mi singi wan singi fu mi lobiwan di abi fu du nanga en droifidyari.+ Mi lobiwan ben abi wan droifidyari na wan pikin bergi di ben abi fatu gron.  A ben drai a doti fu puru den ston na ini, dan a prani wan droifibon di e gi den moro bun redi droifi. A ben bow wan toren na mindrisei fu a dyari+ èn wan presi fu masi den droifi.+ A ben howpu taki a droifibon ben o gi bun droifi,+ ma bakaten a gi busidroifi.+  Dati meki a taki: „Un sma di e tan na Yerusalem èn un man fu Yuda, grantangi, koti krutu gi mi nanga mi droifidyari.+  San mi musu du ete gi mi droifidyari? Mi du ala sani kaba.+ Mi ben denki taki a ben o gi bun droifi. Ma fu san ede a e gi busidroifi now?  Fu dati ede, meki mi taigi unu san mi o du nanga mi droifidyari now: mi o puru den bon di ben de leki wan skotu+ gi en èn mi o bron en.+ Mi o broko a ston skotu fu en èn mi o meki sma trapu+ ala sani na ini teleki noti no bun moro.  Mi o meki a tron wan sani di musu kisi pori.+ Nowan sma o sorgu en èn den no o wroko a gron nanga tyapu.+ Dan makabusi nanga grasi+ o gro tapu ala sani. Mi o taigi den wolku fu no meki alen fadon na en tapu.+  Mi na Yehovah di e tiri den legre, Israel na mi droifidyari,+ èn den sma fu Yuda na a droifibon di mi ben lobi.+ Mi ben howpu taki sma ben o koti krutu+ na wan reti fasi, ma na presi fu dati den no ben e gi yesi na a wèt. Mi ben howpu taki sma ben o du retidu, ma na presi fu dati mi yere a babari+ fu den wan di sma ben e kwinsi.”  Helu fu den sma di e teki a wan oso baka a trawan+ èn di e teki moro nanga moro gron teleki gron no de moro+ èn den wawan e tan na ini a kondre!  Mi yere Yehovah di e tiri den legre sweri taki den furu bigi moi oso o broko te na gron èn nowan sma o tan na ini.+ 10  Awinsi wan gron bigi so te, taki tutenti kaw+ de fanowdu fu plugu en na ini wán dei, toku na wán bigi emre win+ nomo a o gi. Awinsi sma sai wan heri bari aleisi, toku na wán bigi baki+ nomo den o koti. 11  Helu fu den sma di e opo fruku mamanten soso fu suku sopi fu dringi!+ Den drungu èn den e du lawlaw sani, fu di den e dringi win te lati neti!+ 12  Na den fesa fu den,+ den e dringi win èn den e prei harpu, pokusani di gersi harpu, tyengretyengre, nanga froiti. Ma den no e poti prakseri na san Yehovah e du èn den no wani sabi nowan sani di a e du.+ 13  A pipel fu mi o abi fu go na ini katibo, fu di den no sabi en.+ Den heihei sma no o abi noti fu nyan+ èn den tra sma no o abi noti fu dringi.+ 14  Grebi* o meki ensrefi kon moro bigi, iya, a o opo en mofo bradi teleki a no man moro.+ Dan a o swari ala den heihei sma nanga den tra sma fu a foto. A o swari ala den sma di e meki dyugudyugu èn den sma di e meki prisiri na ini a foto.+ 15  Den sma o saka den ede èn den o kon lagi, iya, den heihei sma o abi fu saka densrefi.+ 16  Yehovah di e tiri den legre o kon hei te a krutu+ den. A tru Gado, a Santawan,+ o meki ensrefi kon santa te a krutu den na wan reti fasi.+ 17  Te a foto tron wan brokopresi, den pikin skapu o go nyan grasi drape neleki den de na den weigron. Den presi pe den fatu meti ben e nyan grasi fosi, o tron brokopresi èn den trakondre sma o nyan san e gro drape.+ 18  Helu fu den sma di e lei! Nanga den lei fu den, den e hari ogri nanga sondu neleki fa wan meti e hari wan wagi nanga titei.+ 19  Helu fu den sma di e taki: „Meki Gado du en wroko esi-esi! A no musu draidrai. Wi wani si san a man du. Meki a Santawan fu Israel kon esi-esi fu du san a abi na prakseri. Dan wi o sabi san a man du.”+ 20  Helu fu den sma di e taki dati bun ogri èn ogri bun!+ Helu fu den sma di e taki dati dungru leti èn leti dungru! Helu fu den sma di e taki dati bita sukru èn sukru bita!+ 21  Helu fu den sma di denki taki den koni èn di feni taki den abi furu sabi!+ 22  Helu fu den sma di sabi dringi furu win! Helu fu den kefalek man di sabi dringi tranga sopi di moksi nanga tra sani!+ 23  Helu fu den sma di e taki dati ogri sma bun, soso fu di den ogri sma e pai den tyuku!+ Helu fu den sma di e taki dati den reti-ati sma du ogri!+ 24  Dati meki den o kisi pori neleki te faya e bron drei wiwiri+ nanga drei grasi. A rutu fu den o pori èn a o tingi.+ A pransun fu den o kon tron puiri èn a o wai gowe. Na dati o pasa nanga den, fu di den no wani gi yesi na a wèt fu Yehovah di e tiri den legre+ èn den no e sori lespeki te a Santawan fu Israel e taki.+ 25  Dati meki Yehovah en ati bron srefisrefi nanga en pipel. A o langa en anu naki den.+ Bruya o de na den bergi,+ èn den dedeskin fu den sma o de leki doti na strati.+ Na fu di den e tan du ogri, meki en ati e bron nanga den ete èn a e naki den ete. 26  A poti wan marki fu sori wan bigi pipel pe den musu kon, èn a froiti kari den fu komoto na a moro farawe presi fu grontapu.+ Den o hasti densrefi fu kon esi-esi.+ 27  Nowan fu den weri èn nowan fu den e stotu den futu. Nowan fu den e dyonko èn nowan fu den e sribi. A leribuba na den mindribere no o lusu èn den titei fu den susu no o koti. 28  Den peiri srapu èn den bo de srekasreka.+ Den futu fu den asi de leki tranga ston+ èn den banti fu den asiwagi e drai leki draiwinti.+ 29  A babari fu den de leki di fu wan lew. Leki yongu lew+ den o bari te den e grabu a pipel disi leki wan meti èn te den e tyari den gowe. Nowan sma o man frulusu+ a pipel disi. 30  Iya, den o bari te den grabu a pipel disi. A babari fu den de leki a babari fu wan krasi se.+ Nanga opo mofo sma o luku fa a kondre de na ini bigi banawtu èn fa a kon dungru.+ Srefi a leti kon dungru, fu di alen e fadon.

Futuwortu

Hebrew wortu: syeol. Luku „Moro sani”, nr. 10.