Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Yesaya 40:1-31

40  „Trowstu, trowstu mi pipel”, na so a Gado fu unu taki.+  „Taki na wan switi fasi nanga Yerusalem.+ Taigi en taki en pinaten pasa+ èn taki a pai gi den sondu fu en.+ Yehovah strafu en nofo gi den sondu di a du.”+  Arki! Wan sma e bari na ini a sabana:+ „Un pipel, sreka a pasi fu Yehovah!+ Meki a bigi pasi di e pasa langalanga na ini a sabana gi wi Gado, kon reti.+  Meki ibri lagipresi kon hei.+ Meki ibri bergi nanga hei presi kon lagi.+ Ibri olo-olo presi musu kon grati èn ibri grofu pisi gron musu tron wan grati lagipresi.+  A glori fu Yehovah o kon na krin+ èn ala sma o si dati,+ bika na Yehovah srefi taki disi nanga en eigi mofo.”+  Arki! Wan sma e taki: „Bari!”+ Dan wan tra sma taki: „San mi musu bari?” „Bari taki ala libisma de leki grun grasi èn a bun-ati fu den de leki wan bromki di e gro na den weigron.+  A grun grasi nanga a bromki drei gowe,+ fu di Yehovah blo na den tapu.+ Iya, a pipel de leki grun grasi.+  A grun grasi nanga a bromki drei gowe,+ ma den sani di Gado taki e tan fu ala ten.”+  Ai uma di e tyari bun nyunsu gi Sion,+ kren go na tapu wan hei bergi.+ Ai uma di e tyari bun nyunsu gi Yerusalem,+ opo yu sten èn bari nanga ala yu krakti. Iya, bari bun tranga. No frede.+ Taigi den sma na ini den foto fu Yuda: „Un Gado de dya.”+ 10  Luku! A Moro Hei Masra Yehovah srefi o kon leki wan tranga fetiman èn en anu o tiri a kondre.+ Luku! A de klariklari fu pai sma+ èn fu gi den furu gudu.+ 11  Leki wan skapuman a o sorgu gi den skapu fu en.+ Nanga en anu a o tyari den pikin skapu kon na wán+ èn a o hori den na en borsusei te a e tyari den.+ Na wan lobi-ati fasi a o sorgu gi den pikin skapu di e dringi merki ete.+ 12  Suma man hori ala a watra fu den se na ini en anu?+ Suma man marki heri hemel+ na mindri en doin nanga en pikin finga? Suma man marki a finifini doti na grontapu nanga wan kan?+ Suma man wegi den bigi bergi nanga den pikin bergi? 13  Suma man frustan o bigi a yeye fu Yehovah de? Suma man gi en rai? Suma man leri en wan sani?+ 14  Na suma a go aksi rai fu man frustan sani moro bun? Suma leri en san na retidu? Suma gi en leri fu sabi sani?+ Suma sori en san na trutru koni?+ 15  Luku! Den pipel de leki wan dropu watra na ini wan emre. A e si den leki a finifini doti di de na tapu wan wegi.+ Luku! A e opo den tabiki+ neleki den de finifini doti nomo. 16  Srefi den bon fu Libanon no sari fu meki wan faya èn den busimeti drape+ no nofo fu gebroiki leki bron-ofrandi.+ 17  Nowan pipel prenspari gi en.+ A e si den leki noti. Gi en den de soso sani.+ 18  Nanga suma unu kan teki Gado gersi?+ Unu kan taki dati a gersi wan sani di unu sabi?+ 19  Wan smeti e smèlter sani soleki isri fu meki wan popki,+ dan a e tapu en nanga gowtu+ èn a e poti solfru keti gi en.+ 20  Son sma e suku spesrutu udu fu wan bon di no e pori makriki.+ Dan den e suku wan man di sabi wroko nanga udu èn den e taigi en fu meki wan steifi popki+ nanga na udu fu a bon. 21  Na sabi unu no sabi disi? Noiti unu ben yere fu disi? Nowan sma ben taigi unu disi sensi ten? Sensi den fondamenti fu grontapu seti te now ete unu no man kisi frustan?+ 22  Gado e tan na tapusei fu a lontu grontapu+ pe den libisma de leki sprenka. A e bradi hemel leki wan fini krosi èn leki wan tenti pe sma kan tan.+ 23  A e meki den heihei man tron noti. Gi en den krutuman fu grontapu na soso sani.+ 24  Noiti wan sma prani den. Noiti wan sma sai den. Noiti a tompu fu den teki rutu na ini a doti.+ Na blo wan sma abi fu blo na den tapu nomo, dan den e drei gowe kaba.+ Leki drei grasi wan bigi winti o wai den gowe.+ 25  „Ma nanga suma unu ben o teki mi gersi, so taki a ben sa kari mi en speri?”, na so a Santawan taki.+ 26  „Opo un ede èn luku go na loktu. Suma meki ala den sani dati?+ Na a sma di e tiri den leki wan legre. A sabi omeni de èn a e kari den na den nen srefi.+ Fu di a krakti fu en bigi srefisrefi+ èn fu di a abi furu makti, meki nowan fu den e mankeri. 27  Ai Yakob, ai Israel, fu san ede yu e taki nanga wan tranga sten: ’Yehovah no man si san mi e du.+ Noiti mi Gado o strafu mi fu san mi e du’?+ 28  Na sabi unu no sabi disi? Noiti unu ben yere fu disi?+ Yehovah, a Mekiman fu den moro farawe pisi fu grontapu, na wan Gado di e tan fu ala ten.+ Noiti a e weri+ èn noiti a e lasi krakti. Nowan sma kan frustan den sani di a sabi.+ 29  Te wan sma weri a e gi en krakti,+ èn te wan sma no abi krakti+ a e meki en kon tranga srefisrefi. 30  Den boi o kon weri èn den o lasi krakti, èn den yonkuman o stotu den futu, 31  ma den wan di e frutrow+ na tapu Yehovah o kisi krakti baka.+ Den o frei hei neleki den abi frei fu aka.+ Den o lon, ma den no o kon weri. Den o waka, ma den no o lasi krakti.”+

Futuwortu