Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Yesaya 3:1-26

3  Luku! A tru Masra,+ Yehovah di e tiri den legre, o puru ala a yepi fu Yerusalem+ nanga Yuda. Iya, a o puru ala brede, ala watra,+  ala den tranga man nanga fetiman, ala den krutuman nanga profeiti,+ ala den lukuman nanga owru man,+  ala den edeman fu feifitenti sma+ nanga den lespeki heihei man, ala den raiman nanga den man di sabi bonu èn di sabi wisi trawan.+  Mi o meki yonkuman tron granman fu den, èn den o tiri den soleki fa den wani.+  Ala sma o libi na wan ogri-ati fasi nanga makandra, iya, ibriwan fu den o du dati. Den o rigeri nanga makandra.+ Boi o rigeri nanga owru man,+ èn den wisiwasi man o rigeri nanga den lespeki man.+  Ibriwan fu den o hori en brada na ini na oso fu en papa, dan a o taki: „Yu abi wan dyakti. Yu musu tron wi tiriman.+ Na yu musu tiri a brokopresi disi.”  Na a dei dati a brada o taki krin: „Mi no o tron wan sma di e dresi soro. Mi no abi nowan brede noso dyakti na ini mi oso. Un no musu poti mi leki tiriman fu tiri a pipel.”  Yerusalem stotu en futu èn Yuda fadon,+ fu di den taki èn du sani di Yehovah no lobi kwetikweti.+ Iya, den opo densrefi na fesi a wan di abi bigi glori.+  Na den fesi a de fu si kaba taki den du ogri.+ Den e taki fa den du sondu leki den sma fu Sodom.+ Den no e kibri dati srefi. Helu fu den! Bika den srefi tyari rampu kon na den tapu.+ 10  Taigi den reti-ati sma taki sani o waka bun gi den.+ Den o kisi pai fu den sani di den du.+ 11  Helu fu den ogri sma! Rampu o miti den. Den sani di den du nanga tra sma, na dati o pasa nanga den!+ 12  Mi pipel abi basi di e kwinsi den èn srefi umasma e tiri den.+ Ke mi pipel, luku fa den fesiman fu unu meki unu wakawaka lontu fu soso.+ Den meki unu lasi pasi.+ 13  Yehovah e seti ensrefi fu go feti èn a e opo fu krutu den pipel.+ 14  Yehovah srefi o krutu den owru man nanga den granman fu a pipel.+ „Na unu bron a droifidyari. Den sani di sma ben fufuru fu den mofinawan, de na ini un oso.+ 15  Fu san ede unu e masi mi pipel èn fu san ede unu e pina den mofinawan?”,+ na so a Moro Hei Masra Yehovah di e tiri den legre taki. 16  Yehovah taki: „Den umapikin fu Sion kisi heimemre. Te den e waka, den e langa den neki èn den e meki moi ai gi sma. Den e waka na wan prodo fasi. Te den e waka, den futuketi fu den e meki tyengelen-tyengelen.+ 17  Yehovah o meki krasikrasi+ kon na tapu na ede fu den umapikin fu Sion èn Yehovah o meki den ede piri.+ 18  Na a ten dati Yehovah o puru den moimoi sani fu den. A o puru den futuketi, den edebanti, den moimoi sani di gersi munkenki,+ 19  den yesilinga, den bui di den e weri na den anu, den moi duku,+ 20  den moi sani di den e weri na den ede, den bui di den e weri na den futu, den berebanti,+ den switismeri-batra, den tapu fu den,+ 21  den fingalinga, den nosolinga,+ 22  den fesakrosi, den langa krosi di den e weri leki dyakti, den dyakti, den moi monisaka, 23  den pikin spikri,+ den ondrokrosi, den tai-ede,+ nanga den moi bigi duku di den e gebroiki fu tapu densrefi.+ 24  Na presi taki den o smeri switi leki balsem-oli,+ den o smeri bukubuku. Na presi fu wan berebanti, den o abi wan titei na den mindribere. Na presi fu abi wiwiri di seti kon moi, den ede o piri.+ Na presi fu weri moi krosi, den o weri rowkrosi.+ Na presi taki den abi moi skin, den o abi bronmarki*+ na den skin. 25  Nanga feti-owru sma o kiri den man fu a foto, èn den tranga man o dede na ini feti.+ 26  Soso sari o de na den portu fu a foto, iya, a foto o de na row+ trutru. A o de leki wan uma di sma teki ala gudu fu en èn di e sidon na gron.”+

Futuwortu

Disi na bronmarki di e sori taki wan sma na wan srafu noso katiboman.