Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Yesaya 23:1-18

23  Disi na wan krutuboskopu gi Tirus:+ Bari krei, un man di de na tapu den sipi fu Tarsis!+ Na wan ogri-ati fasi sma teki ala den gudu fu Tarsis tyari gowe. Nowan lanpe de moro èn nowan presi de pe sipi man kon na ini a kondre.+ Na Kitim,+ sma taigi den a boskopu disi.  Un sma di e tan na a sesyoro, tapu un mofo. Den bisnisman fu Sidon+ di e abra a se, furu un kondre nanga gudu.  Den tyari na aleisi fu Sihor+ nanga den sani di den koti na Nijl-liba abra furu watra. Dan den seri den sani dati fu meki bigi moni èn furu kondre e kisi wini fu dati.+  Yu musu syen, Sidon,+ bika a se, iya, a fortresi fu a se, taki: „Noiti mi ben abi a pen fu wan uma di e meki wan pikin. Noiti mi meki pikin. Noiti mi kweki wan manpikin noso wan umapikin.”+  Te sma yere san pasa nanga Tirus,+ den o skreki srefisrefi neleki di den yere san pasa nanga Egepte.+  Un abra a se go na Tarsis. Un sma di e tan na a sesyoro, bari krei.  A no a foto disi na un foto di ben e meki prisiri sensi owruten, sensi a bigin? En futu ben tyari en go farawe fu go tan na ini wan kondre di no de fu en.  Tirus na a wan di e poti sma leki kownu. Den bisnisman fu en na granman nanga heihei man na grontapu.+ Sobun, suma prefuru fu bosroiti+ taki a musu kisi pori?  Na Yehovah di e tiri den legre bosroiti disi,+ fu di a o meki a bigifasi nanga a glori+ fu en tron noti. A o wisiwasi ala den heihei man fu grontapu.+ 10  Ai umapikin fu Tarsis,+ yu musu pasa go na ini a heri kondre neleki a watra fu Nijl-liba. Nowan presi de moro gi den sipi fu tan.+ 11  Gado langa en anu na tapu a se. A meki kownukondre kon bruya.+ Yehovah srefi gi a komando fu pori den fortresi+ fu Fenisia. 12  A taki: „Ai umapikin fu Sidon,+ ai nyunwenke di den kwinsi, noiti moro yu musu bari fu prisiri.+ Opo, dan yu abra go na Kitim.+ Ma drape srefi yu no o feni rostu.” 13  Luku a kondre fu den Kaldeyasma.+ A no Asiria,+ ma na a pipel disi meki Tirus tron wan tanpe gi den meti di e libi na ini a sabana.+ Den meki fetiwagi fu broko den toren fu en pe sma e tan.+ Den meki a tron wan brokopresi.+ 14  Bari krei, un man di de na tapu den sipi fu Tarsis, bika den pori a fortresi fu unu.+ 15  Na a ten dati te wán kownu o tiri, sma no o prakseri Tirus seibitenti yari+ langa. Na a kaba fu den seibitenti yari Tirus o tron leki a huru-uma na ini a singi disi: 16  „Ai huru-uma di sma no e luku nanga wan ai,+ teki wan harpu, dan yu waka lontu na ini a foto. Meki muiti fu prei yu harpu èn singi furu singi, meki den poti prakseri na yu baka.” 17  Na a kaba fu den seibitenti yari Yehovah o poti prakseri na Tirus. Dan Tirus o du leki wan huru-uma baka,+ bika a o huru nanga ala kownukondre fu grontapu+ èn den o pai en fu a huru di a e huru. 18  A moni nanga den tra sani di a kisi fu a huru di a e huru+ o tron santa sani gi Yehovah. A no o poti den sani dati na wan sei èn a no o kibri den, bika den o kon de fu den sma di e tan na fesi Yehovah.+ Den o gebroiki den sani dati fu bai nyanyan fu nyan den bere furu èn fu bai moi krosi fu weri.+

Futuwortu