Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Yesaya 22:1-25

22  Disi na wan krutuboskopu gi a lagipresi fu a fisyun:+ San pasa nanga unu? Fu san ede un alamala go na tapu den daki?+  Furu babari nanga dyugudyugu ben de na ini un foto èn unu ben lobi meki prisiri.+ Sma dede na un mindri, ma a no feti-owru noso feti kiri den.+  Ala den ogri-ati tiriman fu unu+ lowe gowe.+ Sondro wan bo sma tyari den go na ini katibo. Ala sma fu unu di den feni, den teki leki katiboman.+ Den ben lon gowe farawe.  Dati meki mi taki: „No luku mi moro. Meki mi krei.+ Mi de nanga bigi sari, fu di ogri-ati sani miti mi pipel.+ Nowan sma musu suku fu trowstu mi.  Bika na a Moro Hei Masra Yehovah di e tiri den legre, tyari a dei disi fu bruya,+ pori,+ nanga dyugudyugu+ kon na ini a lagipresi fu a fisyun. Wan sma o naki a skotu broko+ èn sma o bari na den bergi.+  Elam+ teki en peirikokro di a ben de na ini en fetiwagi, èn Kir+ teki en skelt.  Soso fetiwagi o de na den moro moi lagipresi fu unu èn den asi o de srekasreka na den portu.  Dan wan sma o puru a garden di e kibri Yuda. Na a dei dati unu o luku den fetisani+ di de na ini na oso di nen Libanon-busi.+  Unu o si den olo na ini den skotu fu a Foto fu David, fu di furu olo o de.+ Unu o kibri watra na ini a lagi peti.+ 10  Unu o teri den oso fu Yerusalem. Boiti dati, unu o broko den oso na pisipisi èn unu o gebroiki den pisi fu meki a skotu+ kon moro tranga. 11  Un musu meki wan peti na mindri tu skotu, so taki a watra fu na owru peti+ kan go drape. Unu no o suku a Gran Mekiman fu en èn unu no o si a sma di meki en langa ten kaba. 12  Na a ten dati a Moro Hei+ Masra Yehovah di e tiri den legre, o taigi sma fu krei,+ fu sari, fu krebi den ede èn fu weri rowkrosi.+ 13  Ma na presi fu dati den sma breiti èn den e meki prisiri. Den e srakti kaw nanga skapu, den e nyan meti èn den e dringi win.+ Den e taki: ’Meki wi nyan èn meki wi dringi, bika tamara wi o dede.’”+ 14  Yehovah di e tiri den legre taigi mi:+ „’Unu no o kisi pardon fu a sondu disi,+ teleki unu dede’,+ na so a Moro Hei Masra Yehovah di e tiri den legre taki.” 15  Disi na san a Moro Hei Masra Yehovah di e tiri den legre taki: „Go na Sebna,+ a man di abi a frantwortu fu luku na oso fu Kownu,+ èn taigi en: 16  ’San yu e suku dya? Yu abi famiri dyaso, di yu e meki wan grebi gi yusrefi dyaso?’ Na wan hei presi Sebna e meki wan grebi+ gi ensrefi. Na ini wan stonbergi a e koti wan olo fu sma beri en drape. 17  ’Ai yu tranga man, na wan ogri-ati fasi Yehovah grabu yu èn a trowe yu na gron. 18  A o lolo yu meki yu tron leki wan bal di sma e trowe na ini wan opo presi. Na drape yu o dede èn den kefalek asiwagi fu yu o de wan syen sani gi na oso fu yu masra. 19  Mi o puru a frantwortu di yu abi èn wan sma o puru yu na a prenspari wroko fu yu.+ 20  Na a ten dati mi o kari mi futuboi+ Eliakim+ di de a manpikin fu Helkia.+ 21  Mi o weri a langa krosi fu yu gi en èn mi o tai yu berebanti steifi na en mindri.+ Mi o meki en tiri a presi pe yu ben e tiri. A o tron wan papa gi den sma di e tan na Yerusalem èn gi den sma fu Yuda.+ 22  Mi o poti a sroto+ fu na oso fu David na tapu en skowru. Te a opo wan doro nowan sma o tapu en èn te a tapu wan doro nowan sma o opo en.+ 23  A o tron leki wan kefalek moi kownusturu na ini na oso fu en papa.+ Mi o fasi en leki wan spikri+ na wan tranga presi. 24  Na en sma o anga ala den moi sani fu en papa oso, dati na ala pikin batra, ala komki, nanga ala bigi watrakan. Den sani disi na den pikin nanga den bakapikin. 25  Na a ten dati’, na so Yehovah di e tiri den legre taki, ’mi o puru na aka di mi poti na a tranga presi.+ Mi o koti en puru èn a o fadon. Ala den sani di ben e anga na en o fadon broko. Yehovah srefi taki so.’”+

Futuwortu