Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Yeremia 9:1-26

9  Mi winsi taki mi ede ben tron wan peti di furu nanga watra, so taki mi ai ben o lon watra doronomo!+ Dan mi ben o krei dei nanga neti, fu di den kiri den sma fu mi pipel.+  Mi winsi taki mi ben abi wan presi na ini a sabana pe sma kan yuru kamra!+ Dan mi ben o gowe libi mi pipel èn mi ben o go farawe fu den, bika den alamala na sutaman.+ Den na wan grupu bedrigiman.+  Neleki wan bo den seti den tongo fu taki soso lei.+ Den kisi makti na ini a kondre, ma no fu di den du san bun. „Den e du a wan ogri baka a trawan, èn den no e poti prakseri na mi srefisrefi”,+ na so Yehovah taki.  „Luku bun nanga den mati fu unu+ èn no frutrow nowan brada fu unu.+ Bika ibri sma wani puru en brada na pasi,+ èn ibri sma e taki ogri-ati+ lei fu en mati.  Ibri sma e spotu en mati+ èn den e taki nowan sani di tru. Den leri densrefi fu taki soso lei.+ Den du ogri teleki den kon weri.+  Unu e sidon na ini bedrigifasi.+ Den e lei èn den no wani sabi mi”,+ na so Yehovah taki.  Fu dati ede Yehovah di e tiri den legre taki: „Mi o smèlter den fu puru a doti na den mindri. Mi musu luku den finifini.+ Fa mi o man yepi mi pipel efu mi no e du dati?+  A tongo fu den de leki wan peiri di e kiri sma.+ Soso lei den e taki. Den e taigi trawan sani di bun, ma na ini den ati den wani du den ogri.”+  Yehovah taki: „Mi no musu aksi den frantwortu dan fu den sani di den du? Mi no musu puru atibron na tapu a pipel di e du den sani disi?”+ 10  Mi o bari krei te mi si san pasa nanga den bergi,+ èn mi o singi wan sari singi te mi si san pasa nanga den weigron di de na ini a sabana. Sma o bron den,+ nowan sma o waka na ini den, èn nowan babari fu meti di den e kweki drape, o de fu yere.+ Ala den fowru di e frei na loktu nanga den tra meti lowe. Den alamala gowe.+ 11  Mi o meki Yerusalem tron wan ipi ston+ èn wan tanpe gi sabanadagu.+ Mi o meki den foto fu Yuda tron brokopresi pe nowan sma e tan.+ 12  Suma abi a koni fu man frustan san Yehovah taki, so taki a kan fruteri dati na trawan?+ Fu san ede a kondre musu kisi pori, èn fu san ede a musu kon drei leki wan sabana pe nowan sma e waka?”+ 13  Dan Yehovah taki: „Den sani disi pasa fu di den no gi yesi na a wèt di mi ben gi den, den no arki mi, èn den no hori a wèt fu mi.+ 14  Ma den tan du nomo san a takru ati fu den wani.+ Den ben anbegi den Bâal-popki+ soleki fa den bigisma fu den leri den.+ 15  Fu dati ede Yehovah di e tiri den legre, a Gado fu Israel, taki: ’Mi o meki a pipel disi nyan fu wan bita bon,+ èn mi o meki den dringi watra di abi vergif na ini.+ 16  Mi o panya den na mindri pipel di den nanga den bigisma fu den no sabi.+ Mi o seni wan feti-owru na den baka teleki mi kiri den alamala.’+ 17  Yehovah di e tiri den legre taki: ’Un pipel, un musu tyari unsrefi na wan koni fasi. Kari den uma kon fu singi sari singi.+ Iya, kari den uma di sabi singi den sari singi, meki den kon.+ 18  Meki den kon esi-esi fu singi sari singi gi wi èn fu bari krei. Dan wi ai musu lon watra, iya, watra musu komoto na den brenki ai fu wi.+ 19  Na ini Sion sma e bari krei.+ Den e taki: „Luku fa den fufuru ala sani fu wi!+ Wi firi bigi syen! Wi gowe libi a kondre, èn den pori den tanpresi fu wi.”+ 20  Un uma, arki san Yehovah e taki. Poti yesi arki en. Dan un musu leri un umapikin fa fu singi den sari singi.+ Meki ibri uma leri wan trawan den sari singi.+ 21  Bika dede pasa a fensre kon na ini wi oso èn na ini den toren pe wi e tan. A o kiri den pikin na strati èn den yonkuman na den pren.’+ 22  Taigi den: ’Disi na san Yehovah taki: „Den dedeskin fu den sma o fadon na gron. Den o tron leki mèst èn leki na aleisi di sma koti. Nowan sma o de fu piki den.”’”+ 23  Yehovah taki: „Den koniman no musu meki bigi fu di den koni.+ Den wan di abi makti no musu meki bigi fu di den abi makti.+ Den guduman no musu meki bigi fu di den abi so furu gudu.”+ 24  „Ma efu wan sma wani meki bigi, dan meki a du dati fu di a abi koni+ èn fu di a sabi mi. A sabi taki mi, Yehovah,+ na a sma di e sori sma bun-ati, a sma di e krutu sani na wan reti fasi, èn a sma di e du san reti na grontapu.+ Na den sani disi mi lobi”,+ na so Yehovah taki. 25  Yehovah taki: „Wan ten o kon te mi o krutu ala den sma di besnèi soso na den skin.+ 26  Mi o krutu Egepte,+ Yuda,+ Edom,+ den Amonsma,+ Moab,+ nanga ala sma di koti den wiwiri na den sei-ede èn di e tan na ini a sabana.+ Bika nowan fu den pipel disi besnèi, èn nowan fu den sma fu Israel krin den ati.”+

Futuwortu