Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Yeremia 6:1-30

6  Un sma fu Benyamin, komoto na ini Yerusalem, dan unu go suku kibri. Blo wan tutu+ na ini Tekowa.+ Meki wan faya na Bet-Hakerem+ fu warskow sma taki feanti e kon. Bika wan bigi rampu o kon fu noordsei.+  Na umapikin fu Sion ben gersi wan moi uma di abi wan bun libi.+  Den skapuman ben kon na en nanga den skapu fu den. Na drape den ben seti den tenti fu den lontu en.+ Ibriwan fu den ben abi wan presi pe den skapu fu en ben kan nyan.+  Den sreka densrefi fu go feti nanga en.+ Den taki: „Opo, kon meki wi go feti nanga en na mindridei!”+ „Na wan sari taki son e dongo èn a e kon dungru kaba!”  „Opo, kon meki wi go na en na neti fu broko den toren fu en pe sma e tan.”+  Yehovah di e tiri den legre taki: „Un koti udu,+ dan unu meki wan skotu lontu Yerusalem.+ A foto disi musu kisi strafu,+ fu di den sma drape e kwinsi makandra.+  Neleki fa wan watrabaki abi kowru watra, na so a foto disi abi ogridu. Den no e draidrai fu du ogri. Den e du soso ogri-ati sani èn den e fufuru na ini a foto.+ Mi e si soso siki nanga pina drape.  Yerusalem, yu musu teki leri,+ noso mi o tegu gi yu+ èn mi o meki yu tron wan brokopresi pe nowan sma e tan.”+  Yehovah di e tiri den legre taki: „Den Israelsma di tan abra de leki den lasti droifi na wan droifibon.+ Yu musu tyari den kon na wán neleki wan sma di e piki den lasti droifi poti na ini wan baskita.” 10  „Suma o arki mi te mi o taki nanga den èn te mi o warskow den? Den no man poti prakseri fu di den yesi tapu.+ Den e spotu nanga den sani di Yehovah taki,+ èn den no lobi den sani dati.+ 11  Mi kon furu nanga na atibron fu Yehovah. Mi kon weri fu hori en na inisei.”+ „Kanti en na tapu den pikin na strati+ èn na a srefi ten na tapu den yonkuman di kon makandra. Kanti en tu na tapu wan man nanga en wefi, èn na tapu den owru man èn den man di grani srefisrefi.+ 12  Dan tra sma o teki den oso fu den, èn na a srefi ten den o teki den gron nanga den uma fu den.+ Bika mi o langa mi anu fu naki den sma fu a kondre”, na so Yehovah taki.+ 13  „Den mofinawan nanga den bigiman fu a kondre, iya, den alamala e bedrigi sma fu kisi wini.+ Ibri profeiti nanga ibri priester srefi e kori sma.+ 14  Den e pruberi fu dresi a mankeri fu mi pipel, ma den no e dresi den bun.+ Den e taki nomo: ’Ala sani e go bun! Ala sani e go bun!’ Ma sani no e go bun srefisrefi.+ 15  Den ben syen di den du den tegu sani disi?+ Den no e syen kwetikweti. Boiti dati, den no sabi san na syen.+ Fu dati ede den srefi o fadon tu.+ Na a ten di mi o aksi den frantwortu, den o stotu den futu”, na so Yehovah taki. 16  Yehovah taki: „Un pipel, tan tanapu na den pasi èn luku lontu. Aksi pe den pasi fu owruten de. Aksi pe a bun pasi de,+ dan unu waka na en tapu.+ Efu unu e du dati, dan unu o abi wan bun libi.”+ Ma ibri tron baka a pipel taki: „Wi no o waka na tapu a pasi dati.”+ 17  „Mi ben seni waktiman+ fu taigi unu: ’Un poti prakseri na a babari fu a tutu!’”+ Ma ibri tron baka a pipel taki: „Wi no o poti prakseri.”+ 18  „Fu dati ede, meki ala pipel arki! Un alamala di kon makandra musu sabi san o pasa nanga den. 19  Meki grontapu arki! A denki+ fu a pipel disi o meki taki mi o tyari rampu kon na den tapu.+ Bika den no poti prakseri na san mi taki, èn den weigri fu hori mi wèt.”+ 20  „Fu san ede unu e tyari switismeri fu Skeiba+ èn fu wan farawe kondre kon gi mi? San mi abi fu du nanga dati? Mi no lobi den heri bron-ofrandi fu unu+ èn mi no e prisiri nanga den srakti-ofrandi fu unu.”+ 21  Fu dati ede Yehovah taki: „Mi o poti sani na tapu a pasi fu a pipel disi fu meki den fadon.+ Dan papa nanga manpikin èn ala tra sma nanga den mati fu den o fadon. Den alamala o dede.”+ 22  Yehovah taki: „Luku, wan pipel e kon fu a kondre fu noordsei. Na den moro farawe pisi fu grontapu+ wan bigi pipel o opo kon. 23  Den abi bo nanga lansri na ini den anu.+ Den na wan ogri-ati pipel di no e sari sma. A sten fu den de leki a babari fu a se,+ èn den e rèi na tapu asi.+ Leki wan legre den o kon fu feti nanga yu, umapikin fu Sion.”+ 24  Di wi yere a boskopu disi wi lasi-ati.+ Wi kon bruya èn wi firi pen leki wan uma di de fu meki wan pikin.+ 25  No go na den gron èn no waka na den pasi srefi. Bika den feanti de drape nanga den feti-owru fu den èn na ala sei sma e frede.+ 26  Ai mi pipel, weri rowkrosi+ èn lolo na ini asisi.+ Row neleki yu lasi yu wan-enkri manpikin èn bari krei fu di yu e sari srefisrefi,+ bika wantronso den feanti o kon na wi tapu fu du wi ogri.+ 27  „Mi meki yu tron leki wan sma di e puru doti na ini solfru, bika yu o abi fu krin mi pipel. Yu musu poti prakseri na den èn luku finifini san den e du.+ 28  Den alamala na den moro tranga-ede sma+ di de. Den e waka lontu e taki ogri-ati lei.+ Den de leki kopro nanga isri èn den alamala e du kruktudu.+ 29  Wan sma e du so furu muiti fu krin den, taki den wrokosani fu en bron srefi.+ Ma na fu soso a e pruberi fu krin den, bika den alamala ogri.+ Soso loto e komoto na ini a faya.+ 30  Sma o taki dati den na solfru di no warti noti,+ fu di Yehovah trowe den.”+

Futuwortu