Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Yeremia 43:1-13

43  Na so Yeremia taigi ala den sma san den Gado Yehovah ben taki. Di a kaba taki ala san den Gado Yehovah ben seni en fu taki,+  dan Asaria, a manpikin fu Hosaya,+ Yohanan,+ a manpikin fu Kareya, nanga ala den heimemre man+ taigi Yeremia: „Na lei yu e lei.+ Yehovah wi Gado no seni yu fu taki: ’Un no musu go tan na Egepte.’+  Na Baruk,+ a manpikin fu Neria, meki yu taki den sani disi, fu di a wani taki den Kaldeyasma kisi wi, so taki den kan kiri wi, noso tyari wi go na ini katibo na Babilon.”+  Yohanan, a manpikin fu Kareya, ala den legre-edeman, nanga ala den tra sma no ben wani tan na Yuda soleki fa Yehovah ben taki.+  Den sma fu Yuda di ben de na libi ete ben komoto na ala den presi pe den ben e tan fu kon libi gi wan pisi ten baka na Yuda.+ Ma Yohanan, a manpikin fu Kareya, nanga ala den legre-edeman tyari den sma disi go na Egepte.  Na ini a grupu disi yu ben abi man, uma, pikin, nanga den umapikin fu a kownu.+ Yu ben abi den sma tu di Nebusaradan,+ na edeman fu den waktiman, ben tyari go na Gedalia+ di ben de a manpikin fu Ahikam+ èn a granpikin fu Safan.+ Profeiti Yeremia nanga Baruk,+ a manpikin fu Neria, ben de na ini a grupu disi tu.  Na so den kon doro na Egepte,+ fu di den no arki Yehovah. Te fu kaba den doro te na Takpankes.+  Drape na Takpankes Yehovah taigi Yeremia:  „Teki wan tu bigi ston, dan yu go kibri den na a ston balkon di de na a doro fu na oso fu a kownu fu Egepte na Takpankes. Meki den Dyu man luku te yu e du disi.+ 10  Dan yu musu taigi den: ’Yehovah di e tiri den legre, a Gado fu Israel, taki: „Mi o seni mi futuboi+ Kownu Nebukadresar fu Babilon kon.+ Mi o poti en kownusturu leti dyaso na tapu den ston di mi kibri èn a o bradi en moi tenti na den tapu. 11  A o kon feti nanga Egepte.+ Den wan di musu kisi wan takru siki, o kisi wan takru siki. Den wan di musu go na ini katibo, o go na ini katibo. Den wan di musu dede nanga feti-owru, o dede nanga feti-owru.+ 12  Mi o sutu faya gi den oso fu den gado fu Egepte.+ A kownu o bron den èn a o tyari den go na ini katibo. Gi en, Egepte o de leki a duku di wan skapuman e domru ensrefi na ini.+ A o teki a kondre abra, dan a o gowe. 13  A o broko den pilari fu Bet-Seimes na Egepte èn a o bron den oso fu den gado fu Egepte nanga faya.”’”

Futuwortu