Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Yeremia 34:1-22

34  Kownu Nebukadresar fu Babilon+ go feti nanga Yerusalem èn nanga ala den foto lontu Yerusalem.+ A go nanga ala den srudati fu en+ èn nanga ala den kownukondre nanga pipel di a ben tiri.+ Na a ten dati Yehovah taki nanga Yeremia. A taki:  „Disi na san Yehovah, a Gado fu Israel, taki: ’Go taigi Kownu Sedekia fu Yuda:+ „Yehovah taki: ’Mi o meki a kownu fu Babilon teki a foto disi abra,+ èn a musu bron en nanga faya.+  Yu no o man lowe gi en, bika sma o grabu yu èn den o tyari yu go na en.+ Nanga yu eigi ai yu o si a kownu fu Babilon,+ èn ensrefi o taki nanga yu. Iya, yu o abi fu go na Babilon.’  Ma Yehovah taki fu yu, Kownu Sedekia fu Yuda:+ ’Disi na san Yehovah taki fu yu: „Sma no o kiri yu nanga feti-owru.  Ma yu o libi go doro teleki yu dede.+ Dan sma o bron switismeri+ gi yu neleki fa den ben du gi den afo fu yu, sobun den kownu di ben de fosi yu.+ Te den o row gi yu,+ den o taki: ’Ke masra!’+ Yehovah taki: ’Na so sani o pasa, bika na mi taki so.’”’”’”  Sobun, a profeiti Yeremia taigi Kownu Sedekia fu Yuda ala den sani disi+ na ini Yerusalem  di den srudati fu a kownu fu Babilon ben feti nanga Yerusalem èn nanga ala den tra foto fu Yuda.+ Fu di son foto fu Yuda, soleki Lakis+ nanga Aseka+ ben tranga,+ meki den no ben man wini den ete.+  Yehovah taki nanga Yeremia, baka di Kownu Sedekia meki wan frubontu nanga ala den sma di ben de na ini Yerusalem. A frubontu ben o meki den srafu kon fri.+  Ibriwan sma ben o meki den Hebrew+ man nanga uma di ben wroko leki srafu gi en, kon fri. Den no ben o meki den Dyu, sobun, den eigi kondreman, wroko leki srafu gi den moro.+ 10  Sobun, ala den granman+ nanga ala den sma di ben meki a frubontu, fri den man nanga uma di ben wroko leki srafu gi den. Den no meki den sma disi wroko gi den moro. Na so den gi yesi na a kownu èn den seni den gowe.+ 11  Ma bakaten+ den go teki den man nanga uma di den ben seni gowe, èn den meki den wroko baka leki srafu gi den.+ 12  Dati meki Yehovah gi Yeremia ete wan boskopu. Yehovah taki: 13  „Yehovah, a Gado fu Israel, taki: ’Di mi tyari den afo fu unu komoto na a kondre Egepte+ pe den ben de srafu,+ mi meki wan frubontu nanga den.+ Mi taigi den: 14  „Na a kaba fu ibri seibi yari ibri sma musu fri en kondreman.+ Iya, un musu seni a Hebrew man+ gowe di unu ben bai+ èn di ben wroko gi unu siksi yari langa.” Ma den afo fu unu ben trangayesi mi èn den no ben arki mi.+ 15  Unu ben de tra fasi èn unu ben du san mi feni bun. Na a oso pe sma e kari mi nen,+ unu meki wan frubontu na mi fesi,+ èn ibriwan fu unu taigi un kondreman taki den fri. 16  Toku unu kenki prakseri baka+ èn unu pori mi nen.+ Ibriwan fu unu go teki den man nanga uma baka di ben wroko leki srafu gi unu, aladi den ben wani de fri. Unu dwengi den fu wroko leki srafu gi unu baka.’+ 17  Dati meki Yehovah taki: ’Unu trangayesi mi. Nowan fu unu meki en kondreman fri.+ Fu dati ede mi o meki unu kon fri te feti-owru,+ siki,+ nanga angri+ kiri unu.+ Mi o meki ala den kownukondre fu grontapu beifi te den si san mi du nanga unu’,+ na so Yehovah taki. 18  Den man di no hori mi frubontu,+ mi o libi gi den feanti. Di den ben meki a frubontu nanga mi, den ben koti wan pikin kaw na tu+ èn den waka na mindri den tu pisi.+ Ma toku den no du san a frubontu taki. 19  Iya, den granman fu Yuda nanga Yerusalem,+ den heihei man, den priester, nanga ala den sma fu a kondre di waka na mindri den tu pisi fu a pikin kaw, 20  mi o libi gi den feanti èn gi den sma di wani kiri den.+ Den busimeti èn den meti di e frei o nyan den dedeskin fu den.+ 21  Mi o libi Kownu Sedekia fu Yuda+ nanga den granman fu en gi den feanti, gi den sma di wani kiri den, èn gi a legre fu a kownu fu Babilon+ di hari gowe fu unu.’+ 22  Yehovah taki: ’Luku, mi o gi den wan komando. Mi o tyari den kon baka na a foto disi+ fu feti nanga en. Den o teki en abra èn den o bron en nanga faya.+ Mi o meki den foto fu Yuda tron brokopresi pe nowan sma o tan.’”+

Futuwortu