Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Yeremia 24:1-10

24  Kownu Nebukadresar fu Babilon ben tyari Kownu Yekonya,+ a manpikin fu Yoyakim+ di ben e tiri Yuda, go na ini katibo na Babilon. Boiti en, a ben tyari den granman fu Yuda nanga den sma fu Yerusalem di ben abi a koni fu meki moimoi sani+ èn di ben sabi meki bigi skotu, go na ini katibo tu.+ Bakaten Yehovah sori mi tu baskita nanga figa di ben de na fesi a tempel fu Yehovah.  A wan baskita ben abi figa di bun srefisrefi, neleki den fosi figa fu wan figabon.+ A tra baskita ben abi pori figa. Den no ben bun fu nyan.  Ne Yehovah aksi mi: „San yu e si, Yeremia?” Mi piki: „Mi e si figa, figa di bun srefisrefi nanga pori figa di no bun fu nyan.”+  Dan Yehovah taigi mi:  „Disi na san mi, Yehovah, a Gado fu Israel, taki: ’Mi e si den katiboman fu Yuda leki den bun figa. Mi ben meki den komoto na a presi disi fu tron katiboman na a kondre fu den Kaldeyasma.+ Ma mi o du bun gi den.+  Mi o luku den baka èn mi o du bun gi den.+ Mi o meki den drai kon baka na a kondre disi.+ Mi no o broko den, ma mi o bow den. Mi no o rutu den puru, ma mi o prani den.+  Mi o gi den wan ati di sabi mi,+ so taki den o sabi taki mi na Yehovah. Dan den o tron mi pipel+ èn mi o tron den Gado, bika den o drai kon baka na mi nanga den heri ati.+  Fu den pori figa di no bun fu nyan,+ Yehovah taki: „Kownu Sedekia+ fu Yuda, den granman fu en, den sma fu Yerusalem di tan abra na ini a kondre disi,+ nanga den sma di e tan na Egepte,+ de leki den figa disi.  Mi o meki so wan bigi rampu miti den, taki ala den kownukondre o beifi te den si san pasa nanga den.+ Sma o kosi den, sma o koti odo gi den, sma o spotu+ den, èn sma o fluku+ den na ala den presi pe mi o yagi den go.+ 10  Den alamala o dede gowe na ini a kondre di mi gi den nanga den afo fu den,+ fu di mi o meki feti-owru,+ angri,+ nanga siki+ kiri den.”’”

Futuwortu