Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Yeremia 16:1-21

16  Baka dati Yehovah taigi mi:  „Yu no musu teki wan wefi, èn yu no musu kisi manpikin nanga umapikin na a presi disi.+  Bika Yehovah taki wan sani fu den manpikin nanga den umapikin di gebore na a presi disi, èn fu den mama nanga papa di abi pikin na ini a kondre disi.+ A taki:  ’Siki o kiri den.+ Nowan sma o row gi den,+ èn nowan sma o beri den.+ Den o tron leki mèst na tapu a gron,+ sma o kiri den nanga feti-owru, èn den o dede fu angri.+ Den dedeskin fu den o tron nyanyan gi den meti di e frei na loktu èn gi den busimeti.’+  Disi na san Yehovah taki: ’No go na ini na oso pe den e hori row-fesa. No krei nanga den, èn no sari den.’+ Yehovah taki: ’Mi no o meki sani waka bun gi a pipel disi moro. Mi no o sori den bun-ati nanga sari-ati.+  Den alamala o dede. Iya, den pikinwan nanga den bigiwan o dede na ini a kondre disi. Sma no o beri den.+ Sma no o naki na tapu den borsu, den no o koti den skin,+ èn den no o krebi den ede+ fu sori taki den e row gi den.  Den no o gi den sma di e row gi den dedewan, nyanyan fu trowstu den.+ Den no o gi den sma di e row gi den papa nanga mama, wan sani fu dringi fu trowstu den.+  Yu no musu go na ini nowan oso pe fesa e hori, èn yu no musu go sidon nanga den fu nyan èn dringi.’+  Bika Yehovah di e tiri den legre, a Gado fu Israel, taki: ’Mi o meki unu si taki nowan sma na ini a presi disi o prisiri. Na ini un heri libi unu no o yere wan prisiri babari, a sten fu wan trowmasra, noso a sten fu wan trowmisi.’+ 10  Te yu taigi a pipel disi ala den sani disi, den o aksi yu: ’Fu san ede Yehovah taki dati so wan bigi rampu o miti wi? Sortu ogri noso sondu wi du teige Yehovah wi Gado?’+ 11  Dan yu musu taigi den: ’Yehovah taki: „A rampu disi o miti unu, fu di un afo gowe libi mi.+ Den go waka baka tra gado, den dini den, èn den boigi gi den.+ Iya, den gowe libi mi èn den no hori mi wèt.+ 12  Ma unu du moro ogri leki un afo.+ Ibriwan fu unu e du san en ogri ati wani,+ na presi fu gi yesi na mi.+ 13  Mi o fringi unu puru na ini a kondre disi,+ dan unu o abi fu go na ini wan kondre di unu nanga den afo fu unu no ben sabi.+ Drape unu o abi fu dini tra gado+ dei nanga neti, bika mi no o du unu nowan bun.”’ 14  Yehovah taki: ’Wan ten o kon+ te sma no o taki moro: „Mi e sweri na a libi fu Yehovah di tyari den Israelsma komoto na a kondre Egepte!”+ 15  Na presi fu dati den o taki: „Mi e sweri na a libi fu Yehovah di tyari den Israelsma komoto na a kondre fu noordsei èn na ala den kondre pe a ben yagi den go!” Mi o tyari den kon baka na a kondre fu den di mi ben pramisi den afo fu den.’+ 16  Yehovah taki: ’Luku, mi o seni furu fisiman fu go fanga den leki fisi. Dan mi o seni furu ontiman+ fu go onti den na ibri bergi, na ibri pikin bergi, èn na ini ibri bergi-olo.+ 17  Bika mi e si ala den sani di den e du. Den no kibri gi mi. Mi eigi ai si ala ogri di den e du.+ 18  A fosi sani di mi o du, na fu pai den gi ala den ogri+ nanga den sondu di den du. Den pori mi kondre.+ Den furu mi kondre nanga den popki fu den fisti èn morsu gado fu den.’”+ 19  Yehovah, yu na mi krakti èn mi fortresi. Yu na a presi pe mi e lon go te mi de na ini banawtu.+ Na yu den pipel fu den moro farawe presi fu grontapu o kon.+ Dan den o taki: „Fu tru, den afo fu wi ben abi falsi gado di no warti noti.+ Den no ben feni nowan wini fu den.”+ 20  Libisma e meki gado, ma den gado dati na noti.+ 21  „Fu dati ede mi o meki den kon sabi mi. Disi leisi den o si san mi anu man du èn omeni krakti mi abi.+ Den sa musu sabi taki mi nen na Yehovah.”+

Futuwortu