Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Yakobus 3:1-18

3  Mi brada, a no un alamala musu tron leriman,+ fu di unu sabi taki wi o kisi moro hebi krutu.+  Wi alamala e sondu* furu tron.+ Efu wan sma no e sondu nanga en mofo,+ dan a bun dorodoro+ èn a man basi en heri skin tu.  Efu wi e tai titei+ na a mofo fu asi, so taki den kan du san wi wani,+ dan wi e tiri den heri skin tu.  Luku den boto sosrefi. Aladi den bigi so èn tranga winti e tyari den, toku wan sma e tyari a boto go pe a wani nanga wan pikin pari di fasi na bakasei fu a boto.+  Na so a de tu nanga a tongo. A de wan pikin pisi fu a skin, ma toku a e dyaf kefalek.+ Iya, wan pikin faya nomo de fanowdu fu sutu faya gi wan bigi busi!  We, a tongo na wan faya.+ A tongo, di de wan pisi fu wi skin, lai ogri, bika a e doti a heri skin.+ Neleki faya, a kan pori wan sma en heri libi. Iya, na Gehena* a faya fu en e komoto.  Libisma kan basi ibri sortu busimeti, ibri sortu fowru, ibri sortu meti di e kroipi na gron, nanga ibri sortu sani di e libi na ini se. Fu taki en leti, libisma basi den kaba.+  Ma nowan enkri libisma man basi a tongo fu du san den wani. A tongo no e meki sma dwengi en èn a e du soso ogri. A de leki vergif di man kiri sma.+  Nanga a tongo wi e prèise Yehovah,+ a Tata,+ ma nanga a srefi tongo disi wi e fluku+ libisma sosrefi di meki „leki fa Gado de”.+ 10  A srefi mofo di e blesi sma, e fluku den tu. Mi brada, a no bun, taki sani e pasa na a fasi disi.+ 11  Switi watra nanga bita watra no e komoto fu a srefi watra-olo,+ a no so? 12  Mi brada, wan figabon no kan gi olèif èn wan droifibon no kan gi figa, a no so?+ Na so yu no man puru switi watra na ini sowtu watra tu. 13  Suma fu unu koni èn abi frustan? Meki a tyari ensrefi na wan bun fasi èn meki a du+ sani di e sori taki a abi safri-ati fasi fu di a koni. 14  Ma efu na ini un ati unu abi bigi dyarusu+ èn doronomo unu wani meki trobi,+ dan un no musu meki bigi+ èn un no musu lei taki un sabi a tru leri.+ 15  Dati a no a koni di e kon fu hemel,+ ma a de fu a grontapu disi.+ A de fu libisma èn fu den ogri yeye,+ 16  bika pe dyarusu+ de èn pe sma lobi fu meki trobi, na drape bruya nanga ibri sortu ogri de.+ 17  Ma na a fosi presi, a koni+ fu hemel de soifri,+ a lobi freide,+ a no e hori nomo na san a e prakseri,+ a de klariklari fu gi yesi, a de klariklari fu sori sari-ati èn fu du bun.+ A no lobi a wan sma moro a trawan+ èn a no e hoigri.+ 18  Boiti dati, den wan di e libi bun nanga trawan,+ e sai na ini bun ten+ èn a froktu di den e koti na retidu.+

Futuwortu

Grikitongo: „naki futu noso fadon.”
Luku „Moro sani”, nr. 11.