Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Tori fu den apostel 6:1-15

6  Na a ten disi di moro nanga moro sma ben e tron disipel, dan den Dyu di ben e taki Grikitongo+ bigin krutu nanga den Dyu di ben e taki Hebrewtongo. Den ben feni taki den Griki uma di den masra dede kaba, no ben e kisi a nyanyan di ben e prati ibri dei.+  Dati meki den twarfu apostel kari ala den disipel kon èn den taigi den: „A no bun taki wi e tapu fu leri sma Gado wortu, fu go prati nyanyan gi sma.+  Fu dati ede, brada, un musu suku+ seibi man na un mindri di abi wan bun nen. Den musu abi santa yeye èn den musu koni,+ so taki wi kan poti den fu du a prenspari wroko disi.  Ma wi sa gebroiki wi ten nanga wi krakti fu begi èn fu preiki a wortu.”+  Ala den sma ben agri nanga san den apostel ben taki. Ne den teki Stefanus, wan man di ben abi wan tranga bribi èn di ben abi santa yeye,+ sosrefi Filipus,+ Prokorus, Nikanor, Timon, Parmenas, nanga Nikolas, wan man fu Antiokia, di ben teki a Dyu bribi.  Den tyari den go na den apostel èn baka di den apostel kaba begi, dan den poti den anu na tapu na ede fu den man.+  A bakapisi ben de taki moro nanga moro sma ben e kon yere a wortu fu Gado,+ èn moro nanga moro sma na ini Yerusalem ben e tron disipel.+ Bun furu priester+ tron bribiman tu.  Stefanus ben de wan sma di Gado feni bun. Gado ben gi en furu krakti èn a ben e du bigi wondru nanga bigi sani+ na mindri a pipel.  Ma wan tu man fu a grupu di sma ben kari Snoga fu den Friman èn wan tu sma fu Sireine, Aleksandria,+ Silisia+ nanga Asia, bigin meki trobi nanga Stefanus. 10  Ma den no ben man nanga Stefanus, fu di a ben e taki nanga koni+ èn nanga yepi fu a santa yeye.+ 11  Fu dati ede na wan kibri fasi den kisi wan tu sma so fara fu taki:+ „Wi yere fa a taki ogri+ fu Moses nanga Gado.” 12  Na so den sutu faya gi a pipel, gi den owru man, èn gi den leriman fu Wèt. Ne den grabu Stefanus wantronso, èn den tyari en go na a Grankrutu fu den Dyu.+ 13  Baka dati den tyari falsi kotoigi+ kon di taki: „A man disi e tan taki takru sani fu a santa presi disi èn fu a Wèt.+ 14  Bika wi yere fa a taki dati a Yesus disi fu Nasaret sa broko a presi disi puru èn taki a sa kenki den gwenti di Moses leri wi.” 15  Di ala den sma di ben e sidon na ini a Grankrutu luku Stefanus,+ dan den si taki en fesi ben de leki a fesi fu wan engel.+

Futuwortu