Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Tori fu den apostel 27:1-44

27  Baka di den bosroiti taki wi ben musu teki sipi go na Italiakondre,+ den gi Paulus nanga ete wan tu strafuman na wan legre-ofsiri di nen Yulius èn di ben de fu a legre fu Augustus.  Wi go na ini wan sipi fu Adramitiyum di ben o seiri go na difrenti presi na a syoro fu a distrikt Asia. Nanga a sipi dati wi gowe. Aristarkus,+ wan Masedonia man fu Tesalonika, ben de nanga wi.  A dei baka dati, wi doro na Sidon. Yulius ben de so bun+ fu gi Paulus primisi fu go na den mati fu en, so taki den ben kan sorgu en.+  Di wi komoto fu drape, wi seiri krosibei fu Siprus, fu kibri gi a winti di ben e wai kon tranga na wi tapu.  Dan wi seiri go moro fara pasa Silisia nanga Pamfilia èn wi doro na a lanpe fu Mira na ini Lisia.  Drape a legre-ofsiri feni wan sipi fu Aleksandria+ di ben o go na Italiakondre. Ne a meki wi go na ini a sipi dati.  Na so wi seiri safrisafri furu dei langa èn nanga furu muiti wi doro na Kenidus. Fu di a winti ben e wai kon tranga na wi tapu, meki wi seiri krosibei fu Kreita na Salmona fu kibri gi a winti.  Nanga furu muiti wi seiri krosibei fu a syoro teleki wi doro na wan presi di nen Bun Lanpe, krosibei fu a foto Laseya.  Wan heri pisi ten ben pasa kaba èn a no ben de wan bun ten srefisrefi fu go nanga sipi now. Boiti dati, a ten fu faste* na a dei te sma e tyari ofrandi fu tapu den sondu,+ ben pasa kaba. Fu dati ede Paulus gi den man a rai 10  disi: „Un man, mi e si taki wi o kisi bigi problema efu wi o seiri go doro. Wi no o lasi den lai nanga a sipi nomo, ma wi o lasi wi libi tu.”+ 11  Ma a legre-ofsiri no ben wani arki Paulus. Na presi fu dati, a arki a kapten fu a sipi èn a sma di ben abi a sipi. 12  Fu di a lanpresi no ben bun fu pasa a kowru ten fu a yari, meki furu fu den ben wani gowe fu drape. Den ben wani suku wan fasi fu pasa a kowru ten fu a yari na Feniks, wan lanpresi fu Kreita di ben opo na noord-owstusei èn na zuid-owstusei. 13  Fu di a winti fu zuidsei no ben wai so tranga, meki den ben denki tu taki den ben o man doro a presi pe den ben wani go. Dati meki den lusu ankra èn den hari pasa krosibei fu a syoro fu Kreita. 14  Ma a no langa baka dati, wan bigi winti+ di sma e kari Erakwilo, bigin wai. 15  Fu di a winti hari a sipi èn wi no ben man tyari en moro, meki wi libi en meki a winti tyari en gowe. 16  Ne wi doro wan pikin tabiki di nen Kawda pe wi ben kan kibri gi a winti. Ma pikinmoro wi lasi a pikin boto+ di ben tai na bakasei fu a sipi. 17  Ma baka di den hari en kon na ini a sipi, den meki titei waka ondro a sipi kon na loktu fu tai den planga fu en hori na wán. Fu di den man ben frede taki a sipi ben o go fasi na den santibangi fu Sirtis, meki den lusu den titei fu den seiri, so taki a winti ben kan tyari a sipi. 18  Ma fu di a bigi winti ben e fringi a sipi go-kon, meki a dei baka dati den bigin puru lai fu lekti a sipi.+ 19  A di fu dri dei den man trowe wan tu sani fu a sipi srefi na ini a watra. 20  Omeni dei langa son noso stari no ben de fu si, alen ben e kon bun tranga èn wan bigi winti ben e wai.+ Te fu kaba wi bigin lasi howpu taki wi ben o komoto libilibi. 21  Fu di wi no ben nyan wan heri pisi ten, meki Paulus opo tanapu+ èn a taki: „Un man, efu unu ben teki a rai fu mi fu no seiri komopo fu Kreita, den problema disi no ben o miti wi èn wi no ben o lasi someni sani.+ 22  Ma now mi e taigi unu fu no frede, bika nowan fu unu o lasi en libi. Soso a sipi o lasi gowe. 23  Bika esde neti wan engel+ fu a Gado di mi e dini èn e anbegi, kon tanapu na mi sei+ 24  èn a taki: ’Paulus, no frede. Yu musu tanapu na fesi Grankownu.+ Gado o sorgu taki nowan fu den sma di de nanga yu na ini a sipi, lasi libi.’ 25  Fu dati ede, un man, no frede, bika mi e bribi taki Gado+ o du soifri san na engel taigi mi. 26  Ma a sipi o go fasi na a syoro fu wan tabiki.”+ 27  Tinafo dei wi ben de na se kaba èn den skwala fu a se fu Adria ben e fringi wi go-kon. Na mindrineti den botoman kisi a firi taki den ben de krosibei fu wan syoro. 28  Di den marki o dipi a watra de, den kon si taki a ben dipi dritenti na siksi meter. Dati meki den go wan pisi moro fara fu marki en ete wan tron. Ne den si taki a watra ben dipi tutenti na seibi meter. 29  Fu di wi ben frede taki a sipi ben o naki panya tapu den bigi ston, meki den man fringi fo ankra di ben de na bakasei fu a sipi go na ini a watra. Disiten wi ben winsi taki dei opo. 30  Ma den botoman ben e pruberi fu gowe libi a sipi. Den ben e du neleki den ben wani saka den ankra na fesisei fu a sipi, ma fu taki en leti, den ben wani saka a pikin boto. 31  Fu dati ede Paulus taigi a legre-ofsiri nanga den srudati: „Efu den man disi gowe libi a sipi, unu no o komoto libilibi.”+ 32  Ne den srudati koti den titei fu a pikin boto+ èn den meki a fadon go na ini a watra. 33  Di mamanten ben e doro, Paulus taigi den alamala fu nyan pikinso. A taki: „Tide na a di fu tinafo dei di unu wakti fu kisi yepi èn te now ete unu no nyan noti. 34  Fu dati ede mi e taigi unu fu nyan pikinso, bika unu abi en fanowdu. Nowan fu unu o lasi wan wiwiri na en ede.”+ 35  Baka di a taki disi, dan en srefi teki wan brede, a taki Gado tangi+ na fesi den alamala èn a broko a brede nyan. 36  A sani disi gi den alamala deki-ati èn den srefi bigin nyan pikinso tu. 37  Ala nanga ala, wi ben de nanga tu hondro seibitenti na siksi sma* na ini a sipi. 38  Di den nyan den bere furu, den bigin fringi na aleisi di den ben abi go na ini a se fu meki a sipi kon moro lekti.+ 39  Te fu kaba, di a dei kon krin, den no ben sabi sortu kondre den doro, ma den si wan santi presi na syoro. Ne den bosroiti fu pruberi tyari a sipi go drape na syoro.+ 40  Fu dati ede, den koti den ankra puru meki den fadon go na ini a se èn den lusu den titei fu den pikin pari na bakasei fu a sipi. Dan den opo a seiri na fesisei meki a fanga winti èn na so den seiri go na syorosei. 41  Di den doro na wan santibangi na ini a se, den meki a sipi go fasi na tapu. A fesisei fu a sipi go fasi na ini a santi èn a no ben man buweigi moro, ma den bigi skwala naki a bakasei fu a sipi broko na pisipisi.+ 42  Di dati pasa, den srudati ben wani kiri den strafuman so taki nowan fu den ben kan swen gowe èn lowe. 43  Ma fu di a legre-ofsiri no ben wani taki wan sani pasa nanga Paulus, meki a tapu den srudati fu kiri den strafuman. A taigi den wan di ben man swen, meki den fosi dyompo go na ini a se èn swen go na syoro. 44  Den trawan ben musu teki planga nanga tra pisi fu a sipi fu drifi go na syoro. Na so den alamala doro bun na syoro.+

Futuwortu

Luku „Moro sani”, nr. 24.
Griki wortu: psuke. Luku „Moro sani”, nr. 8.