Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Tori fu den apostel 26:1-32

26  Agrepa+ taigi Paulus: „Yu kan opo taki gi yusrefi.” Ne Paulus langa en anu+ èn a bigin taki:+  „Mi breiti, Kownu Agrepa, taki mi kan opo taki gi misrefi na fesi yu tide fu sori taki den sani di den Dyu e taki fu mi+ no tru,  spesrutu fu di yu sabi heri bun sortu gwenti nanga kesekese den Dyu abi. Fu dati ede mi e begi yu fu arki mi nanga pasensi.  Iya, ala den Dyu sabi fa mi ben e libi+ na mindri mi pipel èn na ini Yerusalem, sensi di mi ben yongu.  Den Dyu disi sabi mi bun langa kaba. Efu den ben sa wani, den ben kan taigi yu taki fosi, mi ben de wan Fariseiman+ èn den sma dati e hori den wèt fu a bribi fu wi moro fini leki ala tra Dyu.+  Ma now sma tyari mi na fesi krutu fu di mi e howpu+ tapu den sani di Gado pramisi+ den afo fu wi.  Den twarfu lo fu wi e howpu tu fu kisi a sani di Gado pramisi den, fu di den e anbegi Gado fayafaya dei nanga neti.+ Kownu, na fu di mi abi a howpu disi, meki den Dyu e taki ogri fu mi.+  Fu san ede unu no e bribi taki Gado e gi den dedewan wan opobaka?+  Mi srefi ben prakseri trutru taki mi ben musu du furu sani fu gens Yesus fu Nasaret. 10  Fu taki en leti, na dati mi ben e du na ini Yerusalem. Mi poti furu fu den santawan na strafu-oso,+ fu di den edeman fu den priester ben gi mi primisi fu du dati.+ Mi ben feni en bun te sma ben wani kiri den. 11  Furu tron mi du ogri nanga den na ini ala den snoga+ fu meki den libi a bribi fu den. Fu di mi ati ben e bron nanga den srefisrefi, meki mi ben e frufolgu den na ini tra foto tu. 12  Na den sani dati mi ben e du di mi ben e go na Damaskus,+ fu di mi ben kisi a makti nanga a primisi fu den edeman fu den priester fu du dati. 13  Kownu, di mi ben de na pasi na brekten yuru, mi si wan leti koti komopo fu hemel. A ben e brenki moro a leti fu a son èn a ben e skèin lontu mi èn lontu den sma di ben de nanga mi.+ 14  Di wi alamala fadon na gron, mi yere wan sten taigi mi na ini Hebrewtongo: ’Saul, Saul, fu san ede yu e frufolgu mi? Yu e meki en moro muilek gi yusrefi te yu e tan kakafutu gi mi, neleki te wan kaw e skopu a tiki fu en basi.’+ 15  Ma mi taki: ’Masra, suma na yu?’ Ne Masra taki: ’Mi na Yesus di yu e frufolgu.+ 16  Ma opo tanapu.+ Mi sori misrefi na yu, bika mi wani teki yu leki wan dinari èn leki wan kotoigi+ fu den sani di yu si èn fu den sani di abi fu du nanga mi, soleki fa mi sa sori yu. 17  Mi o frulusu yu fu a pipel disi èn fu den trakondre sma pe mi e seni yu go.+ 18  Yu musu opo den ai,+ yu musu meki den komopo na ini a dungru+ fu kon na ini a leti+ èn yu musu meki den komopo na ondro a makti fu Satan,+ so taki den kan go na Gado. Na so fasi den kan kisi pardon fu sondu+ èn den kan kisi den sani di Gado e gi+ den wan di a e si leki santa sma,+ fu di den e bribi na ini mi.’ 19  Sobun, Kownu Agrepa, mi du san mi si na ini a fisyun fu hemel.+ 20  Mi go fosi na den sma fu Damaskus+ nanga Yerusalem,+ na ini heri Yudea èn na den sma di no de Dyu.+ Mi go fu tyari a boskopu gi den taki den musu abi berow, taki den musu go dini Gado baka èn taki den musu du sani di e sori taki den abi berow.+ 21  Fu den sani disi ede meki den Dyu grabu mi na ini a tempel èn den pruberi fu kiri mi.+ 22  Ma fu di Gado yepi mi,+ meki mi tan fruteri a bun nyunsu na heihei sma nanga mofina sma te na a dei fu tide. Mi e taki soso den sani di den buku fu den Profeiti+ nanga den buku fu Moses+ ben taki dati den ben o pasa. 23  Den ben taki dati Krestes ben o pina,+ a ben o de a fosiwan di kisi wan opobaka+ èn a ben o preiki èn tyari leti kon+ gi den Dyu nanga den trakondre sma.”+ 24  Di Paulus kaba taki gi ensrefi, Festus taki nanga wan tranga sten: „Yu e kon law,+ Paulus! Den kefalek sani di yu leri e law yu!” 25  Ma Paulus taki: „Mi no e kon law, Lespeki Festus. Mi e taki tru tori èn mi de nanga krin frustan. 26  Sondro frede mi e taki nanga Kownu èn a sabi den sani disi heri bun. Mi de seiker taki a sabi soifri san pasa, fu di nowan fu den sani disi pasa na wan kibri fasi.+ 27  Yu e bribi na ini den buku fu den Profeiti, Kownu Agrepa? Mi sabi taki yu e bribi.”+ 28  Ma Agrepa taigi Paulus: „Dyonsro yu o overtoigi mi ete fu tron wan Kresten!” 29  Ne Paulus taki: „Mi begi Gado taki na ini wan syatu pisi ten noso baka wan langa ten, a no yu wawan, ma sosrefi den wan di e arki mi tide tron leki mi, ma sondro den bui disi.” 30  Ne a kownu opo, sosrefi a granman, Bernise, nanga den man di ben e sidon nanga den. 31  Ma di den ben e gowe fu drape, den taigi makandra: „A man disi no e du noti fu kisi dedestrafu,+ noso fu koti strafu.” 32  Agrepa taigi Festus tu: „Efu a man disi no ben aksi fu Grankownu krutu en,+ a ben kan lusu kaba.”

Futuwortu