Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Tori fu den apostel 24:1-27

24  Feifi dei baka dati Granpriester Ananias+ kon drape makandra nanga wan tu owru man èn wan bun takiman di nen Tertulus. Ne den fruteri a granman+ fu san ede den wani krutu Paulus.+  Di Tertulus kisi na okasi fu taki, a bigin krutu Paulus. A taigi a granman: „Tangi fu yu meki sani e waka heri bun gi wi+ èn fu di yu e prakseri sani na fesi, meki kenki kon gi a pipel.  Dati meki ala ten èn na ala presi wi de nanga bigi tangi fu den sani disi, Lespeki+ Feliks.  Ma fu di mi no wani teki moro fu yu ten, meki mi e begi yu efu yu kan de so bun fu arki wi syatu.  Wi feni taki a man disi e tyari problema+ nanga bruya+ kon na mindri den Dyu na heri grontapu èn a de wan fesiman fu a kerkigrupu di den e kari den Nasaretsma.+  A pruberi sosrefi fu doti a tempel.+ Dati meki wi grabu en.  ——  Te yu poti aksi gi en, dan yu srefi o si fu san ede wi e taki ala den sani disi fu en.”  Ne den Dyu teki en sei èn den bigin taki dati na so den sani de trutru. 10  Di a granman meki wan sani nanga en ede fu sori Paulus dati a ben kan taki, Paulus piki: „Mi sabi heri bun taki yu na krutuman fu a pipel disi furu yari langa kaba. Fu dati ede mi de klariklari fu opo taki gi misrefi.+ 11  A no moro leki twarfu dei pasa di mi go na Yerusalem fu anbegi Gado.+ Yu srefi kan ondrosuku efu dati tru. 12  Nowan sma kan taki dati mi krutu nanga wan sma na ini a tempel,+ noso taki mi tyari ipi-ipi sma kon makandra fu meki dyugudyugu+ na ini den snoga noso na ini a foto. 13  Den no man buweisi+ yu tu taki den sani di den e taki fu mi now de tru. 14  Ma mi kan taigi yu taki a tru taki mi e libi soleki fa den sma fu a kerkigrupu disi e libi. Na so mi e anbegi a Gado fu den afo fu mi,+ bika mi e bribi ala sani di skrifi na ini a Wèt+ èn na ini den buku fu den Profeiti. 15  Neleki den man disi, mi abi a howpu+ taki Gado sa gi wan opobaka+ na den sma di du san reti+ èn na den sma di no du san reti.+ 16  Fu dati ede mi e du muiti ala ten fu abi wan krin konsensi+ na fesi Gado nanga libisma. 17  Dati meki baka furu yari mi kon fu du bun gi mi pipel èn fu tyari ofrandi.+ 18  Na den sani disi mi ben e du di den si mi na ini a tempel+ èn mi ben krin misrefi soleki fa a Wèt e taki. Ma mi no ben de nanga ipi-ipi sma èn mi no ben e meki dyugudyugu. Wan tu Dyu fu a distrikt Asia ben de drape. 19  Efu den ben abi wan sani fu krutu mi, dan den ben musu de dyaso na yu fesi fu taki sortu ogri mi du.+ 20  Noso, meki den man dyaso taigi yu sortu ogri mi du di mi ben tanapu na fesi den sma fu a Grankrutu. 21  A wan-enkri sani di mi du, na taki di mi ben tanapu na den mindri, mi bari: ’Unu e krutu mi tide, fu di mi e bribi taki den dedewan sa kisi wan opobaka!’”+ 22  Ma fu di Feliks+ ben sabi furu fu A Pasi fu Masra,+ meki a tapu a krutu èn a taki: „Te a legre-komandanti Lisias+ kon dyaso, dan mi sa bosroiti san fu du nanga unu.” 23  Baka dati a taigi a legre-ofsiri fu hori Paulus na strafu-oso, ma den no ben musu du nanga en leki fa den e du nanga tra strafuman. Boiti dati, na ofsiri no ben musu tapu nowan fu den sma fu Paulus fu kon yepi en.+ 24  Wan tu dei baka dati, Feliks+ doro drape nanga en wefi Drusila di ben de wan Dyu uma.+ Ne a seni kari Paulus fu arki san a ben abi fu fruteri fu a bribi di a ben e bribi na ini Krestes Yesus.+ 25  Ma di Paulus ben e taki fu retidu,+ fu a dwengi di sma musu dwengi densrefi,+ èn fu a krutu di sma o kisi,+ dan Feliks kon frede. A taki: „Yu kan gowe now, ma te mi feni wan okasi, mi o seni kari yu baka.” 26  Ma na a srefi ten, a ben howpu taki Paulus ben o pai en moni.+ Fu dati ede a seni kari en furu leisi baka fu taki nanga en.+ 27  Baka tu yari, Porsiyus Festus teki a presi fu Feliks. Ma fu di Feliks ben wani abi wan bun nen na den Dyu,+ meki a libi Paulus na strafu-oso.

Futuwortu