Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Tori fu den apostel 21:1-40

21  Baka di wi gowe libi den nanga bun furu muiti, wi teki boto go langalanga na Kos. Ma a dei baka dati wi go na Rodos èn fu drape wi go na Patara.  Di wi feni wan boto di ben o koti abra go na Fenisia, wi go na ini a boto dati èn wi hari gowe.  Di wi si a tabiki Siprus,+ wi pasa na a kruktu-anusei èn wi hari go na Siria.+ Ne wi doro na Tirus, fu di sma ben musu puru lai+ drape.  Wi go suku den disipel èn di wi feni den, wi tan drape seibi dei langa. Fu di a santa yeye+ sori den wan tu sani, meki den tan taigi Paulus fu no poti futu na ini Yerusalem.  Fu dati ede, di den seibi dei pasa, wi gowe fu drape èn wi go moro fara. Ala den disipel, makandra nanga den uma nanga pikin, tyari wi go te na dorosei fu a foto. Di wi doro na syoro, dan wi saka kindi+ begi Gado  èn wi taigi makandra adyosi.+ Baka dati wi kren go na ini a boto èn den drai go baka na den oso.  Di wi teki boto gowe libi Tirus, wi doro na Petolemayis pe wi taki den brada odi èn wi tan wan dei nanga den.  A dei baka dati wi gowe fu drape èn di wi doro na Sesareya,+ wi go na ini na oso fu a preikiman Filipus. A ben de wan fu den seibi man+ di den apostel teki na ini Yerusalem, èn wi tan nanga en.  A man disi ben abi fo umapikin di no ben trow ete èn den ben e taki profeititori.+ 10  Wi tan drape wan tu dei èn na ini a pisi ten dati wan profeiti di nen Agabus+ komoto fu Yudea kon drape. 11  Di a kon na wi, a teki a banti di Paulus ben tai lontu en bere, dan a tai en eigi futu nanga en anu èn a taki: „Disi na san a santa yeye taki: ’Na so den Dyu na ini Yerusalem o tai+ a man di abi a banti disi èn den o gi en abra+ na den trakondre sma.’” 12  Di wi yere disi, dan wi nanga den sma di ben de drape bigin begi Paulus fu no go+ na Yerusalem. 13  Ne Paulus piki wi: „Fu san ede unu e krei+ èn fu san ede unu e meki mi lasi-ati?+ Un musu sabi taki mi no de klariklari wawan fu go na strafu, ma mi de klariklari sosrefi fu dede+ na Yerusalem gi a nen fu Masra Yesus.” 14  Di wi si taki wi no ben man meki Paulus kenki prakseri, wi libi en èn wi taki: „Meki sani waka soleki fa Yehovah wani.”+ 15  Baka dati wi sreka wisrefi èn wi go na Yerusalem.+ 16  Wan tu fu den disipel fu Sesareya+ go nanga wi tu fu tyari wi go na Menason fu Siprus, wan fu den fosi disipel. Wi ben o tan na a oso fu en. 17  Di wi doro na ini Yerusalem,+ dan den brada ben breiti fu si wi.+ 18  Ma a dei baka dati, Paulus go nanga wi na a oso fu Yakobus.+ Ala den owru man ben de drape. 19  Paulus taki den odi èn a bigin fruteri den finifini+ fu a preikiwroko di Gado meki a du na mindri den sma di no de Dyu.+ 20  Di den yere disi, den bigin gi Gado glori èn den taigi Paulus: „Brada, yu si omeni dusundusun Dyu tron bribiman. Den alamala e du fayafaya san a Wèt e taki.+ 21  Ma den yere taki yu e leri ala den Dyu di e libi na mindri den trakondre sma, taki den musu drai baka gi a Wèt di Gado gi Moses,+ bika yu taigi den fu no besnèi+ den pikin fu den èn fu no du leki fa den ben gwenti du sensi ten. 22  We dan san musu pasa now? Den o yere taki yu doro dyaso. 23  Fu dati ede yu musu du san wi e taigi yu now: Wi abi fo man dyaso di meki wan sweri.+ 24  Meki den go nanga yu, èn meki yusrefi kon krin makandra nanga den soleki fa a Wèt e taki, dan yu gi den moni fu krebi den ede.+ Na so ala sma o sabi taki den sani di trawan fruteri fu yu no tru. Den o sabi taki yu e tyari yusrefi na wan fasi di fiti èn taki yu e gi yesi na a Wèt.+ 25  Wi seni sma fu go fruteri den trakondre sma di tron bribiman, taki wi bosroiti taki den no musu abi noti fu du nanga sani di sma gi leki ofrandi na tra gado,+ nanga brudu,+ nanga meti di sma tyokro kiri+ èn nanga hurudu.”+ 26  A dei baka dati, Paulus go nanga den man èn a krin ensrefi makandra nanga den+ soleki fa a Wèt e taki. Ne den go na ini a tempel fu taigi a priester o ten den ben o kaba+ krin densrefi èn o ten ibriwan fu den+ ben o gi en ofrandi.+ 27  Di den seibi+ dei ben e kon na wan kaba, den Dyu fu Asia si Paulus na ini a tempel. Ne den tyari bruya kon na mindri den ipi-ipi sma,+ den grabu en 28  èn den bari: „Sma fu Israel, un yepi wi! Disi na a man di e leri ala sma na ala sei fu no sori lespeki gi wi pipel,+ wi Wèt, nanga a presi disi. Boiti dati, a tyari Grikisma srefi kon na ini a tempel èn a doti a santa presi disi.”+ 29  Den ben taki disi fu di den ben si Trofimus+ fu Efeise na ini a foto makandra nanga Paulus èn den ben denki taki Paulus ben tyari en kon na ini a tempel. 30  A sani disi ben meki taki wán dyugudyugu+ kon na ini a heri foto èn sma ben e lon go na a tempel. Ne den grabu Paulus èn den srepi en go na dorosei fu a tempel.+ Wantewante sma tapu den doro. 31  Di den ben e suku fu kiri en, a komandanti fu wan grupu srudati kisi fu yere taki heri Yerusalem ben e bruya.+ 32  Ne wantewante a teki srudati nanga legre-ofsiri èn a lon go na den sma.+ Di den sma si a komandanti fu a legre+ nanga den srudati, den tapu fu fon Paulus. 33  A komandanti go moro krosibei, a grabu Paulus, èn a taigi den srudati fu tai en nanga tu keti.+ Dan a aksi suma na Paulus èn san a du. 34  Ma son sma bari disi, trawan bari dati.+ Den sma ben meki so wan bigi babari, taki a komandanti no ben man kon sabi soifri suma na Paulus. Fu dati ede a taigi den srudati fu tyari en go na a presi pe den srudati ben e tan.+ 35  Ma di Paulus doro na a trapu, den srudati ben musu opo en tyari gowe fu di den sma ben wani du en ogri. 36  Den sma ben tan waka na den baka e bari: „Kiri en!”+ 37  Di den ben de fu tyari Paulus go na ini a presi pe den srudati ben e tan, a taigi a komandanti fu a legre: „Mi kan taigi yu wan sani?” A komandanti piki en: „Yu e taki Grikitongo tu? 38  A no yu na a Egeptesma di ben meki sma opo densrefi teige lanti+ tra dei? Èn a no yu tyari den fo dusun kiriman go na ini a sabana?” 39  Ne Paulus taigi en taki: „Fu taki en leti, mi na wan Dyu+ fu Tarsus+ na ini Silisia. Mi na wan borgu fu wan foto di ala sma sabi. Fu dati ede mi e begi yu, gi mi primisi fu taki nanga a pipel.” 40  Baka di a gi Paulus primisi, Paulus di ben tanapu na tapu a trapu, meki wan sani nanga en anu,+ so taki a pipel ben kan arki en. Di den tan pî, a taigi den na ini Hebrewtongo:+

Futuwortu