Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Tori fu den apostel 20:1-38

20  Baka a dyugudyugu, Paulus seni kari den disipel. Baka di a gi den deki-ati èn a taigi den adyosi,+ a teki pasi go na Masedonia.+  A waka pasa na ini den kontren drape fu gi den wan di ben de drape furu deki-ati.+ Baka dati a go na Grikikondre  èn a tan drape dri mun langa. Ma di a ben de fu teki boto go na Siria, a bosroiti fu drai go baka na Masedonia, fu di den Dyu ben meki mofo fu kiri en.+  Den sma di ben go nanga en ben de Sopater+ di ben de wan manpikin fu Pirus fu a foto Bereya, Aristarkus+ nanga Sekundus di ben de Tesalonikasma, Gayus fu Derbe, Timoteyus,+ Tikikus+ fu a distrikt Asia, nanga Trofimus.+  Den man disi go na wi fesi èn den ben e wakti wi na ini Trowas.+  Ma baka a fesa fu den brede sondro srudeki,+ wi teki boto gowe libi Filipi èn baka feifi dei wi miti den na ini Trowas.+ Drape wi tan seibi dei.  Na a fosi dei fu a wiki+ wi ben kon makandra fu nyan. Ne Paulus bigin taki nanga den, fu di a ben o gowe libi den a dei baka dati. A tan taki te mindrineti.  Dati meki den leti furu lampu na ini a sodrokamra+ pe wi ben kon makandra.  Wan yonkuman di nen Etikus ben e sidon na a fensre èn di Paulus ben e taki go doro, a yonkuman disi fadon na ini wan dipi sribi. Ne a fadon fu a di fu dri sodro go na gron. Di den go na en, den si taki a dede. 10  Ma di Paulus saka go na gron, a go didon na tapu a yonkuman,+ a brasa en èn a taigi den sma: „No bari moro, bika a kisi libi* baka.”+ 11  Baka dati Paulus go na sodro, a broko a brede èn a nyan. A taki nanga den brada wan heri pisi ten teleki dei broko, dan a gowe libi den. 12  Den tyari a boi gowe èn den kisi bun furu trowstu fu di a ben de na libi. 13  Baka dati, wi teki boto go na Asus pe wi ben o teki Paulus, bika na dati a ben taigi wi fu du. Ensrefi ben o waka go drape nanga futu. 14  Na so a miti wi na Asus, dan wi teki en na ini a boto èn wi go na Mitileine. 15  Di wi hari gowe fu drape a tamara fu en, wi doro abrasei fu Kios. Ma a dei baka dati wi doro na Samos èn a tamara fu en wi doro na Mileite. 16  Paulus ben bosroiti fu hari pasa Efeise,+ so taki a no ben o abi fu lasi ten na ini a distrikt Asia, bika a ben e meki muiti fu doro na Yerusalem+ na a dei fu a Pinksterfesa. 17  Ma di a ben de na Mileite, dan a seni sma go na Efeise fu kari den owru man+ fu a gemeente kon. 18  Di den kon na en, a taigi den: „Unu sabi heri bun fa mi tyari misrefi na un mindri+ sensi a fosi dei di mi poti futu na ini a distrikt Asia.+ 19  Mi ben e dini Masra leki wan srafu+ nanga ala sakafasi+ èn nanga watra-ai. Fu di den Dyu meki mofo fu kiri mi,+ meki mi kisi furu tesi. 20  Toku dati no tapu mi fu fruteri unu ala sani di o tyari wini gi unu èn fu gi unu leri.+ Mi du dati na fesi ala sma èn oso+ fu oso. 21  Mi fruteri den Dyu nanga Grikisma finifini+ taki den musu abi berow,+ den musu teki Gado sei èn bribi na ini wi Masra Yesus. 22  Ma now mi musu go na Yerusalem, fu di a santa yeye taigi mi fu du dati.+ Ma mi no sabi san o pasa nanga mi drape. 23  Ibri leisi te mi e go na wan tra foto a santa yeye+ e sori mi doronomo taki sma o poti mi na strafu-oso èn taki mi o nyan pina.+ 24  Ma mi no e si mi libi leki wan prenspari sani.+ A wan-enkri sani di mi wani na fu lon a streilon te na a kaba+ èn fu klari a wroko+ di Masra Yesus gi mi fu du.+ A wroko dati na fu preiki finifini fu a bun nyunsu taki Gado e sori sma bun-ati.+ 25  Ma mi sabi taki nowan fu unu di mi fruteri fu a Kownukondre, sa si mi moro. 26  Fu dati ede mi e teki unu leki kotoigi tide taki mi no abi nowan brudu-paiman,+ 27  bika mi no hori noti na baka. Iya, mi fruteri unu ala sani di Gado wani libisma fu du.+ 28  Poti prakseri+ na unsrefi+ èn na ala den skapu,+ bika santa yeye poti unu leki skapuman+ fu teki fesi na ini a gemeente fu Gado+ di a bai nanga a brudu+ fu en eigi Manpikin. 29  Mi sabi taki te mi gowe, ogri busidagu+ o kon na un mindri èn den o du ogri nanga den skapu. 30  Sma na un mindri o taki sani di no tru,+ fu hari den disipel kon na den baka.+ 31  Fu dati ede, tan na ai èn hori na prakseri taki dri yari langa,+ dei nanga neti, mi tan frumane+ ibriwan fu unu nanga watra-ai. 32  Meki Gado nanga a boskopu fu a bun-ati fu en, kibri unu.+ A boskopu disi kan tranga unu+ èn a kan gi unu a sani di ala santawan o kisi.+ 33  Mi no gridi gi nowan sma en solfru, gowtu, noso krosi.+ 34  Unu srefi sabi taki den anu disi wroko fu sorgu misrefi+ nanga den wan di ben de nanga mi. 35  Mi sori unu na ala fasi taki un musu wroko+ tu fu man yepi den swakiwan.+ Tan prakseri den wortu di Masra Yesus srefi ben taki: ’Wan sma sa de moro koloku te a e gi sani,+ leki te a e kisi sani.’” 36  Di a taki den sani disi, en nanga ala den sma saka kindi+ èn a begi. 37  Ne den alamala bari krei, den brasa Paulus+ èn den bosi en na wan switi fasi,+ 38  fu di den ben e sari trutru di a taigi den taki den no ben o si en moro.+ Ne den tyari en go na a boto.+

Futuwortu

Griki wortu: psuke. Luku „Moro sani”, nr. 8.