Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Tori fu den apostel 18:1-28

18  Baka dati, Paulus gowe libi Ateine èn a doro na Korente.  Drape a miti wan Dyu di nen Akwila+ èn di gebore na ini Pontus. No so langa pasa en nanga en wefi Preskela komoto fu Italiakondre,+ fu di Klawdiyus+ ben taigi ala den Dyu fu gowe libi Rome. Sobun, Paulus go na den,  èn fu di den ben e du a srefi wroko+ leki en fu meki tenti, meki a tan na den oso èn a wroko nanga den.  Paulus ben gwenti fu taki nanga den sma na ini a snoga+ ibri Sabat-dei èn a ben overtoigi den Dyu nanga den Grikisma meki den bribi.  Di Silas+ nanga Timoteyus+ komopo fu Masedonia, dan Paulus bigin preiki a wortu fu Gado fayafaya èn a sori den Dyu krin taki Yesus na Krestes.+  Ma fu di den ben e tan gens en èn den ben e tan kosi en,+ meki a seki en krosi+ èn a taigi den: „Meki a brudu fu unu+ kon na tapu un eigi ede. Mi du san mi ben musu du.+ Bigin fu tide mi e go na den sma di no de Dyu.”+  Ne a gowe fu drape èn a go na ini na oso fu wan man di nen Titiyus Yustus, wan anbegiman fu Gado di ben e libi na sei a snoga.  Krespus,+ a fesiman fu a snoga tron wan bribiman fu Masra, makandra nanga en heri osofamiri. Sosrefi furu fu den Korentesma di ben arki Paulus tron bribiman èn den teki dopu.  Boiti dati, wan neti Masra taigi Paulus+ na ini wan fisyun: „No frede, ma tan taki nanga den sma èn no tan tiri, 10  bika mi de nanga yu+ èn nowan sma o pruberi fu du yu ogri. Mi abi furu sma na ini a foto disi.” 11  Dati meki a tan drape wán yari nanga siksi mun èn a leri den sma a wortu fu Gado. 12  Na a ten di Galio ben de granman+ fu Akaya, den Dyu opo densrefi leki wán man teige Paulus èn den tyari en go na fesi a krutuman-sturu.+ 13  Den taki: „A man disi e kisi sma so fara+ taki den e anbegi Gado tra fasi leki fa a wèt e taki.” 14  Ma di Paulus ben wani taki wan sani, dan Galio taigi den Dyu: „Un Dyu, efu a man disi ben meki wan fowtu noso du wan ogri trutru, dan mi ben o teki ten fu arki unu. 15  Ma efu a trobi di de na un mindri abi fu du nanga wortu, nanga nen,+ noso nanga a wèt fu unu,+ dan unu srefi musu lusu a trobi dati. Mi no wani krutu den tori disi.” 16  Di a taki dati, a yagi den puru na fesi a krutuman-sturu. 17  Ne den alamala grabu Sostenes,+ a fesiman fu a snoga, èn den bigin fon en leti na fesi a krutuman-sturu. Ma Galio no ben wani abi noti fu du nanga den sani disi. 18  Ma Paulus ben tan drape wan heri pisi ten. Baka dati a taigi den brada adyosi èn a teki boto go na Siria makandra nanga Preskela nanga Akwila. A koti en wiwiri+ na ini Kenkreya,+ fu di a ben musu du san a pramisi. 19  Na so den doro na Efeise èn a gowe libi den drape. Ma Paulus srefi go na ini a snoga+ èn a taki nanga den Dyu. 20  Den tan aksi en fu tan moro langa, ma a no ben wani. 21  Ne a taigi den adyosi+ èn a taki: „Efu Yehovah wani,+ dan mi sa drai kon baka na unu.” Ne a teki boto gowe libi Efeise 22  èn a doro na Sesareya. A go na Yerusalem fu go taki a gemeente odi èn baka dati a go na Antiokia. 23  Baka di a tan drape wan pisi ten, dan a go na difrenti presi na ini a kontren fu Galasia+ nanga Frigia,+ fu tranga den disipel.+ 24  Wan dei, wan Dyu fu Aleksandria di ben nen Apolos,+ doro na ini Efeise. A ben de wan bun takiman di ben sabi Gado Buku bun.+ 25  A man disi ben kon leri sabi a pasi fu Yehovah. Fu di a santa yeye fu Gado meki a de fayafaya,+ meki a bigin taki nanga sma èn na wan yoisti fasi a bigin leri sma sani di abi fu du nanga Yesus. Ma a ben sabi soso fu a dopu fu Yohanes.+ 26  A bigin taki sondro frede na ini a snoga. Di Preskela nanga Akwila+ yere en, dan den tyari en go na den oso èn den fruteri en moro fini fu a pasi fu Gado. 27  Fu di a ben wani abra go na Akaya, meki den brada skrifi den disipel drape wan brifi fu gi den deki-ati meki den gi Apolos wan switikon. Dati meki di a doro drape, a du furu fu yepi+ den wan di tron bribiman fu di Gado ben sori den bun-ati.+ 28  A ben de fayafaya di a sori den Dyu krinkrin na fesi ala sma taki den leri fu den no bun. A ben e gebroiki Gado Buku+ tu fu sori den taki Yesus na a Krestes.+

Futuwortu