Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Tori fu den apostel 12:1-25

12  Na a srefi ten dati, kownu Herodes bigin du wan lo ogri+ nanga wan tu sma fu a gemeente.  A kiri Yakobus, a brada fu Yohanes,+ nanga wan feti-owru.+  Di a si taki den Dyu ben feni dati bun,+ dan a grabu Petrus tu. (Dati ben de na a ten fu a fesa fu den brede sondro srudeki.)+  A grabu en poti na strafu-oso+ pe fo grupu fu fo srudati baka makandra ben musu hori wakti na en doronomo. A ben wani tyari en go na fesi a pipel baka a Paskafesa.+  Fu dati ede, den hori Petrus na strafu-oso. Ma a gemeente ben tan begi+ Gado fayafaya gi en.  A neti di Herodes ben wani tyari en go na fesi a pipel, Petrus ben sribi. A ben tai nanga keti na mindri tu srudati èn waktiman ben e hori wakti na a doro fu a strafu-oso.  Ne na engel fu Yehovah kon tanapu+ na en sei èn wan leti ben e skèin na ini a strafu-oso kamra. Na engel naki Petrus na en seibere fu wiki en+ èn a taigi en: „Opo esi-esi!” Ne den keti fadon+ komopo fu en anu.  Na engel+ taigi en: „Weri yu krosi nanga yu susu.” Petrus du dati. Te fu kaba, na engel taigi en: „Weri yu dyakti+ èn tan waka na mi baka.”  Petrus go na dorosei èn a tan waka baka na engel, ma a no ben sabi taki san na engel ben e du, ben e pasa trutru. Fu taki en leti, a ben denki taki a ben e si wan fisyun.+ 10  Di den pasa a fosi nanga a di fu tu grupu waktiman, dan den doro na a isri portu pe den ben kan go na ini a foto. A portu disi opo fu ensrefi.+ Baka di den go na dorosei, dan den waka go na ini wan strati èn wantronso na engel gowe libi en. 11  Di Petrus kisi ensrefi, a taki: „Now mi sabi trutru taki Yehovah seni en engel kon+ fu puru mi+ na Herodes anu èn a kibri mi gi ala sani di a Dyu pipel ben wani du nanga mi.” 12  Baka di a prakseri fu a sani disi, a go na a oso fu Maria, a mama fu Yohanes di sma ben kari Markus tu.+ Furu sma ben de drape e begi. 13  Di a naki na a portu, dan wan umasrafu di ben nen Roda kon luku suma ben de drape. 14  Di a kon frustan taki na Petrus en sten a yere, a ben breiti so te taki a no opo a portu, ma a lon go na inisei èn a fruteri den trawan taki Petrus ben e tanapu na a portu. 15  Den taigi en: „Yu law.” Ma a ben hori nomo taki na Petrus ben tanapu na a portu. Ne den taki: „Na a engel fu Petrus.”+ 16  Ma Petrus tan naki na a portu. Di den opo a portu, dan den si en èn den fruwondru. 17  Ma a sori den+ nanga en anu taki den ben musu tan pî èn a fruteri den finifini fa Yehovah ben puru en na strafu-oso. A taigi den: „Fruteri Yakobus+ nanga den brada den sani disi.” Baka dati a go na dorosei èn a go na wan tra presi. 18  We, di dei opo,+ dan den srudati ben bruya srefisrefi, fu di den no ben sabi san ben pasa trutru nanga Petrus. 19  Herodes+ ben suku en fayafaya, ma di a no feni en, a poti aksi gi den waktiman èn a taigi sma fu tyari den gowe meki den kisi strafu.+ Baka dati Herodes gowe libi Yudea fu go na Sesareya èn a tan drape wan pisi ten. 20  A ben de so, taki Herodes ben abi na prakseri fu go feti nanga a pipel fu Tirus nanga Sidon. Fu dati ede, ala den sma disi go na Herodes èn den kisi Blastus so fara fu yepi den. A man disi ben abi a frantwortu fu luku den afersi na ini na oso fu a kownu. Sobun, den sma bigin begi a kownu fu meki en bun baka nanga en, fu di a kondre fu en ben gwenti fu seni nyanyan+ go na a kondre fu den. 21  Ma wan dei Herodes weri kownukrosi, a go sidon na tapu a krutuman-sturu èn a bigin taki nanga a pipel. 22  Ne den sma di ben kon makandra bigin bari: „Disi a no a sten fu wan libisma, ma na a sten fu wan gado!”+ 23  Wantewante na engel fu Yehovah naki en+ fu di a no ben gi Gado glori.+ Ne woron bigin nyan en èn a dede. 24  Ma moro nanga moro sma na ala sei ben kon sabi+ a wortu fu Yehovah.+ 25  Baka di Barnabas+ nanga Saulus ben kaba nanga a wroko di den ben musu du fu yepi trawan+ na ini Yerusalem, den drai go baka na Antiokia. Den tyari Yohanes,+ di sma sabi tu leki Markus, go nanga den.

Futuwortu