Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Singi fu Salomo 5:1-16

5  „Mi sisa,+ mi trowmisi,+ mi kon na ini mi moi dyari.+ Mi piki mi eigi mirre-bromki+ nanga tra bromki di e smeri switi. Mi nyan mi eigi onigodo nanga mi eigi oni.+ Mi dringi mi eigi win nanga mi eigi merki.” „Un tu di lobi makandra, un nyan! Un dringi èn kon drungu fu a lobi di unu e sori makandra!”+  „Mi e sribi, ma mi ati no e sribi.+ Mi e yere mi lobiwan e naki na tapu a doro!”+ „Mi lobi sisa, mi gudu, mi doifi, yu di no abi nowan fowtu,+ opo a doro gi mi!+ Mi heri ede abi dow èn mi wiwiri nati nanga watradropu fu a neti.”+  „’Mi puru mi dyakti kaba. Fa mi kan weri en baka? Mi wasi mi futu kaba. Fa mi kan doti den baka?’  Mi lobiwan srefi puru en anu na a olo fu a doro. Mi ati bigin naki.+  Ne mi opo fu mi bedi fu opo a doro gi mi lobiwan. Mirre ben e dropu komoto fu mi anu èn mirre-oli ben e dropu komoto fu mi finga. A mirre ben e fadon go na tapu den olo fu a greni fu a doro.  Ne mi opo a doro, iya, mi opo a doro gi mi lobiwan, ma a ben gowe kaba. A waka go moro fara. Mi ati koti di a taki nanga mi. Mi suku en, ma mi no feni en.+ Mi kari en, ma a no piki mi.  Den waktiman+ di ben e waka lontu na ini a foto, tuka nanga mi. Den naki mi, iya, den gi mi mankeri. Den sma di ben e hori wakti na den skotu+ hari a duku puru di ben tapu mi ede nanga mi skin.  Un uma fu Yerusalem,+ mi meki unu sweri,+ taki efu unu feni mi lobiwan,+ dan un musu taigi en taki lobi meki mi kon swaki.”+  „Yu na a moro moi uma di de.+ San meki taki a lobiwan fu yu bun moro ala trawan?+ Fu san ede yu e aksi wi fu meki a sweri disi?+ Na bun a lobiwan fu yu bun so?” 10  „Mi lobiwan moi srefisrefi èn a rediredi. Efu tin dusun man de, dan en na a moro moiwan.+ 11  En ede na gowtu, iya, soifri gowtu. En wiwiri na wan bosu dadel-froktu. En wiwiri blaka leki den wiwiri fu wan blaka fowru. 12  Den ai fu en de leki doifi na sei liba, iya, doifi di e wasi na ini merki èn di e sidon na mindrisei fu a merki. 13  En fesi de leki wan bedi pe sma prani bromki di e smeri switi,+ iya, leki toren di lai nanga spesrei di e smeri switi. En mofobuba na leilibromki èn mirre-oli e dropu komoto fu den.+ 14  En anu na fu gowtu èn en nangra meki kon moi nanga krisolit-ston. En bere meki fu brenki ivoor di lai safir-ston. 15  En futu na pilari fu marmer-ston di abi wan stonfutu fu soifri gowtu. Mi lobiwan moi leki a kontren fu Libanon, iya, a langa leki den sedrebon.+ 16  A tapusei fu en inimofo switi leki oni èn ala sani fu en moi srefisrefi.+ Un uma fu Yerusalem, disi na mi lobiwan, iya, disi na mi mati.”

Futuwortu