Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Sefanya 3:1-20

3  Helu fu a foto di e opo ensrefi, di e doti ensrefi èn di e kwinsi sma!+  A no ben wani arki.+ A no ben wani teki leri.+ A no ben frutrow na tapu Yehovah.+ A no ben kon krosibei na en Gado.+  Den granman fu en ben de leki lew di e bari drape.+ Den krutuman fu en ben de leki busidagu di e onti na neti èn di no e libi nowan bonyo teleki mamanten.+  Den profeiti fu en no ben abi syen. Den ben e bedrigi sma.+ Srefi den priester fu en pori santa sani. Den ben wisiwasi a wèt.+  Yehovah ben tyari ensrefi na wan reti fasi na ini a foto dati.+ A no ben e du nowan kruktudu.+ Ibri mamanten a ben e memre den na den wèt fu en.+ Solanga dei opo a ben e du dati.+ Ma den sma di ben e du kruktudu no ben abi syen.+  „Mi kiri tra pipel. Den toren na den uku fu den foto fu den broko fadon. Mi broko den strati fu den, so taki nowan sma ben man waka pasa drape. Mi pori den foto fu den, so taki nowan sma ben man tan na ini.+  Mi taki: ’Un musu abi lespeki gi mi. Un musu teki leri fu mi.’+ Efu unu ben du dati, dan a tanpresi fu unu no ben o pori.+ Ma now mi o aksi unu frantwortu fu ala den sondu di unu du.+ Soso ogri unu wani du.+  ’Fu dati ede, un musu tan fruwakti mi’,+ na so Yehovah taki, ’teleki a dei di mi o kon fu tyari den gudu gowe.+ Bika mi bosroiti fu tyari pipel kon makandra+ èn fu tyari kownukondre kon na wán, so taki mi kan puru atibron na den tapu.+ Bika mi atibron de leki wan faya di o bron a heri kondre.+  Na a ten dati mi o leri den pipel wan soifri tongo,+ so taki den alamala kan kari a nen fu Yehovah+ èn dini en makandra leki wán man.’+ 10  Den wan di e suku mi, sobun, mi pipel di panya na ala sei, o kon fu a kontren fu den liba fu Etiopia. Den o tyari wan kado gi mi.+ 11  Na a ten dati unu no o syen fu den sani di unu du di unu trangayesi mi.+ Bika den heimemre sma di e dyaf, mi o puru na un mindri.+ Noiti moro unu o abi heimemre na tapu mi santa bergi.+ 12  Na ini un foto, mi o meki wan tu sma tan abra di abi sakafasi nanga safri-ati.+ Den o suku kibri na a nen fu Yehovah.+ 13  Den sma di tan abra fu Israel+ no o du nowan kruktudu,+ den no o taki nowan lei,+ èn den no o taki sani fu bedrigi trawan.+ Na presi fu dati den o nyan den bere furu, den o didon langalanga na ini a grasi,+ èn nowan sma o meki den frede.”+ 14  Bari fu prisiri, umapikin fu Sion! Bari fu prisiri,+ Israel! Meki prisiri, iya, prisiri nanga yu heri ati, umapikin fu Yerusalem!+ 15  Yehovah no o krutu unu moro.+ A puru un feanti.+ Yehovah, a kownu fu Israel, de na un mindri.+ Un no musu frede moro taki rampu o miti unu.+ 16  Na a ten dati den o taigi Yerusalem: „No frede, Sion.+ No lasi-ati.+ 17  Yehovah un Gado de na un mindri. A o frulusu unu leki wan deki-ati Fetiman.+ A o prisiri srefisrefi nanga unu.+ A o firi bun, fu di a lobi unu. Na fu unu ede a o bari fu prisiri. 18  Ai Sion, den sma fu yu ben e sari,+ fu di den no ben man go na den fesa fu yu moro. Ma now mi o tyari den alamala kon na wán.+ Den no ben de nanga yu moro, bika den ben de na ini wan tra kondre pe den kisi syen.+ 19  Na a ten dati mi o du wan sani nanga den wan di e pina yu.+ Yu e tingatinga, ma mi o frulusu yu.+ Ala den sma fu yu di panya na ala sei, mi o tyari kon na wán.+ Mi o meki sma prèise den èn den o kisi wan bun nen na ini a heri kondre pe den ben kisi syen. 20  Na a ten dati mi o tyari unu kon baka. Iya, dati na a ten te mi o tyari unu kon na wán. Mi o meki unu kisi wan bun nen èn ala pipel fu grontapu o prèise unu, fu di mi o puru unu na ini katibo èn mi o tyari unu kon baka. Unu srefi o si dati nanga un eigi ai”, na so Yehovah taki.+

Futuwortu