Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Sakaria 12:1-14

12  Wan spesrutu boskopu: Yehovah, a sma di e bradi hemel na tapusei fu grontapu,+ di e poti a fondamenti fu grontapu+ èn di e gi sma libi,+ taki: „Disi na san Yehovah taki fu Israel:  Mi o meki Yerusalem+ tron leki wan komki di e meki ala pipel na en lontu seiriseiri te den e waka.+ Feanti o kon feti nanga Yuda èn nanga Yerusalem.+  Na a ten dati+ mi o meki Yerusalem tron leki wan hebi ston+ gi ala den pipel. Iniwan sma di wani opo en o kisi hebi mankeri. Ala den pipel fu grontapu o kon makandra fu feti nanga en.+  Na a ten dati”,+ na so Yehovah taki, „mi o meki ibri asi+ kon bruya èn ibri sma di e rèi na den tapu o kon law.+ Mi o luku den sma fu Yuda èn mi o sorgu taki noti no pasa nanga den.+ Mi o meki ibri asi fu den pipel kon breni.  Den edeman+ fu Yuda o prakseri: ’Den sma di e tan na Yerusalem e gi wi krakti, bika Yehovah di e tiri den legre na a Gado fu den.’+  Na a ten dati mi o meki den edeman fu Yuda de leki wan faya na mindri den bon+ èn leki wan frambo na mindri aleisi di sma koti didyonsro.+ Den o bron ala den pipel na ini a birti fu den,+ na a reti-anusei èn na a kruktu-anusei fu den. Ma den sma fu Yerusalem o tan na den eigi presi, iya, den o tan na Yerusalem.+  Ma Yehovah o kibri den tenti fu Yuda fosi, so taki den sma fu David nanga den sma di e tan na Yerusalem no o abi moro grani leki Yuda.  Na a ten dati, Yehovah o feti gi den sma di e tan na Yerusalem.+ Na a ten dati, a sma di de fu fadon o kon tranga leki David+ èn den sma fu David o kon de leki wan tranga gado. Den o de leki Yehovah en engel di e tiri a pipel.+  Na a ten dati, mi o suku fu kiri ala den pipel di wani feti nanga Yerusalem.+ 10  Fu di mi feni den sma fu David èn den sma di e tan na Yerusalem bun,+ meki mi o gi den a yeye fu mi èn mi o yere den begi fu den.+ Den o si a sma di den dyuku+ èn na fu en ede den o bari krei neleki te a wan-enkri manpikin fu den dede. Iya, na fu en ede den o bari krei èn den o sari trutru neleki te a fosi manpikin fu den dede.+ 11  Na a ten dati, bun furu sma o bari krei na ini Yerusalem, neleki di sma ben e bari krei na Hadad-Rimon na ini Megido-lagipresi.+ 12  A heri kondre o bari krei,+ iya, ibri famiri o bari krei. Den sma fu David o de den wawan èn den o krei. Den uma fu den o de den wawan èn den o krei tu.+ Den sma fu Natan+ o de den wawan èn den o krei. Den uma fu den o de den wawan èn den o krei tu. 13  Den sma fu Leifi o krei+ èn den uma fu den o krei tu. Den sma fu Simei+ o krei èn den uma fu den o krei tu. 14  Ala den famiri di tan abra, iya, ibri famiri o bari krei èn den uma na ini den famiri o bari krei tu.+

Futuwortu