Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Rut 4:1-22

4  Na so Boas go na a portu fu a foto+ èn a saka sidon drape. Ne Boas si a man fu suma a ben taki dati na en ben kan bai Rut puru na nowtu.+ Di a man waka pasa, Boas kari en, dan a taigi en: „Kon yere, mi mati, kon sidon dyaso.” Sobun, a man go na Boas, dan a go sidon.  Baka dati Boas kari tin owru man+ fu a foto kon, dan a taki: „Un sidon dyaso.” Ne den go sidon.  Dan Boas taigi a man:+ „Naomi drai kon baka fu Moab+ èn a abi fu seri a pisi gron fu wi brada Elimeilek.+  Dati meki mi prakseri fu taki a tori disi nanga yu. Now di den owru man nanga den tra sma de dyaso,+ yu abi na okasi fu bai a pisi gron.+ Efu yu wani bai* a gron, dan yu kan bai en, ma efu yu no wani bai en, dan yu musu taigi mi, so taki mi sabi san mi o du. Yu na a fosiwan di abi a reti fu bai a gron,+ ma efu yu no bai en, dan na mi o abi fu bai en.’” Ne a man taki: „Mi o bai a gron.”+  Dan Boas taki: „Te yu bai a gron fu Naomi, dan yu musu bai en tu fu Rut, na uma fu Moab, a wefi fu a man di dede. Na so fasi a gron kan tan tapu a nen fu a man dati.”+  Di a man yere dati, a taki: „Mi no o man bai a gron, noso mi o lasi. Mi e gi yu primisi fu bai a gron gi yusrefi, fu di mi no man bai en.”  Fositen, sma na ini Israel ben abi a gwenti disi: Te den ben e bai wan gron baka, noso te den ben e kenki sani nanga makandra, noso te den ben e du iniwan tra bisnis, dan wan fu den ben e puru en wan sei susu+ èn a ben e gi a susu na a trawan. Na so sma ben e seti den tori fu den na ini Israel.  Sobun, a man di ben musu bai a gron baka, taigi Boas: „Bai a gron gi yusrefi.” Dan a man puru en susu+ na en futu.  Ne Boas taigi den owru man nanga ala den sma di ben de drape: „Tide unsrefi si+ taki ala den sani di ben de fu Elimeilek, Kilion, nanga Maklon, mi bai fu Naomi. 10  Boiti dati, mi bai Rut, na uma fu Moab, a wefi fu Maklon di dede kaba. Na so fasi Rut o tron mi wefi èn a famirigudu o tan tapu a nen fu a man di dede.+ Dan en famiri nanga den sma fu a foto kan tan memre a nen fu en. Tide unu na kotoigi fu disi.”+ 11  Ne ala den sma di ben de drape na a portu èn den owru man, taki: „Wi na yu kotoigi! Meki Yehovah blesi a wefi di e kon na ini yu oso èn meki a de leki Rakel+ nanga Lea+ di ben tron mama fu den pikin fu Israel.+ Yu musu tron wan prenspari sma na ini Efrata+ èn yu nen musu kisi bigi grani na ini Betlehem.+ 12  Meki den pikin di Yehovah o gi yu nanga a yongu uma disi,+ kon furu leki den pikin na ini na osofamiri fu Peres, a manpikin di Tamar ben kisi nanga Yuda.”+ 13  Baka dati Boas teki Rut leki wefi èn a go didon nanga en. Dan Yehovah meki Rut kon de nanga bere+ èn a kisi wan manpikin. 14  Ne den uma taigi+ Naomi: „Prèise Yehovah,+ fu di a sorgu taki wan famiriman bai yu puru na nowtu tide. Meki ala sma na ini Israel kari Gado nen. 15  A gi yu nyun libi baka èn a e sorgu gi yu na yu owrudei,+ bika Rut kisi wan manpikin gi yu. Rut lobi yu+ èn a bun moro leki seibi manpikin.”+ 16  Ne Naomi teki a pikin, dan a brasa en hori. Na Naomi ben o luku a pikin gi Rut. 17  Ne den uma fu a birti+ gi a pikin wan nen. Den taki: „Naomi kisi wan manpikin.” Sobun, den kari a pikin Obed.+ En na a papa fu Isai,+ a papa fu David. 18  Disi na den pikin nanga den bakapikin fu Peres:+ Peres tron a papa fu Hesron.+ 19  Hesron tron a papa fu Ram. Ram+ tron a papa fu Aminadab. 20  Aminadab+ tron a papa fu Naheson.+ Naheson tron a papa fu Salmon. 21  Salmon+ tron a papa fu Boas. Boas+ tron a papa fu Obed. 22  Obed tron a papa fu Isai+ èn Isai tron a papa fu David.+

Futuwortu

Noso: „Bai baka.” Luku sosrefi Le 25:25.