Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Rut 1:1-22

1  Na ini a ten di den krutuman+ ben e koti krutu, angriten+ ben kon de na ini a kondre. Dati meki wan man, en wefi, nanga den tu manpikin fu en froisi fu Betlehem+ na ini Yuda, go na Moab+ fu go tan drape wan pisi ten.  A man ben nen Elimeilek èn en wefi ben nen Naomi. Den tu manpikin fu Elimeilek ben nen Maklon nanga Kilion. Den ben de Efratasma+ fu Betlehem na ini Yuda. Te fu kaba den doro na ini a kondre Moab, dan den tan drape.  Baka wan pisi ten Elimeilek, a masra fu Naomi, dede. Na so Naomi tan nanga den tu manpikin fu en.  Bakaten den manpikin disi trow nanga uma fu Moab.+ A wan uma ben nen Orpa. A trawan ben nen Rut.+ Den tan drape sowan tin yari.  Baka wan pisi ten, Maklon nanga Kilion dede tu. Na so a kon pasa taki Naomi no ben abi masra moro èn taki a lasi den tu pikin fu en tu.  Ne Naomi nanga den wefi fu den manpikin fu en gowe libi Moab, bika Naomi ben de na Moab di a yere taki Yehovah poti prakseri na en pipel+ èn taki Gado ben e meki den feni nyanyan baka.+  Di Naomi gowe libi a presi pe a ben e tan,+ dan den wefi fu den manpikin fu en go nanga en. Na so den ala dri waka a pasi fu drai go baka na Yuda.  Ne Naomi taigi den tu uma: „Un drai go baka na un mama oso. Meki Yehovah sori unu bun-ati,+ neleki fa unu ben sori bun-ati gi mi nanga den masra fu unu di dede kaba.+  Meki Yehovah blesi+ unu, so taki ibriwan fu unu kan feni rostu na ini na oso+ fu en masra.” Ne a bosi+ den, dan den bari krei. 10  Ma doronomo den taigi Naomi: „Nôno, wi wani go nanga yu na a pipel fu yu.”+ 11  Ma Naomi taki: „Mi pikin, un drai gowe baka. Fu san ede unu wani kon nanga mi? Mi no man kisi manpikin moro di kan trow nanga unu.+ 12  Mi pikin, mi e begi unu. Un drai gowe baka, bika mi owru tumusi fu feni wan masra. Awinsi mi ben o feni wan masra tideneti ete èn awinsi mi ben o kisi manpikin,+ 13  dan unu ben o tan wakti teleki den kon bigi? Unu ben o man tan sondro masra teleki a ten dati? Nôno mi pikin, a e hati mi nofo kaba taki na fu di Yehovah drai baka gi mi, meki a sani disi pasa nanga unu.”+ 14  Ne den bari krei baka. Dan Orpa bosi a mama fu en masra èn a gowe, ma Rut tan nanga Naomi.+ 15  Dati meki Naomi taki: „Luku, a wefi fu yu swagri di dede, drai go baka na a pipel nanga den gado fu en.+ Go nanga en.”+ 16  Ne Rut piki: „No dwengi mi fu gowe libi yu èn fu drai go baka sondro yu. Pe yu e go, na drape mi o go. Pe yu e sribi te neti, na drape mi o sribi.+ Yu pipel o de mi pipel+ èn yu Gado o de mi Gado.+ 17  Pe yu o dede, na drape mi o dede+ èn na drape den o beri mi tu. Ma efu iniwan sani boiti dede prati mi nanga yu, dan meki Yehovah strafu mi èn meki a du moro leki dati srefi.”+ 18  Di Naomi si taki Rut ben de nomonomo fu go nanga en,+ dan a no taki noti moro. 19  Sobun, den ala tu waka go moro fara, teleki den doro na Betlehem.+ Fa den doro na ini Betlehem, ala sma na ini a foto fruwondru+ èn ibri tron baka den umasma ben e aksi: „A no Naomi?”+ 20  Ma te den uma ben e taki dati, dan a ben e taigi den: „No kari mi Naomi. Kari mi Mara, bika na Almaktiwan+ tyari soso sari kon na ini mi libi.+ 21  Di mi gowe, mi ben abi ala sani,+ ma Yehovah meki mi drai kon baka nanga soso anu.+ Fu san ede unu e kari mi Naomi, efu na Yehovah srefi gi mi syen+ èn efu na Almaktiwan srefi meki taki problema miti mi?”+ 22  Na so Naomi doro na a kondre fu en. Rut, a Moab uma di ben trow nanga en manpikin, ben de nanga Naomi tu di a drai kon baka fu Moab.+ Ne den doro na Betlehem+ na a ten fu a kotiwroko.*+

Futuwortu

Dati na a ten fu koti groto. Groto na wan sani di gersi aleisi.