Go na content

Go na table of contents

Yehovah Kotoigi

Tongo Sranantongo

Romesma 9:1-33

9  Leki bakaman fu Krestes, mi e taki san tru.+ Santa yeye e tiri mi konsensi èn mi konsensi e sori mi taki mi no e lei.+  Na ini mi ati mi e firi bigi sari nanga wan pen di no wani gowe.+  Bika mi e winsi taki fluku ben kan kon na mi tapu èn taki na mi ben o prati fu Krestes na presi fu mi brada,+ sobun den sma fu mi pipel.+  Den na Israelsma,+ den sma di Gado ben teki leki en manpikin+ èn di ben kisi glori.+ Nanga den a ben meki den frubontu,+ na den a ben gi a Wèt,+ na den ben kisi a grani fu du santa wroko+ gi en, èn na den a ben pramisi difrenti sani.+  Den nanga Krestes di saka kon leki wan libisma, abi den srefi afo.+ Gado+ di e tiri ala sani, musu kisi prèise fu têgo. Amen.  Ma a no de so, taki a wortu fu Gado no kon tru.+ Bika a no ala bakapikin fu Israel, na trutru Israelsma.+  Sosrefi, a no ala bakapikin fu Abraham na trutru bakapikin fu en,+ bika Gado Buku taki: „’Den bakapikin di mi pramisi yu’, o komoto fu Isak.”+  Sobun, a no ala den bakapikin+ fu Abraham na trutru pikin fu Gado,+ ma na soso den wan di a ben pramisi.+  Bika Gado ben pramisi disi: „Tra yari na a ten disi, mi o drai kon baka na yu. Dan yu wefi Sara o abi wan manpikin.”+ 10  Ma a no na a okasi dati wawan a ben meki wan pramisi. A ben du dati tu di Rebeka ben kon de nanga bere fu wi afo Isak èn a ben musu kisi wan twelengi.+ 11  Gado ben sori taki a no e teki sma fu den sani di den du, ma a e kari+ suma a wani. Dati meki di den boi no ben gebore ete èn di den no ben du nowan bun noso ogri,+ 12  a taigi Rebeka: „A moro owruwan o de a srafu fu a moro yonguwan.”+ 13  A de soleki fa Gado Buku taki: „Na Yakob mi ben lobi. Mi no ben lobi Esau.”+ 14  We, san wi sa taki dan? Wi kan taki dati Gado no e du san reti?+ Kwetikweti! 15  A taigi Moses: „Mi o sori bun-ati gi suma mi wani èn mi o abi sari-ati gi suma mi wani.”+ 16  We dan, a no e didon na a sma di wani, noso na a sma di e meki muiti, ma a e didon na Gado+ di abi sari-ati.+ 17  Gado Buku taki fu Farao, a kownu fu Egepte: „Mi meki yu tan na libi fu sori sma mi krakti èn fu meki sma na heri grontapu sabi mi nen.”+ 18  Sobun, efu a wani a kan abi sari-ati gi wan sma,+ ma efu a wani a kan libi wan sma tu meki a kon tranga-ede.+ 19  Kande yu o aksi mi: „Fu san ede a muilek so fu plisi Gado? Suma man tapu en fu du san a wani?”+ 20  Ma suma na yu, libisma,+ taki yu wani haritaki nanga Gado?+ Efu wan sma meki wan sani fu klèidoti, a sani sa taigi a sma di meki en: „Fu san ede yu meki mi na a fasi disi?”+ 21  Wan patu-bakriman+ abi a makti fu du san a wani nanga a klèidoti, a no so? A kan teki wan pisi klèidoti fu meki wan prapi di a e gebroiki gi wan prenspari wroko, ma a srefi pisi klèidoti a kan teki fu meki wan tra prapi gi wan lagi wroko, a no so?+ 22  We, na so a de tu nanga Gado. Gado wani puru atibron na sma tapu èn a wani sori a krakti fu en. Ma fu di a abi furu pasensi, meki a e libi den sma ete di e meki en ati bron èn di de leki prapi di musu kisi pori.+ 23  A du disi fu sori a bigi glori+ di a o gi den sma noso den prapi di a o sori sari-ati, bika a sreka den prapi disi na fesi fu gi den glori.+ 24  Wi na den prapi disi di a teki puru na mindri Dyu èn na mindri den trakondre sma.+ We efu dati na san a du, dan san dan? 25  A de soleki fa a taki tu na ini a buku fu Hosea: „Den sma di no de mi pipel,+ mi o kari ’mi pipel’, èn na uma di mi no ben lobi, mi o kari ’lobiwan’.+ 26  Na a presi pe mi ben taigi den: ’Unu no de mi pipel’, na drape mi o kari den ’manpikin fu a libilibi Gado’.”+ 27  Yesaya sosrefi ben bari taki fu Israel: „Awansi den Israelsma furu leki a santi na ini se,+ toku na soso den wan di tan abra o kisi frulusu.+ 28  Bika Yehovah o aksi den sma na grontapu fu gi frantwortu fu san den du. A o krutu den finifini èn a o du en esi-esi.”+ 29  Yesaya ben taki na fesi tu: „Efu Yehovah di e tiri den legre+ no ben meki wan tu pikin fu wi tan na libi, dan wi ben o tron neleki Sodom èn wi ben o de leki Gomora.”+ 30  We, san wi sa taki dan? Den trakondre sma no ben e du muiti fu de reti-ati sma. Ma toku Gado e si den leki reti-ati sma,+ fu di den abi bribi.+ 31  Den Israelsma ben e du muiti fu de reti-ati sma soleki fa a Wèt e sori. Ma toku den no ben hori a Wèt dati finifini.+ 32  Fu san ede? Bika den ben e denki taki a no bribi, ma na den sani di den du ben o meki den tron reti-ati sma.+ Den ben stotu den futu na a „ston di e meki sma stotu den futu”.+ 33  A de soleki fa Gado Buku taki: „Luku, na Sion mi e poti wan ston+ di e meki sma stotu den futu èn wan bigi ston di e meki sma fadon.+ Ma a sma di e bribi na ini en, no sa kisi syen.”+

Futuwortu