Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Romesma 2:1-29

2  Fu dati ede brada,+ awansi suma na yu, te yu e krutu trawan,+ yu no man taki dati yu no abi fowtu. Bika te yu e krutu trawan, dan yu e krutu yusrefi, fu di yu di e krutu trawan,+ e du den srefi sani dati tu.+  We, wi sabi taki te Gado o krutu den sma di e du den sani disi, a o krutu den na wan reti fasi.+  Brada,+ yu e krutu den sma di gwenti du den sani disi, ma yusrefi e du den tu. We, yu denki taki Gado no sa krutu yu?+  Noso yu e si en leki noti taki Gado abi so furu bun-ati,+ taki a e frudrage sani pasa marki+ èn taki a abi so furu pasensi?+ Na sabi yu no sabi taki na fu di Gado abi bun-ati, meki a e pruberi fu meki yu abi berow?+  Ma fu di yu tranga-ede+ so èn yu no abi berow,+ yu e meki Gado ati bron nanga yu moro nanga moro.+ A o strafu yu na a dei fu en bigi atibron+ te a o krutu sma na wan reti fasi.+  A o pai ibriwan sma gi den sani di a du.+  A o gi têgo libi na den sma di e tan du bun, fu di den e suku glori, grani, nanga wan skin di no man pori.+  Ma Gado en ati o bron trutru èn a o strafu den sma di lobi meki trobi,+ di no e du san reti+ èn di no wani arki den tru tori fu Gado.+  Banawtu nanga pina o miti ibri sma di e du ogri. A o miti den Dyu+ fosi èn a o miti den Grikisma tu.+ 10  Ma ala sma di e du bun o kisi glori, grani, nanga freide.+ Den Dyu o kisi den sani disi fosi+ èn den Grikisma o kisi den tu.+ 11  Bika Gado no lobi a wan sma moro a trawan.+ 12  Ala den sma di no abi Gado wèt èn di du sondu, o dede awinsi nowan wèt krutu den.+ Ma ala den sma di abi Gado wèt èn di du sondu,+ o kisi krutu nanga a wèt.+ 13  Bika a no den sma di yere a wèt, na sma di Gado feni bun. Den sma di Gado e si leki reti-ati sma,+ na den wan di e libi soleki fa a wèt e taki.+ 14  Den trakondre sma+ no abi a wèt fu Gado.+ Ma te den e du san a wèt e taki sondro fu den sabi,+ dan dati e sori taki a wèt de na ini den ati aladi den no abi wèt. 15  Na den srefi sma disi e sori taki a wèt skrifi na ini den ati.+ A konsensi+ fu den e sori dati tu. Den eigi prakseri e sori den taki den fowtu+ noso taki den no fowtu. 16  Na so a o de na a dei te Gado o meki Krestes Yesus krutu+ den sani di libisma+ du na wan kibri fasi.+ Na dati a bun nyunsu di mi e preiki e sori.+ 17  Yu e kari yusrefi wan Dyu,+ yu e frutrow na tapu wèt,+ èn yu e meki bigi taki yu na fu Gado.+ 18  Yu sabi san Gado wani+ èn yu sabi san bun, fu di sma leri yu a Wèt.+ 19  Yu e bribi taki yu musu sori breni sma a pasi,+ èn taki yu de wan leti gi den sma di de na ini dungru.+ 20  Yu e bribi taki yu musu sori den sma di no e gebroiki den frustan,+ san bun èn taki yu musu de leriman fu den nyofi pikin.+ Yu e bribi taki yu sabi den moro prenspari sani+ nanga tru tori+ na ini a Wèt. 21  Yu e gi trawan leri, ma yu no e leri yusrefi?+ Yu e preiki gi sma: „No fufuru”,+ ma yu e fufuru?+ 22  Yu e taki: „No du sutadu”,+ ma yu e du sutadu? Yu e taki dati yu e tegu gi falsi gado, ma yu e fufuru+ sani puru na ini den tempel? 23  Yu e meki bigi taki yu sabi a Wèt, ma yu e gi Gado syen fu di yu no e du san a Wèt+ e taki? 24  Bika „na fu unu ede Gado e kisi porinen na mindri den trakondre sma”,+ na so Gado Buku taki. 25  Fu taki en leti, soso te yu e du san a Wèt e taki, dan a besnèi*+ di yu besnèi wani taki wan sani.+ Ma efu yu e trangayesi a Wèt, dan awinsi yu besnèi,+ a de leki yu no besnèi.+ 26  Fu dati ede, efu wan sma di no besnèi,+ e du den bun sani di a Wèt e taki,+ dan a de leki a sma dati besnèi awinsi a no besnèi, a no so?+ 27  Fu dati ede, te wan sma no besnèi ma a e du san a Wèt e taki, dan a de leki a e krutu yu+ fu di yu e trangayesi a Wèt aladi yu sabi den wèt di skrifi èn yu besnèi. 28  Bika a no te wan sma gebore leki wan Dyu, dan en na wan trutru Dyu.+ A no te sma kan si na wan sma skin taki a besnèi, dan a besnèi trutru.+ 29  Ma san de na ini wan sma ati, na dati e meki taki a de wan trutru Dyu+ èn na en ati besnèi.+ A no wan wèt di skrifi meki taki a de so, ma na a yeye.+ A no libisma e prèise+ a sma dati, ma na Gado e prèise en.+

Futuwortu

Luku „Moro sani”, nr. 24.