Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Romesma 14:1-23

14  Nanga prisiri un musu teki wan sma di swaki+ na ini a bribi. No krutu en te a abi en eigi fasi fu si sani.+  A wan sma e bribi taki a kan nyan ala sani,+ ma a sma di swaki, e nyan gruntu.  A sma di e nyan, no musu wisiwasi a sma di no e nyan.+ A sma di no e nyan, no musu krutu a sma di e nyan, bika Gado teki a sma dati tu.  Suma na yu taki yu e krutu a futuboi fu wan tra sma?+ Na en eigi masra o taki efu a bun noso efu a no bun.+ Iya, a o du bun, bika Yehovah kan yepi en fu du dati.+  A wan sma feni taki a wan dei prenspari moro a trawan.+ Wan tra sma feni taki ala dei na a srefi.+ Ibri sma musu de seiker taki a sani di a e bribi, de tru.  Efu wan sma feni taki wan dei prenspari, dan meki a de wan dei fu gi Yehovah grani. Sosrefi, te wan sma e nyan, a e du dati fu gi Yehovah grani,+ bika a e taki Gado tangi.+ Te wan sma no e nyan, a e du dati fu gi Yehovah grani tu,+ bika a e taki Gado tangi tu.+  Fu taki en leti, nowan fu wi e libi soso gi ensrefi+ èn nowan sma e dede soso gi ensrefi.  Bika efu wi e libi, wi e libi gi Yehovah,+ èn efu wi e dede, wi e dede gi Yehovah.+ Fu dati ede, awansi wi e libi noso wi e dede, wi na fu Yehovah.+  Na fu dati ede Krestes dede èn na fu dati ede a kon na libi baka,+ so taki a ben kan de Masra fu den wan di dede+ èn fu den wan di e libi.+ 10  Ma fu san ede yu e krutu yu brada?+ Fu san ede yu e si yu brada leki wan soso sma? Wi alamala sa tanapu na fesi a krutuman-sturu+ fu Gado. 11  Bika Gado Buku taki: „’Neleki fa a de seiker taki mi e libi,’ Yehovah taki,+ ’na so a de seiker tu taki ibri kindi o boigi gi mi, èn ibri tongo o taki krin taki mi na Gado.’”+ 12  We, dati meki ibriwan fu wi o abi fu gi Gado frantwortu fu den sani di a du.+ 13  Fu dati ede, no meki wi krutu+ makandra moro, ma meki wi teki a bosroiti+ fu no poti wan sani na pasi gi wi brada+ di kan meki a fadon,+ noso di kan meki a lasi bribi. 14  Leki wan bakaman fu Masra Yesus, mi sabi èn mi e bribi taki nowan sani de di doti fu ensrefi.+ Ma efu wan sma denki taki wan sani doti, dan a doti gi en.+ 15  Efu yu e nyan wan sani èn dati e hati yu brada, dan yu no e sori lobi moro.+ No meki den sani di yu e nyan, pori a bribi fu a sma gi suma Krestes dede.+ 16  Fu dati ede, no meki sma taki takru fu den bun di unu e du. 17  Bika a no nyanyan noso dringi+ o meki taki wan sma go na ini Gado Kownukondre.+ Ma a musu de wan reti-ati sma,+ a musu libi bun nanga trawan,+ èn a musu de nanga prisiri.+ A santa yeye o yepi en fu de so wan sma. 18  Bika efu wan sma de wan srafu fu Krestes èn a e du den sani disi, dan Gado o feni en bun èn libisma o lespeki en.+ 19  Fu dati ede, meki wi du muiti fu libi bun nanga trawan+ èn fu du sani di e gi trawan deki-ati.+ 20  No pori a wroko fu Gado fu nyanyan ede.+ A tru taki ala sani krin, ma a no bun te wan sma e nyan wan sani di kan meki trawan fadon.+ 21  A bun fu no nyan meti, fu no dringi win, noso fu no du wan sani efu dati kan meki yu brada fadon.+ 22  Na yu nanga Gado wawan sabi san yu e bribi.+ Koloku fu a sma di no e krutu ensrefi te a bosroiti fu du wan sani di a feni bun. 23  Ma efu a e tweifri, dan a kisi krutu kaba te a e nyan,+ bika a no e nyan fu di a e bribi. Iya, ala sani di wan sma e du sondro fu bribi, na sondu.+

Futuwortu