Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Psalm 59:1-17

Gi a fesiman fu den sma di e prei „No kiri mi”-poku. Wan psalm fu David. Miktam.* David skrifi en di Saul seni wan tu boskopuman fu hori wakti na David oso, fu di Saul ben wani kiri en.+ 59  Mi Gado, mi e begi yu, frulusu mi puru na ini na anu fu den feanti fu mi.+ Kibri mi gi den sma di e opo kon feti nanga mi.+   Frulusu mi puru na ini na anu fu den sma di e du hati sani nanga trawan.+ Puru mi na ini na anu fu den wan di abi brudu-paiman,   Bika den e suku fu kiri mi.+ Den sma di tranga e suku fu du mi ogri.+ Yehovah, mi no gens nowan sma èn mi no du nowan sondu, ma toku den e du den sani disi nanga mi.+   Mi no du noti, ma toku den e feti fu kon du mi ogri.+ Mi e begi yu, opo te mi e kari yu èn poti prakseri na mi.+   Yu, Yehovah, a Gado di e tiri den legre, na a Gado fu Israel.+ Mi e begi yu, wiki èn luku san den pipel fu den tra kondre e du.+ No du bun gi den sma di e tori trawan fu hati den.+ Sela.   Ibri neti den e drai kon baka.+ Den e waka lontu na ini a heri foto,+ e bari leki dagu.+   Luku, na soso ogri den e taki nanga den mofo.+ Den mofo de leki wan feti-owru,+ Bika den e taki: „Suma e arki wi?”+   Ma yu, Yehovah, yu o lafu den.+ Yu o spotu ala den pipel fu den tra kondre.+   Mi Krakti, na yu mi o wakti fu yepi mi,+ Bika Gado na a bergi pe mi kan lon go kibri.+ 10  A Gado di sori mi bun-ati, o kon miti mi.+ Gado srefi o meki mi prisiri, fu di den feanti fu mi lasi a strei.+ 11  No kiri mi feanti ete, so taki mi pipel no frigiti den sani di yu du.+ Gebroiki a krakti fu yu fu meki den feanti disi wakawaka lontu fosi.+ Meki den fadon, Yehovah, yu di de a skelt fu wi,+ 12  Bika nanga den sani di den e taki, den sondu nanga den mofo.+ Meki a bigifasi fu den tron wan trapu gi den,+ Fu di den abi a gwenti fu kosi èn bedrigi trawan. 13  Pori den nanga bigi atibron.+ Pori den, so taki den no de moro. Meki den sabi taki na Gado e tiri Yakob èn taki na en e tiri heri grontapu sosrefi.+ Sela. 14  Meki den drai kon baka na neti. Meki den waka lontu na ini a heri foto, e bari leki dagu.+ 15  Meki den sma disi wakawaka lontu fu suku wan sani fu nyan.+ No meki den nyan den bere furu èn no meki den feni wan presi fu sribi.+ 16  Ma mi, mi o singi fu a krakti fu yu.+ Na mamanten mi o prisiri fu fruteri sma fu a bun-ati fu yu,+ Bika yu na wan bergi pe mi kan lon go kibri,+ Iya, wan presi pe mi kan lon go te mi de na nowtu.+ 17  Mi Krakti, mi o singi prèisesingi gi yu,+ Bika Gado na wan bergi pe mi kan lon go kibri, wan Gado di sori mi bun-ati.+

Futuwortu

Luku a marki na Ps 16, Ede.