Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Psalm 119:1-176

א [Alef] 119  Koloku fu den sma di e libi na wan reti fasi.+ Iya, koloku fu den sma di e du san a wèt fu Yehovah e taki.+   Koloku fu den sma di e du den sani di a ben memre den fu du.+ Nanga den heri ati den e tan suku en.+   Fu tru, den no du nowan kruktu sani.+ Den du san Gado taigi den.+   Gado, na yu taigi wi+ Fu hori den komando fu yu ala ten.+   Ke, fa mi e winsi taki mi ben kan tyari misrefi na wan reti fasi,+ So taki mi ben kan hori den markitiki fu yu!+   Dan mi no ben o abi fu firi syen+ Te mi e poti prakseri na ala den komando fu yu.+   Mi o prèise yu nanga wan krin ati,+ Te mi kon sabi den krutubosroiti fu yu di de reti.+   Mi e tan hori den markitiki fu yu.+ Mi e begi yu fu no gowe libi mi, so taki mi kon de mi wawan.+ ב [Bet]   Fa wan yonkuman kan libi wan krin libi?+ Soso te a tan na ai, soleki fa yu taki.+  10  Nanga mi heri ati mi suku yu.+ No meki mi gowe libi den komando fu yu.+  11  Den sani di yu taigi mi, mi kibri na ini mi ati leki wan gudu,+ So taki mi no sondu teige yu.+  12  Blesi fu yu, Yehovah. Leri mi den markitiki fu yu.+  13  Nanga mi mofobuba mi fruteri sma+ Ala den krutubosroiti di yu mofo taki.+  14  Mi breiti taki yu e memre mi na den wèt fu yu,+ Neleki fa sma breiti nanga den gudu fu den.+  15  Mi o poti prakseri na den komando fu yu.+ Iya, mi o poti prakseri na den pasi fu yu.+  16  Mi o sori taki mi lobi den wèt fu yu.+ Mi no o frigiti san yu taki.+ ג [Gimel]  17  Du bun gi a futuboi fu yu, so taki mi kan tan na libi+ Èn mi kan du san yu taki.+  18  Opo mi ai, so taki mi kan luku+ Den tumusi moi sani di skrifi na ini a wèt fu yu.+  19  Na kon mi kon tan na ini a kondre disi.+ No kibri den komando fu yu gi mi.+  20  Doronomo mi e angri+ so te fu yere den krutubosroiti fu yu,+ Taki mi kon weri.  21  Yu piri-ai gi den frufruktu heimemre sma+ Di e gowe libi den komando fu yu.+  22  Puru syen nanga spotu na mi tapu,+ Bika mi hori den wèt di yu ben memre mi fu hori.+  23  Srefi den heihei man kon makandra fu taki fa den kan du mi ogri.+ Ma a futuboi fu yu e poti prakseri na den markitiki fu yu.+  24  Mi lobi den wèt di yu memre mi fu hori.+ Den de gi mi leki sma di e gi mi rai.+ ד [Dalet]  25  Mi brokosaka so te, taki mi tan fasi na a doti fu gron.+ Hori mi na libi, soleki fa yu ben taki.+  26  Mi fruteri yu ala san mi du, so taki yu kan piki mi.+ Leri mi den markitiki fu yu.+  27  Meki mi kon frustan fa mi musu hori den komando fu yu,+ So taki mi kan poti prakseri na den tumusi moi sani di yu du.+  28  Mi ben e sari so te, taki mi no ben man sribi.+ Opo mi tanapu, soleki fa yu ben pramisi.+  29  Kibri mi fu mi no kori tra sma.+ Du bun gi mi èn meki mi kon sabi a wèt fu yu.+  30  Ala ten mi wani gi yesi na yu.+ Mi si taki den krutubosroiti fu yu bun.+  31  Mi tai hori na den wèt di yu ben memre mi fu hori.+ Ke Yehovah, no meki mi kisi syen.+  32  Mi o hori ala den komando fu yu,+ Fu di yu opo mi ati fu frustan sani moro bun.+ ה [He]  33  Yehovah, leri mi den markitiki fu yu,+ So taki mi kan hori den te na a kaba.+  34  Meki mi frustan a wèt fu yu, so taki mi kan hori en.+ Na so fasi mi kan gi yesi na en nanga mi heri ati.+  35  Meki mi hori den komando fu yu,+ Fu di mi e prisiri fu du dati.+  36  Meki mi ati gi yesi na den wèt di yu e memre mi fu hori.+ No meki mi suku wini nomo gi misrefi.+  37  No meki mi ai si sani di no bun.+ Yepi mi fu waka a pasi fu yu, so taki mi kan tan na libi.+  38  Du den sani di yu pramisi yu futuboi+ Di abi bigi lespeki gi yu.+  39  Den krutubosroiti fu yu bun.+ Sobun, no meki sma spotu mi, fu di mi frede a sani dati srefisrefi.+  40  Luku fa mi e angri fu yere den komando fu yu.+ Yu na wan Gado fu retidu. Sobun, hori mi na libi.+ ו [Waw]  41  Yehovah, mi e begi yu fu sori mi bun-ati.+ Frulusu mi soleki fa yu ben pramisi.+  42  Na so fasi mi kan piki den wan di e kosi mi,+ Bika mi sabi taki den sani di yu pramisi, o kon tru.+  43  Mi e begi yu fu no puru den tru tori na mi mofo krinkrin,+ Bika na yu mi e wakti fu koti krutu gi mi.+  44  Doronomo mi o du san a wèt fu yu e taki.+ Mi o du dati fu ala ten, iya, fu têgo.+  45  Mi o waka lontu na wan presi pe mi kan de fri,+ Bika mi suku fu kon sabi den komando fu yu.+  46  Srefi te mi de na fesi kownu, mi o fruteri den fu den wèt fu yu.+ Mi no o syen.+  47  Mi o prisiri nanga den komando fu yu+ Di mi lobi.+  48  Mi o opo mi anu go na loktu fu begi yu, fu di mi lobi den komando fu yu.+ Mi o poti prakseri na den markitiki fu yu.+ ז [Sayin]  49  Memre den sani di yu pramisi a futuboi fu yu.+ Iya, na den sani dati yu ben meki mi wakti.+  50  Na den sani disi e trowstu mi te mi de na nowtu,+ Bika na den sani di yu taki, hori mi na libi.+  51  Den heimemre sma spotu mi so te, taki mi no ben man tyari en moro.+ Ma mi no gowe libi a wèt fu yu.+  52  Yehovah, mi e memre den krutubosroiti di yu gi wi sensi ten.+ Den e trowstu mi.+  53  Mi ati kon bron srefisrefi nanga den ogri sma+ Di gowe libi a wèt fu yu.+  54  Awinsi na ini sortu kondre mi go tan,+ Den markitiki fu yu kon de leki poku gi mi.+  55  Yehovah, na netiyuru mi prakseri a nen fu yu,+ So taki mi kan hori a wèt fu yu.+  56  Fu di mi hori den komando fu yu, Meki ala den sani disi pasa nanga mi.+ ח [Ket]  57  Yehovah, yu na a gudu fu mi.+ Mi pramisi fu du san yu taki.+  58  Nanga mi heri ati mi begi yu fu abi sari-ati nanga mi.+ Du bun gi mi, soleki fa yu ben pramisi.+  59  Mi poti prakseri na den sani di mi du,+ So taki mi kan hori den wèt baka, di yu ben memre mi fu hori.+  60  Mi meki esi. Iya, mi no draidrai+ Fu hori den komando fu yu.+  61  Den ogri sma tai mi hori nanga den titei fu den.+ Ma mi no frigiti a wèt fu yu.+  62  Mindrineti mi e opo fu taki yu tangi+ Gi a reti fasi fa yu e koti krutu.+  63  Mi na wan mati fu ala den sma di abi lespeki gi yu+ Èn fu den wan di e hori den komando fu yu.+  64  Yehovah, a bun-ati fu yu de fu si na heri grontapu.+ Leri mi den markitiki fu yu.+ ט [Tet]  65  Yehovah, yu du bun gi a futuboi fu yu,+ Soleki fa yu ben pramisi.+  66  Leri mi fa fu du bun,+ fa fu gebroiki mi frustan+ èn fa fu waka nanga koni,+ Bika mi bribi den komando fu yu.+  67  Fosi mi ben e pina, mi ben sondu, ma mi no ben du dati fu espresi.+ Ma now mi e du san yu taki.+  68  Yu na wan bun Gado èn yu e du bun tu.+ Leri mi den markitiki fu yu.+  69  Den heimemre sma lei gi mi fu gi mi porinen.+ Ma mi o hori den komando fu yu nanga mi heri ati.+  70  Na ati fu den kon tranga leki ston, so taki a no man firi moro.+ Ma mi lobi a wèt fu yu.+  71  A bun gi mi taki sma pina mi,+ Bika na so mi kan kon sabi den markitiki fu yu.+  72  A wèt+ di komoto na ini yu mofo, bun gi mi,+ Iya, moro leki dusundusun pisi gowtu nanga solfru.+ י [Yod]  73  Yu meki mi nanga yu eigi anu. Iya, na yu anu meki mi leki fa mi de.+ Yepi mi fu kisi frustan, so taki mi kan leri den komando fu yu.+  74  Den sma di abi bigi lespeki gi yu, na den wan di e si mi èn den e prisiri,+ Bika na yu mi e wakti fu taigi mi san fu du.+  75  Yehovah, mi sabi heri bun taki yu e koti krutu na wan reti fasi+ Èn taki yu piri-ai gi mi, fu di ala ten yu e du san yu pramisi.+  76  Mi e begi yu, meki a bun-ati fu yu trowstu mi,+ Soleki fa yu ben pramisi a futuboi fu yu.+  77  Abi sari-ati nanga mi, so taki mi kan tan na libi,+ Bika mi lobi a wèt fu yu.+  78  Meki den heimemre sma kisi syen, bika den kori mi, aladi mi no du noti.+ Ma mi e poti prakseri na den komando fu yu.+  79  Meki den wan di abi lespeki gi yu, drai kon baka na mi,+ Iya, ala den sma di sabi den wèt di yu memre den fu hori.+  80  Yepi mi fu hori ala den markitiki fu yu,+ So taki mi no kisi syen.+ כ [Kaf]  81  Mi wakti solanga fu yu frulusu mi, taki mi kon weri.+ Na yu mi e wakti fu taigi mi san fu du.+  82  Mi ai e angri fu si fa den sani di yu pramisi, o kon tru.+ Mi e tan aksi misrefi: „O ten yu o trowstu mi?”+  83  Mi kon de leki wan lerisaka*+ di anga na ini smoko. Mi no frigiti den markitiki fu yu.+  84  O langa a futuboi fu yu musu wakti?+ O ten yu o strafu den wan di e frufolgu mi?+  85  Den heimemre sma diki olo fu meki mi fadon go na ini,+ Iya, den wan di no e gi yesi na a wèt fu yu.+  86  Ala den komando fu yu de fu frutrow.+ Mi no du noti, ma den frufolgu mi. Mi e begi yu, yepi mi.+  87  Efu den ben kisi na okasi, den ben o kiri mi puru na grontapu.+ Ma noiti mi gowe libi den komando fu yu.+  88  Yu na wan Gado di e sori sma bun-ati. Sobun, hori mi na libi,+ So taki mi kan tan du den sani di yu memre mi fu du.+ ל [Lamed]  89  Yehovah, neleki fa hemel e tan fu ala ten,+ Na so den sani di yu e taki e tan fu ala ten.+  90  Sensi ten yu e du san yu pramisi.+ Yu poti grontapu steifi na en presi, so taki a no degedege.+  91  Te na a dei fu tide hemel nanga grontapu de ete, soleki fa yu ben bosroiti,+ Bika den alamala na yu futuboi.+  92  Efu a ben de taki mi no ben lobi a wèt fu yu,+ Dan mi ben o abi fu pina teleki mi ben o dede te fu kaba.+  93  Noiti mi o frigiti den komando fu yu,+ Bika nanga den komando disi yu hori mi na libi.+  94  Mi na fu yu. Mi e begi yu, frulusu mi,+ Bika mi du muiti fu hori den komando fu yu.+  95  Na mi den ogri sma ben e luru fu kiri.+ Doronomo mi e poti prakseri na den sani di yu e memre mi fu du.+  96  Mi kon si taki ala sani di bun dorodoro abi wan kaba,+ Ma den komando fu yu bun gi ala sani. מ [Mem]  97  Mi lobi a wèt fu yu srefisrefi.+ Heri dei mi e poti prakseri na en.+  98  Den komando fu yu e meki mi koni moro den feanti fu mi,+ Fu di mi e poti prakseri na den ala ten.+  99  Mi kon frustan sani moro krin leki ala den leriman fu mi,+ Bika mi e poti prakseri na den wèt di yu e memre mi fu hori.+ 100  A fasi fa mi e tyari misrefi e sori taki mi abi moro frustan srefi leki den man di grani kaba,+ Fu di mi gi yesi na den komando fu yu.+ 101  Mi sorgu taki mi no du nowan ogri,+ Fu di mi wani tan du san yu taki.+ 102  Mi no gowe libi den krutubosroiti fu yu,+ Bika na yu ben gi mi leri.+ 103  Den sani di yu taki, switi gi a tapusei fu mi inimofo.+ Iya, den switi moro oni na ini mi mofo srefi! 104  Na den komando fu yu e meki mi tyari misrefi na wan koni fasi.+ Dati meki mi koti pasi gi bedrigi fasi.+ נ [Nun] 105  Yu wortu na wan lampu gi mi futu+ Èn wan leti na tapu mi pasi.+ 106  Mi meki wan sweri èn mi o du san mi sweri fu du.+ Iya, mi o gi yesi na yu krutubosroiti di de reti.+ 107  Sma pina mi srefisrefi.+ Ke Yehovah, hori mi na libi soleki fa yu ben pramisi.+ 108  Yehovah, mi e begi yu, prisiri nanga den ofrandi fu mi mofo, di mi e tyari gi yu fu di misrefi wani+ Èn leri mi den krutubosroiti fu yu.+ 109  Doronomo sani e pasa di kan meki mi lasi mi libi.+ Toku mi no frigiti a wèt fu yu.+ 110  Den ogri sma seti wan trapu gi mi,+ Ma mi no gowe libi den komando fu yu.+ 111  Den wèt di yu e memre mi fu hori, mi e si leki wan gudu fu ala ten.+ Den e meki mi ati prisiri.+ 112  Mi meki mi ati gi yesi na den markitiki fu yu+ Mi heri libi langa, iya, teleki mi dede.+ ס [Samek] 113  Mi abi bita-ati gi den sma di no e du sani nanga den heri ati,+ Ma mi lobi a wèt fu yu.+ 114  Yu na mi kibripe èn mi skelt.+ Na yu mi e wakti fu taigi mi san fu du.+ 115  Un ogri sma, un komoto na mi tapu,+ So taki mi kan hori den komando fu mi Gado.+ 116  Horibaka gi mi leki fa yu ben pramisi mi, so taki mi kan tan na libi.+ Mi frutrow na yu tapu. Sobun, no meki mi kisi syen.+ 117  Horibaka gi mi, so taki mi kan kisi frulusu.+ Dan mi o poti prakseri na den markitiki fu yu doronomo.+ 118  Ala den sma di drai baka gi den markitiki fu yu, yu trowe gowe,+ Fu di den e kori sma èn den e lei.+ 119  Ala den ogri sma fu grontapu, yu e figi puru leki fa wan sma e figi skuma puru di e kuku kon na tapu.+ Na fu dati ede mi lobi den wèt di yu e memre mi fu hori.+ 120  Fu di mi frede yu, meki mi skin ben e beifi.+ Na den krutubosroiti fu yu ben meki mi kon frede.+ ע [Ayin] 121  Mi koti krutu na wan reti fasi èn mi du san reti.+ Mi begi yu fu no libi mi gi den sma di e bedrigi mi!+ 122  Horibaka gi a futuboi fu yu, so taki sani kan waka bun gi en.+ No meki den heimemre sma bedrigi mi.+ 123  Mi ai weri fu wakti a frulusu fu yu èn a fasi fa den reti pramisi fu yu o kon tru.+ Na so mi wakti fu yere den reti krutu fu yu.+ 124  Sori a futuboi fu yu bun-ati, fu di yu lobi en.+ Leri mi den markitiki fu yu.+ 125  Mi na yu futuboi.+ Meki mi frustan+ den wèt di yu memre mi fu hori,+ So taki mi kan sabi den. 126  A ten doro gi Yehovah fu du wan sani.+ Sma trangayesi a wèt fu yu.+ 127  Na fu dati ede mi lobi den komando fu yu+ Moro leki gowtu, iya, moro leki soifri gowtu.+ 128  Dati meki mi si ala den komando fu yu leki sani di reti.+ Mi e koti pasi gi ala bedrigi fasi.+ פ [Pe] 129  Den wèt di yu e memre mi fu hori, bun srefisrefi.+ Dati meki mi gi yesi na den.+ 130  Te yu e tyari den wortu fu yu kon na krin, dan dati e gi leti+ Fu meki den sma di no abi ondrofeni, kisi frustan.+ 131  Mi bradi mi mofo opo, fu di mi bro de na tapu,+ Soso fa mi angri fu yere den komando fu yu.+ 132  Poti prakseri na mi èn du bun gi mi.+ Koti krutu gi mi leki fa yu e koti krutu gi sma di lobi yu nen.+ 133  Poti mi futu steifi na ini yu wortu.+ No meki nowan hati sani basi mi.+ 134  Frulusu mi puru na a anu fu iniwan sma di e bedrigi mi.+ Dan mi o hori den komando fu yu.+ 135  Du bun gi a futuboi fu yu.+ Leri mi den markitiki fu yu.+ 136  Watra lon na mi ai leki liba,+ Fu di sma no hori a wèt fu yu.+ צ [Tsade] 137  Yehovah, ala ten yu e du san reti.+ Den krutubosroiti fu yu de reti ala ten.+ 138  Yu na wan Gado fu retidu èn ala ten yu e du san yu pramisi.+ Dati meki yu gi wi a komando fu hori den wèt+ fu yu. 139  Mi kon de nanga moro faya gi yu,+ Di mi si taki den feanti fu mi no e du san yu taki.+ 140  Den sani di yu e taki, de soifri dorodoro+ Èn a futuboi fu yu lobi den.+ 141  Mi no prenspari èn sma e wisiwasi mi.+ Toku mi no frigiti den komando fu yu.+ 142  A retidu fu yu e tan fu ala ten+ Èn a wèt fu yu de tru.+ 143  Mi ben bruya èn mi ben abi furu problema,+ Ma mi ben lobi den komando fu yu.+ 144  Den wèt fu yu reti ala ten.+ Yepi mi fu kon frustan den, so taki mi kan tan na libi.+ ק [Kof] 145  Nanga mi heri ati mi bari kari yu.+ Yehovah, mi e begi yu, piki mi.+ Mi o gi yesi na den markitiki fu yu.+ 146  Mi bari kari yu. Mi e begi yu, frulusu mi!+ Dan mi o hori den wèt di yu memre mi fu hori.+ 147  Fruku mamanten, bifo deibroko,+  mi opo fu bari kari yu fu yepi mi.+ Na yu mi e wakti fu taigi mi san fu du.+ 148  Mindrineti mi wiki+ Fu poti prakseri na den sani di yu taki.+ 149  Yu na wan Gado di e sori sma bun-ati. Sobun, mi e begi yu, arki mi sten.+ Yehovah, hori mi na libi, bika yu e koti krutu na wan reti fasi.+ 150  Den wan di de nomonomo fu du ogri sondro fu syen,+ kon krosibei fu mi. Den gowe libi den wèt fu yu.+ 151  Yehovah, yu de krosibei fu mi,+ Èn ala den komando fu yu de tru.+ 152  Sensi ten mi sabi sonwan fu den wèt fu yu.+ Yu seti den wèt disi fu den kan tan fu ala ten.+ ר [Resj] 153  Luku fa mi e pina èn frulusu mi,+ Bika mi no frigiti a wèt fu yu.+ 154  Koti krutu gi mi. Yepi mi.+ Hori mi na libi, soleki fa yu ben pramisi.+ 155  Den ogri sma no o kisi frulusu,+ Bika den no du muiti fu gi yesi na den markitiki fu yu.+ 156  Yehovah, yu na wan Gado di abi furu sari-ati.+ Hori mi na libi, bika yu e koti krutu na wan reti fasi.+ 157  Den wan di e frufolgu mi èn den feanti fu mi furu srefisrefi.+ Ala ten mi gi yesi na den wèt di yu memre mi fu hori.+ 158  Mi si den sma di e bedrigi trawan.+ Mi e tegu gi den, fu di den no du san yu taki.+ 159  Luku fa mi lobi den komando fu yu.+ Yehovah, yu na wan Gado di e sori sma bun-ati. Sobun, hori mi na libi.+ 160  Ala sani di yu taki, de tru.+ Den krutubosroiti fu yu de reti èn den e tan fu ala ten.+ ש [Sin] noso [Syin] 161  Den heihei man frufolgu mi, aladi mi no du noti.+ Ma mi abi bigi lespeki gi den sani di yu taki.+ 162  Neleki fa wan sma e prisiri te a feni furu gudu,+ Na so mi e prisiri nanga den sani di yu taki.+ 163  Mi no lobi lei kwetikweti.+ Mi e tan si dati leki wan tegu sani.+ Mi lobi a wèt fu yu.+ 164  Seibi tron wan dei mi prèise yu,+ Fu di yu e koti krutu na wan reti fasi.+ 165  Den wan di lobi yu wèt o abi freide pasa marki.+ Noti o meki den naki futu.+ 166  Yehovah, mi wakti yu fu frulusu mi.+ Mi gi yesi na den komando fu yu.+ 167  Mi hori den wèt di yu ben memre mi fu hori.+ Mi lobi den srefisrefi.+ 168  Mi hori den komando fu yu èn den wèt di yu ben memre mi fu hori,+ Bika yu e si ala san mi e du.+ ת [Taw] 169  Ke Yehovah, yere fa mi e kari yu fu yepi mi.+ Meki mi kisi frustan, soleki fa yu ben pramisi.+ 170  Arki mi te mi e begi yu fu du bun gi mi.+ Frulusu mi, soleki fa yu ben pramisi.+ 171  Meki mi prèise yu nanga mi mofo,+ Bika yu e leri mi den markitiki fu yu.+ 172  Meki mi mofo singi fu den sani di yu taki,+ Bika ala den komando fu yu bun.+ 173  Mi e begi yu, langa yu anu fu yepi mi,+ Bika mi wani gi yesi na den komando fu yu.+ 174  Yehovah, mi ben e angri fu yu frulusu mi.+ Mi lobi a wèt fu yu.+ 175  Hori mi na libi, so taki mi kan prèise yu.+ Meki den krutubosroiti fu yu yepi mi.+ 176  Mi waka lontu leki wan lasi skapu.+ Mi e begi yu fu suku mi, a futuboi fu yu,+ Bika mi no frigiti den komando fu yu.+

Futuwortu

Luku a marki na Ps 56:8.