Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Preikiman 12:1-14

12  Sobun, memre yu Gran Mekiman+ na ini yu yongu yari,+ fosi den dei kon di lai nanga sari,+ noso fosi den yari doro pe yu o taki: „Mi no e prisiri nanga a libi.”+  Memre en, fosi a leti fu a son, a mun, nanga den stari kon dungru+ èn fosi na alenten tyari wolku nanga bigi alen kon.  Memre en, fosi a ten doro taki den waktiman fu na oso+ e beifi èn den tranga man boigi densrefi.+ Memre en, fosi den uma di e mara sani+ tapu fu wroko fu di den no furu moro èn fosi den uma di de na den fensre e luku go na dorosei+ feni taki a dungru.  Memre en, fosi den doro pe sma musu waka fu go na strati kon tapu+ èn a babari fu a miriston kon swaki.+ Memre en, fosi a ten doro taki sma e opo te den yere wan fowru e froiti èn ala umapikin e singi nanga wan safri sten.+  Boiti dati, sma e kon frede kaba te den e si nomo taki wan sani hei. Den e frede tu gi ogri di kan miti den na pasi. Na amandrabon abi bromki+ èn a sprenka e waka nanga bun furu muiti. Noti no e tesi switi* moro. Libisma e waka go na den oso+ pe den o tan wan langa ten èn sma e waka lontu na strati. Den e sari èn den e krei.+  Memre Gado, fosi den puru a solfru titei, fosi den naki a gowtu komki broko pisipisi,+ fosi den broko a watrakan di de na a watra-olo èn fosi den naki a sani broko di e hari a watra na ini a watrabaki kon na tapu.  Dan a doti e drai go baka na a gron,+ na a presi pe a ben de fosi. A libikrakti+ e drai go baka na a tru Gado+ di ben gi en na libisma.+  A leriman taki:+ „Disi na a moro bigi soso sani di de! Ala sani na soso sani.”+  Boiti taki a leriman ben kon koni,+ a ben e tan leri a pipel nyun sani tu.+ A ben e prakseri dipi fu sani èn a ben e ondrosuku sani finifini,+ so taki a ben kan skrifi furu odo poti tapu papira.+ 10  A leriman ben e suku fu feni switi wortu+ èn fu skrifi soifri san tru.+ 11  Den sani di koni sma e taki, de leki srapu tiki+ di sma e teki fu dyuku kaw meki den waka. Den sma di lobi poti prakseri na odo di tyari kon na wán, de leki spikri di naki go na ini udu.+ Den odo disi komoto fu wán skapuman+ nomo. 12  Mi manpikin, boiti ala den sani disi, mi e warskow yu: Noiti sma o kaba skrifi furu buku, èn te wan sma e poti tumusi furu prakseri na den, dan dati e weri skin.+ 13  Now di mi taki ala sani kaba, a moro prenspari sani na disi: Lespeki a tru Gado+ èn hori den komando+ fu en, fu di dati na san libisma musu du, 14  bika a tru Gado srefi o krutu ala sani di sma e du, sosrefi ibri sani di tra sma no man si, awinsi na wan bun sani noso wan takru sani.+

Futuwortu

Dyaso a Hebrewtongo e taki fu wan pikin froktu di sma ben e nyan fu wiki a lostu fu nyan. Bakratongo: „kapperbes.”