Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Odo 29:1-27

29  Wan man di kisi piri-ai someni leisi,+ ma di e tan nanga a tranga-ede+ fu en o kisi pori wantronso. Dresi no o de gi en.+  Te den reti-ati sma e kon furu, dan a pipel e prisiri,+ ma te wan ogri sma e tiri, dan a pipel e soktu.+  Wan man di lobi koni e meki en papa prisiri,+ ma a sma di e waka nanga huru-uma e pori sani di warti.+  Te wan kownu e tiri na wan reti fasi, dan wan kondre e drai bun,+ ma wan man di e teki tyuku e broko wan kondre te na gron.+  Wan man di e kori en mati+ e span wan nèt gi en, so taki a mati kan waka go na ini.+  Den ogri di wan takru-ati sma e du de wan trapu gi en,+ ma a sma di e du san reti e bari fu prisiri èn a breiti srefisrefi.+  Wan reti-ati sma e luku fa trawan kan du san reti gi den mofinawan.+ Ma ogri sma no e prakseri a sani disi kwetikweti.+  Sma di e meki bigi kan sutu faya gi wan foto,+ ma den sma di koni e kowru atibron.+  Te wan koni sma e tyari wan donman go na krutu, dan a donman e kisi atibron èn a e lafu. Na so fasi soso problema o miti a koni sma.+ 10  Man di lobi fu kiri trawan abi bita-ati gi ala sma di e du bun.+ Ma den krin-ati sma e suku fu kibri a libi fu den wan di e du bun.+ 11  Wan donman no man hori ensrefi, ma a sma di koni no e bruya.+ 12  Te wan tiriman e poti prakseri na lei, dan ala den futuboi fu en o de ogri sma.+ 13  A sma di pôti èn a sma di e pina trawan miti makandra,+ ma Yehovah e meki taki den man tan na libi.+ 14  Efu wan kownu e koti krutu gi den mofina sma na wan reti fasi,+ dan a o tiri leki kownu fu ala ten.+ 15  A tiki nanga piri-ai e meki wan sma koni.+ Ma te sma e gi wan pikin pasi fu du san a wani, a o gi en mama syen.+ 16  Te den ogri sma e kon furu, dan ogridu e kon furu tu. Ma den sma di e du san reti o si fa den ogriwan o fadon.+ 17  Piri-ai gi a manpikin fu yu, dan a o gi yu rostu èn yu o prisiri trutru.+ 18  Efu wan pipel no e suku a tiri fu Gado, dan den o du san den wani,+ ma koloku fu den wan di e hori a wèt.+ 19  Wan futuboi no o arki te sma e bari en nomo,+ bika a e frustan, ma a no e gi yesi.+ 20  Yu si wan man di gaw tumusi fu taki san a e denki?+ Moro howpu de gi wan sma sondro frustan leki gi en.+ 21  Efu wan sma pori en futuboi sensi en yongu yari, dan bakaten a futuboi no o de nanga tangi. 22  Wan man di ati e bron esi e meki trobi kon+ èn wan sma di ati faya e meki furu fowtu.+ 23  Heimemre o meki libisma kisi syen,+ ma a sma di abi sakafasi o kisi glori.+ 24  A sma di e horibaka gi wan fufuruman no lobi ensrefi.+ Kande sma kari en na fesi krutu,* ma toku a no e go taigi sma san a yere.+ 25  Te yu frede libisma, dan dati o de wan trapu gi yu,+ ma a sma di e frutrow na tapu Yehovah o kisi kibri.+ 26  Furu sma e du sani fu meki wan tiriman feni den bun,+ ma na Yehovah e krutu libisma.+ 27  Reti-ati sma e tegu gi wan man di no e du san reti.+ Wan ogri sma e tegu gi wan sma di e waka a reti pasi nanga wan krin ati.+

Futuwortu

Noso: „kande a yere wan sweri di abi fu du nanga wan fluku.”