Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Odo 27:1-27

27  No dyaf fu a dei di musu kon ete,+ bika yu no sabi san o pasa tamara.+  No prèise yusrefi, ma meki tra sma prèise yu. A no yusrefi musu du dati, ma meki tra sma du en.+  Wan ston hebi èn wan lai santi+ e wegi furu, ma te wan donman e tanteri trawan, dan dati hebi moro den tu sani disi.+  Atibron kan meki wan sma du ogri-ati sani èn faya-ati kan moro wan sma.+ Ma suma man kakafutu gi dyarusu?+  A moro betre fu piri-ai gi wan sma na fesi trawan,+ leki fu kibri yu lobi gi en.  Den soro di wan mati e meki, na fu a bun fu yu.+ Ma den bosi fu wan feanti, na sani di yu abi fu begi fu den.+  Wan sma di nyan en bere furu o waka na tapu na oni fu wan onigodo, ma gi wan sma di de nanga angri ala bita sani e tesi switi.+  Leki fa wan fowru e frei gowe fu en nesi,+ na so a de nanga wan man di e lowe komoto na en tanpe.+  Oli nanga switismeri+ e prisiri na ati. Na so a de tu nanga a switifasi fu wan mati di e gi bun rai.+ 10  No gowe libi yu mati, noso a mati fu yu papa. No go na ini na oso fu yu brada te nowtu miti yu. Wan birtisma di de krosibei betre moro wan brada di de farawe.+ 11  Mi manpikin, de koni èn meki mi ati prisiri,+ so taki mi kan gi wan piki na a sma di e spotu mi.+ 12  A koniwan di si taki ogri o miti en lon go kibri.+ Ma a sma sondro ondrofeni waka go doro èn dati meki a kisi en strafu.+ 13  Efu wan sma tan borgu gi wan trawan di a no sabi, dan yu musu teki a krosi fu en.+ Efu a de wan man di ben go na wan huru-uma, dan yu musu teki wan sani fu en leki panti.+ 14  Efu wan man blesi wan sma fruku mamanten nanga wan tranga sten, dan a sma kan si dati leki wan fluku.+ 15  Wan wefi di lobi meki trobi de leki wan daki di e leki èn di e meki wan sma komoto na ini en oso te alen e fadon heri dei.+ 16  Fu pruberi basi en, na a srefi leki fu pruberi fu basi a winti. Na soso oli o de na ini a reti-anu fu a sma. 17  Neleki fa isri e srapu isri, na so a wan man e yepi wan trawan fu kon moro srapu.*+ 18  A sma di e sorgu bun gi en figabon o nyan den froktu fu en.+ A sma di e kibri en basi o kisi glori.+ 19  Leki fa wan sma man si en fesi na ini watra, na so wan sma man si ensrefi na ini wan trawan. 20  Sani no e sari+ Grebi* nanga a presi pe sma e kisi pori.+ Na so sani no e sari den ai fu wan libisma.+ 21  A patu pe sma gwenti smèlter sani, na fu meki solfru kon soifri+ èn na onfu na fu meki gowtu kon soifri.+ A glori di wan sma e kisi e sori suma a de.+ 22  Awinsi yu ben o poti wan donman na ini wan mata fu stampu en kon fini makandra nanga aleisi, yu no ben o man puru a don fu en.+ 23  Yu musu fu sabi fa a e go nanga na ipi fu yu. Poti prakseri na den meti fu yu,+ 24  bika gudu no o tan fu ala ten+ èn wan kownu-ati no e go fu a wan bakapikin na a trawan fu têgo. 25  Grun grasi kon drei èn nyun grasi opo kon. Sma tyari a grasi fu den bergi kon na wán.+ 26  A wiwiri fu yongu manskapu na fu meki yu krosi.+ Nanga bokoboko yu kan bai wan gron. 27  Nofo krabitamerki de fu meki nyanyan-sani gi yu nanga yu osofamiri. Nofo nyanyan-sani+ de gi den umasrafu fu yu.

Futuwortu

Noso: „na so wan man e srapu wan trawan.”
Hebrew wortu: syeol. Luku „Moro sani”, nr. 10.