Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Odo 15:1-33

15  Wan safri piki e kowru bigi atibron,+ ma te wan sma e taki sani fu hati trawan, dan dati e meki sma kisi atibron.+  Wan koni sma e taki fu den bun sani di a sabi,+ ma den wan di no abi frustan e taki soso dondon sani nanga den mofo.+  Den ai fu Yehovah e si ala sani.+ A e si den wan di e du ogri èn den wan di e du bun.+  Te wan sma e taki na wan switi fasi, dan dati na wan bon di e gi libi,+ ma te wan sma e taki sani fu bedrigi trawan, dan dati e broko sma saka.+  Ibri don sma ati e bron te en papa e bari en,+ ma ibri sma di e teki piri-ai, koni.+  Den maksin na ini na oso fu a reti-ati sma lai sani,+ ma a nyanyan di na ogri sma e koti e tyari soso problema kon.+  Koni sma e fruteri trawan koni sani,+ ma na ati fu den don sma no e prakseri so.+  Den srakti-ofrandi fu den ogri sma na wan tegu sani gi Yehovah,+ ma den begi fu den krin-ati sma e gi en prisiri.+  A pasi fu na ogri sma de wan tegu sani gi Yehovah,+ ma a lobi a sma di e meki muiti fu du san reti.+ 10  A sma di e gowe libi a bun pasi e si piri-ai leki wan takru sani.+ Ibriwan sma di no lobi piri-ai o dede.+ 11  Efu Grebi* nanga a presi pe sma e kisi pori+ de leti na fesi Yehovah,+ dan a no de fu taki dati disi de so tu nanga na ati fu den manpikin fu libisma!+ 12  A spotuman no lobi a sma di e piri-ai gi en.+ A no o go suku rai na den koniwan.+ 13  Wan ati di e prisiri e meki a fesi brenki,+ ma wan ati di e sari e meki wan sma firi brokosaka.+ 14  Na ati di abi frustan e suku fu kon sabi a fini fu wan tori,+ ma den don sma wani taki dondon sani nomonomo.+ 15  Den heri libi langa na soso problema e miti den mofinawan,+ ma gi den sma di e prisiri na ini den ati, a gersi leki a de wan fesa ala ten.+ 16  A moro betre fu lespeki Yehovah èn fu abi pikinso nomo,+ leki fu abi furu gudu di e tyari soso broko-ede kon.+ 17  A moro betre fu nyan wan preti nanga gruntu na wan presi pe lobi de,+ leki fu nyan wan fatu mankaw na wan presi pe bita-ati de.+ 18  Wan man di ati e bron e meki soso trobi,+ ma wan man di ati no e bron esi e kowru wan trobi.+ 19  A pasi fu wan lesiman de leki wan skotu fu makabon,+ ma a pasi fu den krin-ati sma na wan bigi, bradi pasi di no abi olo-olo.+ 20  Wan koni manpikin e gi en papa prisiri,+ ma wan don sma e wisiwasi en mama.+ 21  Wan sma di no e waka nanga koni e prisiri te a e du dondon sani,+ ma a sma di man si sani krin e tan waka a reti pasi.+ 22  Te sma no e taki krin nanga makandra, ala sani e bruya,+ ma te furu raiman de, sani e waka bun.+ 23  Wan man e prisiri te a gi wan bun piki+ èn wan sani di taki na a yoisti ten, bun srefisrefi.+ 24  Gi wan sma di e waka nanga koni, a pasi fu libi e go na tapusei,+ so taki a no saka go na ondrosei na ini Grebi.+ 25  Yehovah o broko na oso puru fu den wan di e hei densrefi,+ ma a o taki o bigi a gron musu de fu na uma di masra dede kaba.+ 26  Yehovah e tegu gi den triki fu na ogri sma,+ ma a e prisiri te wan sma e taki na wan switi fasi.+ 27  A sma di e kisi wini na wan bedrigi fasi o meki ogri miti en eigi osofamiri,+ ma a sma di no lobi tyuku o tan na libi.+ 28  Na ati fu a reti-ati sma e prakseri dipi fu sani, so taki a kan gi piki,+ ma a mofo fu den ogriwan e meki takru sani kuku kon na tapu.+ 29  Yehovah de fara fu den ogriwan,+ ma a e yere den begi fu den reti-ati sma.+ 30  Te ai e brenki, dan na ati e prisiri.+ Bun nyunsu+ e meki bonyo kon fatu.+ 31  A sma di e arki piri-ai+ di e gi libi, e tan leti na mindri koni sma.+ 32  Iniwan sma di no wani teki piri-ai+ no lobi ensrefi, ma a sma di e teki rai e kon abi wan koni ati.+ 33  Bigi lespeki gi Yehovah e yepi wan sma fu abi koni+ èn fosi wan sma kisi glori, a musu abi sakafasi.+

Futuwortu

Hebrew wortu: syeol. Luku „Moro sani”, nr. 10.