Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Odo 12:1-28

12  A sma di lobi piri-ai lobi sabi,+ ma a wan di no lobi te sma bari en, no abi frustan.+  Yehovah lobi sma di e du bun,+ ma a sma di abi takru prakseri, a e si leki wan ogri sma.+  Noiti sani o waka bun gi den sma di e du ogri,+ ma leki fa rutu e meki wan bon tanapu steifi, na so den reti-ati sma o tanapu kánkan.+  Wan bun wefi de leki wan kroon gi en masra,+ ma wan wefi di e meki en masra kisi syen, na wan sani di e pori en bonyo.+  Den reti-ati sma e prakseri sani di reti.+ Den ogri sma e gi trawan rai fu kori den.+  Den wortu fu den ogri sma de leki te wan sma e luru fu kiri trawan,+ ma na a mofo fu den krin-ati sma o frulusu den.+  Te den puru den ogri sma na pasi, den no de moro,+ ma na osofamiri fu den reti-ati sma o tan.+  Sma o prèise wan man di e taki koni sani nanga en mofo,+ ma den o tegu gi ibri takru-ati sma.+  A moro betre fu de wan mofina sma di abi wan futuboi, leki fu de wan sma di e meki bigi, aladi a no abi noti fu nyan.+ 10  A reti-ati sma e sorgu bun gi en osometi,+ ma srefi a sari-ati fu den ogri sma, na ogridu.+ 11  A sma di e wroko en gron o abi nofo nyanyan,+ ma a sma di e feti fu kisi sani di no warti noti, no abi frustan.*+ 12  Na ogri sma wani den sani di den takru-ati sma fanga,+ ma den reti-ati sma de leki wan bon di rutu steifi na ini a gron èn di e gi froktu.+ 13  Wan takru-ati sma e sondu nanga en mofo. A sani dati na wan trapu gi en.+ Ma a reti-ati sma e puru ensrefi na ini banawtu.+ 14  San wan man e taki nanga en mofo kan meki sani waka bun gi en+ èn san wan man e du, o meki taki a kisi en pai.+ 15  Wan don sma e denki taki a pasi fu en reti,+ ma a sma di e arki rai na wan koni sma.+ 16  Wan don sma e meki trawan si wantewante taki en ati e bron,+ ma wan sma di abi koni e tapu syen.+ 17  A sma di abi a gwenti fu taki sani di reti o fruteri san bun,+ ma wan falsi kotoigi o taki sani fu kori sma.+ 18  Sma de di e taki sani sondro fu denki, neleki na dyuku den e dyuku trawan nanga wan feti-owru,+ ma a tongo fu den koniwan na dresi.+ 19  Wan mofo di e taki san tru+ o tan fu têgo,+ ma a tongo di e taki lei no o tan langa.+ 20  Den sma di e prakseri nomo fu du ogri, e sidon denki fa den kan kori trawan,+ ma den wan di e gi trawan deki-ati fu libi bun nanga makandra, e prisiri.+ 21  Nowan hati sani o miti den reti-ati sma,+ ma bigi ogri o miti den ogri sma.+ 22  Yehovah e tegu gi sma di e lei,+ ma a e prisiri nanga den wan di e du san reti.+ 23  Wan man di koni no e taki wantewante san a sabi,+ ma den sma di no abi frustan e opo den mofo taki dondon sani.+ 24  A sma di e wroko tranga o de basi,+ ma wan lesiman o tron a srafu fu trawan.+ 25  Tumusi furu broko-ede o meki wan sma lasi-ati,+ ma te sma e taki switi nanga en, dan a e firi prisiri.+ 26  Wan reti-ati sma e luku bun san de na en eigi weigron, ma a pasi di den ogri sma e teki, o meki taki den wakawaka lontu.+ 27  Wan lesiman no e go onti meti fu nyan,+ ma tranga wroko na a bigi gudu fu wan man. 28  Te wan sma e waka a reti pasi, a o kisi libi+ èn te a e tan waka na tapu a pasi dati, a no o si dede.+

Futuwortu

Luku a marki na Odo 6:32.