Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Odo 10:1-32

10  Den odo fu Salomo.+ Na wan koni manpikin e gi en papa prisiri+ èn wan don manpikin e meki en mama sari.+  Den gudu fu na ogri sma no o tyari nowan wini kon,+ ma na retidu o kibri wan sma fu a no dede.+  Yehovah no o meki wan reti-ati sma tan nanga angri,+ ma a no o kowru a tranga lostu fu den ogri sma.+  A wan di lesi fu wroko no o abi furu sani,+ ma na anu fu a sma di e wroko tranga, o meki a kon gudu.+  A manpikin di e sori taki a abi a koni fu man si sani krin, e koti nyanyan na ini a waran ten fu a yari. A manpikin di e tyari ensrefi na wan syen fasi, e sribi dipi na a ten fu a kotiwroko.+  Reti-ati sma e kisi blesi,+ ma a mofo fu den ogri sma e kibri den takru prakseri fu den.+  Den bun sani di sma e memre fu wan reti-ati sma, meki taki den blesi en,+ ma a nen fu den ogriwan o lasi gowe.+  A sma di koni trutru o gi yesi na den komando di a e kisi,+ ma den o trapu a sma di e taki dondon sani nanga en mofo.+  Sani o waka bun gi a sma di e tyari ensrefi na wan reti fasi,+ ma ala sma o kon sabi a wan di e du kruktudu.+ 10  A sma di e pingi en ai fu kori wan trawan, o meki sma sari+ èn den o trapu a sma di e taki dondon sani nanga en mofo.+ 11  San den reti-ati sma e taki nanga den mofo, na dati e gi libi,+ ma a mofo fu den ogri sma e kibri den takru prakseri fu den.+ 12  Bita-ati e tyari feti kon,+ ma lobi e tapu ala sondu.+ 13  A sma di abi frustan, e taki koni sani nanga en mofo,+ ma a tiki na fu naki wan sma sondro frustan* na en baka.+ 14  Den koni sma e kibri sabi leki wan gudu,+ ma na a mofo fu a don sma o meki a kisi pori te fu kaba.+ 15  Den gudu fu wan guduman na wan tranga foto gi en.+ A pôtifasi fu den pôtiwan, na dati e pori den libi.+ 16  Den sani di a reti-ati sma du, o meki a kisi libi,+ ma sondu na san na ogri sma e koti.+ 17  A sma di e teki piri-ai, e sori trawan a pasi fu libi,+ ma a sma di no e teki rai, e meki trawan lasi pasi.+ 18  Te wan sma no wani sori taki a abi bita-ati, a e lei.+ A sma di e taki takru fu trawan, na wan don sma.+ 19  Te wan sma e taki tumusi furu, fowtu no e mankeri,+ ma wan sma di e hori en mofo, e du wan koni sani.+ 20  A tongo fu wan reti-ati sma na a moro bun solfru,+ ma na ati fu wan ogri sma no warti furu.+ 21  Den mofobuba fu den reti-ati sma e sorgu furu sma,+ ma den don sma e lasi den libi, fu di den no abi frustan.+ 22  A blesi fu Yehovah, na dati e meki sma kon gudu+ èn a no e meki den firi sari.+ 23  Wan don sma e si na ogri di a e du sondro fu syen leki wan preisani,+ ma wan sma di man frustan sani krin, abi koni.+ 24  A srefi sani di na ogri sma e frede, na dati o pasa nanga en,+ ma a sani di den reti-ati sma wani, na dati den o kisi.+ 25  Neleki wan tranga winti di wai pasa, na so na ogri sma no o de moro,+ ma a reti-ati sma na wan fondamenti di e tan fu têgo.+ 26  Leki asin na tapu sma tifi èn leki smoko na ini sma ai, na so wan lesiman de gi den wan di e seni en go du wan sani.+ 27  Bigi lespeki gi Yehovah o meki wan sma libi moro langa,+ ma a libi fu den ogri sma o kon moro syatu.+ 28  San den reti-ati sma e fruwakti, na dati e gi den prisiri,+ ma den ogri sma no o kisi san den e fruwakti.+ 29  A pasi fu Yehovah na wan fortresi gi den wan di e du bun,+ ma den sma di e du hati sani nanga trawan, o kisi pori.+ 30  Noiti wan reti-ati sma o naki futu,+ ma den ogri sma no o tan libi na grontapu.+ 31  A mofo fu wan reti-ati sma e meki sma kisi koni,+ ma den o koti a tongo fu den sma di e taki soso lei.+ 32  Den mofobuba fu wan reti-ati sma e meki taki a kon sabi dati trawan feni en bun,+ ma na soso lei e komoto na ini a mofo fu den ogri sma.+

Futuwortu

Luku a marki na Odo 6:32.