Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Obadya 1:1-21

 A fisyun fu Obadya: Disi na san a taki fu a boskopu di a Moro Hei Masra Yehovah abi gi Edom:+ „Wi yere wan boskopu fu Yehovah. Wan boskopuman go na den pipel. A taki: ’Opo, un pipel, opo meki wi go feti nanga en.’”+  „Mi meki yu de wan pikin pipel.+ Sma no lobi yu kwetikweti.+  A heimemre fu yu kori yu.+ Fu di yu e tan na den kibripresi fu den stonbergi+ èn na den hei bergi, meki yu e prakseri: ’Suma o man hari mi kon na gron?’  Efu yu e frei hei leki wan aka èn efu yu meki yu nesi na mindri den stari, dan na fu drape mi o hari yu kon na ondro”,+ na so Yehovah taki.  „Yu heri libi o pori trutru! Efu fufuruman kon na yu, noso efu ogri-ati fufuruman kon na yu na neti, den ben o fufuru ala san den wani, a no so?+ Efu sma di e piki droifi ben o kon na yu, dan den ben o libi wan tu droifi na baka, a no so?+  Ma sma o teki ala den sani fu den sma fu Esau!+ Den o teki ala den gudu fu den di den kibri!  Te na den lanki fu den kondre, den seni unu. Den srefi sma di meki wan frubontu nanga unu, kori unu.+ Den sma di libi bun nanga unu, kon wini unu.+ Den sma di e nyan nanga unu, o poti wan nèt fu fanga unu, fu di unu de leki wan sma di no abi koni.+  Mi o figi den koni sma puru fu Edom,+ èn nowan koni o de na den bergikontren fu Esau”, na so Yehovah taki. „A no na a dei dati ala den sani disi o pasa?  Ai Teiman,+ den tranga man fu yu o frede,+ bika sma o kiri den.+ Nowan fu den o de moro na a bergikontren fu Esau.+ 10  Na fu di yu du ogri nanga yu brada Yakob,+ meki yu o kisi bigi syen.+ Sma o kiri yu èn noiti moro yu o de.+ 11  Na a dei dati yu ben tanapu e luku nomo fa freimdesma tyari a legre fu en go na ini katibo,+ èn fa trakondre sma ben pasa den portu kon na ini a foto fu en.+ Di sma iti lòt fu prati Yerusalem,+ yu ben de leki wan fu den sma dati. 12  Yu no ben musu tan luku nomo fa ogri miti yu brada+ na a dei dati. Yu no ben musu prisiri di den sma fu Yuda ben e dede.+ Yu no ben musu abi wan bigi mofo na a dei di den ben de na ini banawtu. 13  Yu no ben musu pasa a portu kon na ini a foto fu mi pipel na a dei di rampu miti den.+ Yu no ben musu tanapu e luku fa sma ben e du ogri nanga den na a dei di rampu miti den. Yu no ben musu langa yu anu fu teki den gudu fu den na a dei di rampu miti den.+ 14  Yu no ben musu tanapu e wakti na den presi pe den pasi e prati, fu kiri den wan di ben e lowe gowe.+ Yu no ben musu grabu den loweman tyari go gi den feanti fu den na a dei di den ben de na ini banawtu.+ 15  A dei te Yehovah o krutu ala den pipel, de krosibei.+ Den sani di yu du nanga sma, na dati sma o du nanga yu tu.+ A fasi fa yu libi nanga sma, na so sma o libi nanga yu tu.+ 16  Neleki fa unu ben e dringi win na tapu mi santa bergi, na so ala den pipel o dringi mi atibron leki win doronomo.+ Iya, den o dringi èn swari mi atibron. Dan a o de neleki noiti den ben de. 17  Den loweman o de na Sion-bergi.+ A o tron wan santa presi.+ Den sma fu Yakob o teki den sani di de fu den.+ 18  Den sma fu Yakob o tron leki faya+ èn den sma fu Yosef o kon de leki wan faya.+ Den sma fu Esau o de leki drei grasi. Sma o sutu faya gi den fu bron den. Nowan sma fu Esau o tan na libi,+ bika na Yehovah srefi taki so. 19  Mi pipel o teki a kontren fu Negeb-sabana abra. Den o teki srefi a bergikontren fu Esau,+ a kontren fu Syefela, a kondre fu den Filisteasma,+ a kontren fu Efrayim,+ èn a kontren fu Samaria+ abra. Benyamin o teki Gilead+ abra. 20  Den Israelsma di den puru na baka a bigi skotu tyari gowe leki katiboman,+ o kisi a kontren fu den Kanansma+ te na Sarfat.+ Den katiboman fu Yerusalem di ben de na ini Sefarad, o teki den foto abra di de na Negeb-sabana.+ 21  Den frulusuman+ o kren kon na tapu Sion-bergi+ fu krutu den sma na a bergikontren fu Esau.+ A kownumakti o kon de fu Yehovah.”+

Futuwortu